វិសោធនកម្មច្បាប់បោះឆ្នោត៖ គ.ប.ម ថា ជាការធ្វើផ្ទុយពីប្រជាធិបតេយ្យពហុបក្ស និងបង្កភាពភ័យខ្លាចដល់ម្ចាស់ឆ្នោត
គណបក្សប្រជាធិបតេយ្យមូលដ្ឋាន បានចេញមកប្រតិកម្មទៅនឹងការធ្វើវិសោធនកម្មច្បាប់បោះឆ្នោតថ្មី ថាជាដំណើរធ្វើឲ្យប្រជាធិបតេយ្យសេរីពហុបក្សនៅកម្ពុជា កាន់តែរួមតូច និងបង្កជាភាពភ័យខ្លាចដល់ម្ចាស់ឆ្នោត។ ប្រតិកម្មរបស់គណបក្សក្រៅរដ្ឋាភិបាលមួយនេះ ធ្វើឡើងបន្ទាប់ពី សំណើរវិសោធនកម្មច្បាប់បោះឆ្នោត បានធ្វើឡើងដោយចំណាយពេលមិនដល់មួយសប្តាហ៍ ហើយត្រូវរដ្ឋសភាលើកដៃគាំទ្រទាំងស្រុងដោយគ្មានជំទាស់។
ចុះផ្សាយនៅថ្ងៃ៖
ស្តាប់ - ០២:០៤
សម្រាប់ គណបក្សប្រជាធិបតេយ្យមូលដ្ឋាន គឺជាការខកចិត្តជាខ្លាំង ដែលការធ្វើវិសោធនកម្មច្បាប់បោះឆ្នោតត្រូវបានអនុម័តដោយរដ្ឋសភាគ្រប់គ្រងដោយគណបក្សប្រជាជនកម្ពុជា យ៉ាងតក់ក្រហល់កៀកទៅថ្ងៃបោះឆ្នោតបែបនេះ។ នេះបើតាមសេចក្តីថ្លែងការណ៍ស្តីពីវិសោធនកម្មច្បាប់បោះឆ្នោត របស់គណបក្សប្រជាធិបតេយ្យមូលដ្ឋាន នៅថ្ងៃទី២៣មិថុនា។
បើតាមសេចក្តីថ្លែងការណ៍ គឺ គណបក្សប្រជាធិបតេយ្យមូលដ្ឋាន យល់ថា ការធ្វើវិសោធនកម្មច្បាប់បោះឆ្នោតលើកនេះ មិនស៊ីសង្វាក់ជាមួយនឹងខ្លឹមសារ ដ្បិតមិនបានលើកស្ទួយគុណតម្លៃនៃប្រជាធិបតេយ្យសេរីពហុបក្ស ដូចបានលើកឡើងនៅក្នុងសេចក្តីព្រាងវិសោធនកម្មច្បាប់បោះឆ្នោតនោះឡើយ។ សម្រាប់គណក្សក្រៅរដ្ឋាភិបាល នេះគឺការធ្វើឲ្យដំណើរប្រជាធិបតេយ្យសេរីពហុបក្សកាន់តែរួមតូច ហើយបង្កឲ្យមានការភ័យខ្លាច និងប៉ះពាល់ដល់ការសម្រេចចិត្តរបស់ម្ចាស់ឆ្នោត។
បន្ថែមពីនេះ ការធ្វើវិសោធនកម្មច្បាប់បោះឆ្នោត គឺនៅមានមន្ទិល និងភាពមិនប្រក្រតី ជាច្រើន ទាក់ទងនឹងនីតិវិធីកំណត់ លក្ខណៈវិនិច្ឆ័យហេតុផល និងការគ្រប់គ្រងទិន្នន័យឈ្មោះអ្នកដែលខកខានមិនបានទៅបោះឆ្នោត។ ការកំណត់ទោសទណ្ឌមិនឲ្យឈរឈ្មោះរហូតដល់១០ឆ្នាំ ដោយសារការខកខានមិនទាន់ទៅបោះឆ្នោត គឺជាលក្ខខណ្ឌដែលគណបក្សប្រជាធិបតេយ្យមូលដ្ឋាន យល់ថា ជារឿងមិនសមហេតុផល។ នេះបើតាមសេចក្តីថ្លែងការណ៍។
គួរបញ្ជាក់ថា សេចក្តីព្រាងវិសោធនកម្មច្បាប់បោះឆ្នោតថ្មី បានធ្វើឡើងតាមសំណើរបស់លោកនាយករដ្ឋមន្ត្រី ហ៊ុន សែន ដោយបានកែប្រែចំនួន៨មាត្រា រាប់ចាប់តាំងពីការបោះឆ្នោតជ្រើសរើសក្រុមប្រឹក្សាឃុំ-សង្កាត់ រហូតដល់ការបោះឆ្នោតជ្រើសតាំងតំណាងរាស្រ្ត។ វិសោធនកម្មច្បាប់បោះឆ្នោត ដែលត្រូវរដ្ឋសភាអនុម័តគ្មានជំទាស់ នៅថ្ងៃសុក្រ ត្រូវបានលោក ហ៊ុន សែន បញ្ជាក់ជាមុនថា ជាការទះឲ្យចំកញ្ចប់មាត់ក្រុមអ្នកនយោបាយប្រឆាំង ជាពិសេសក្រុមលោក សម រង្ស៊ី។
ការធ្វើវិសោធនកម្មច្បាប់បោះឆ្នោតលើកនេះ ក៏មានការរិះគន់ពីបណ្តាសហគមន៍អន្តរជាតិ ដែលក្នុងនោះ ការិយាល័យឧត្តមស្នងការសិទ្ធិមនុស្សអង្គការសហប្រជាជាតិ យល់ថា ជាការរឹតត្បិតលើសេរីភាពបញ្ចេញមតិ និងរំលោភសិទ្ធិពលរដ្ឋក្នុងការឈរឈ្មោះបោះឆ្នោត។ បើតាមការិយាល័យឧត្តមស្នងការសិទ្ធិមនុស្សអង្គការសហប្រជាជាតិ រដ្ឋាភិបាលកម្ពុជាត្រូវធានាបរិយាកាសអំណោយផលសម្រាប់ការបោះឆ្នោតនាខែកក្កដាខាងមុខនេះឲ្យមានភាពសេរីនិងយុត្តិធម៌៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ