អ្នកឃ្លាំមើលសិទ្ធិមនុស្សហៅការច្បាប់បោះឆ្នោតគឺជាភាពផ្តាច់ការក្នុងល្បែងប្រជាធិបតេយ្យ
អ្នកឃ្លាំមើលសិទ្ធិមនុស្សអន្តរជាតិនៅបន្តបញ្ចេញប្រតិកម្មធ្លាក់មក ចំពោះការកែប្រែច្បាប់ទាក់ទងនឹងការបោះឆ្នោតដែលប្រមុខរដ្ឋាភិបាលកម្ពុជាបានបញ្ជាឲ្យធ្វើវិសោធនកម្មនៅពេលថ្មីៗនេះ។ អង្គការ Human Right Watch បានហៅការចែងច្បាប់បន្ថែម ដែលតម្រូវឲ្យពលរដ្ឋត្រូវទៅបោះឆ្នោតទើបមានសិទ្ធិឈរឲ្យគេបោះឆ្នោតឲ្យតាមក្រោយនោះ គឺជាភាពផ្តាច់ការក្នុងល្បែងប្រជាធិបតេយ្យនៅកម្ពុជា។
ចុះផ្សាយនៅថ្ងៃ៖
ស្តាប់ - ០២:៤៣
លោក ភីលរ៉ូប៊ឺត សុន នាយកប្រចាំអាស៊ីនៃអង្គការឃ្លាំមើលសិទ្ធិមនុស្សអន្តរជាតិ(Human Right Watch) បានសរសេរនៅលើទំព័រទ្វីតធ័ររបស់ខ្លួននៅថ្ងៃទី២៤មិថុនា ក្រោយមួយថ្ងៃដែលរដ្ឋសភាកម្ពុជាអមុន័តសេចក្តីព្រាងវិសោធនកម្មច្បាប់បោះឆ្នោតនោះថា ការកែប្រែច្បាប់នៅមុនការបោះឆ្នោតនេះបង្ហាញថា «វាជាភាពផ្តាច់ការដែលកំពុងត្រូវបានលេងក្នុងល្បែងប្រជាធិបតេយ្យ»។
បើតាមអនុប្រធានអង្គការឃ្លាំមើលសិទ្ធិមនុស្សអន្តរជាតិរូបនេះ គឺសិទ្ធិរបស់ពលរដ្ឋ និងសិទ្ធិនយោបាយត្រូវបាន«បង្ក្រាប»ដែលជាសរុបមកគឺសិទ្ធិទាំងនេះត្រូវរឹតបន្តឹងដោយលោកនាយករដ្ឋមន្ត្រី ហ៊ុន សែន និងរដ្ឋាភិបាលរបស់គាត់។
គួរឲ្យដឹងថា រដ្ឋសភាកាលពីថ្ងៃទី២៣មិថុនា បានអនុម័តទាំងស្រុងលើវិសោធនកម្មច្បាប់នានាទាក់ទងនឹងការបោះឆ្នោត។ ច្បាប់បោះឆ្នោតជ្រើសតាំងតំណាងរាស្ត្រ មានការកែប្រែចំនួន៣មាត្រា គឺមាត្រា២៣ថ្មី មាត្រា១៤២ថ្មី និងមាត្រា១៤៣ថ្មី។ មាត្រា២៣ថ្មី មានខ្លឹមសារចែងបន្ថែមថាពលរដ្ឋខ្មែរដែលមានបំណងឈរឈ្មោះជាបេក្ខជនបោះឆ្នោតជ្រើសតាំងជាតំណាងរាស្ត្រ គឺត្រូវអនុវត្តសិទ្ធិបោះឆ្នោតដោយបានបោះឆ្នោតសកលចំនួន២លើកចុងក្រោយ។ រីឯមាត្រា១៤២ថ្មី គឺចែងអំពីការផាកពិន័យចំនួន៥លានរៀលទៅ២០លានរៀល ចំពោះបុគ្គល ដែលរារាំងពលរដ្ឋមិនឲ្យទៅបោះឆ្នោត ឬបំផ្លាញដល់ការបោះឆ្នោតទាំងមូល និងធ្វើឲ្យការបោះឆ្នោតទាំងមូលបាត់បង់ទំនុកចិត្ត។
បើតាមមាត្រានេះ បុគ្គលដែលបានប្រព្រឹត្តសកម្មភាពបែបនោះ នឹងត្រូវ គ.ជ.ប លុបឈ្មោះចេញពីបញ្ជីបោះឆ្នោត ឬដកសិទ្ធិមិនឲ្យពលរដ្ឋបោះឆ្នោតឲ្យ យ៉ាងតិច៥ឆ្នាំ។ ចំណែកឯមាត្រា១៤៣ថ្មី វិញ គឺ ចែងអំពីការលុបបេក្ខភាពឈរឈ្មោះរបស់គណបក្សនយោបាយ និងត្រូវផាកពិន័យពី១០លានទៅ៣០លានរៀល ចំពោះសកម្មភាពទាំងឡាយដែលរារាំងដល់ដំណើរការបោះឆ្នោត ដូចមានចែងក្នុងមាត្រា១៤២ថ្មី។ ម្យ៉ាងវិញទៀត គណបក្សនយោបាយដែលប្រព្រឹត្តសកម្មភាពបែបនោះ ក៏នឹងត្រូវដកសិទ្ធិចេញពីការបោះឆ្នោតជ្រើសតាំងតំណាងរាស្ត្រ ចំនួន៥ឆ្នាំយ៉ាងតិចដូចគ្នា។
រីឯការធ្វើវិសោធនកម្មច្បាប់បោះឆ្នោតជ្រើសរើសក្រុមប្រឹក្សាឃុំ-សង្កាត់ ក៏មានខ្លឹមសារមិនខុសអ្វីពីការធ្វើវិសោធនកម្មច្បាប់បោះឆ្នោតជ្រើសតាំងតំណាងរាស្ត្រនោះឡើយ។
លោក ស ខេង ដែលត្រូវបានចាត់តាំងឲ្យឡើងការពារសេចក្តីព្រាងវិសោធនកម្មច្បាប់នេះ បានបកស្រាយថា «ជារួម វិសោធនកម្មច្បាប់បោះឆ្នោតពេលនេះ គឺត្រូវបានធ្វើឡើងក្នុងគោលបំណងការពារដំណើរការនៃការបោះឆ្នោតពីផែនការ ឬឧបាកលនយោបាយនានាលើការប៉ុនប៉ងបំផ្លាញការបោះឆ្នោត។ ហើយការធ្វើវិសោធនកម្មនេះ ក៏នឹងរួមចំណែក លើកស្ទួយគុណតម្លៃនៃលទ្ធិប្រជាធិបតេយ្យសេរីពហុបក្ស ដែលមានចរិតក្នុងរដ្ឋធម្មនុញ្ញ លើកកម្ពស់ការទទួលខុសត្រូវរបស់អ្នកដឹកនាំនយោបាយ ដែលមានបំណងឈរឈ្មោះឱ្យគេបោះឆ្នោត ក្នុងការគោរពករណីកិច្ចរបស់ខ្លួន ក្នុងនាមជាពលរដ្ឋល្អ ក្នុងសង្គមប្រជាធិបតេយ្យ»៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ