លោក ហ៊ុន សែន បញ្ជាឲ្យបាញ់ទំលាក់ដ្រូនដែលហោះចូលក្នុងទឹកដីកម្ពុជាក្នុងខេត្តរតនគីរី
លោកនាយករដ្ឋមន្ត្រី ហ៊ុន សែន នៅព្រឹកថ្ងៃអង្គារ ទី២៧ ខែមិថុនានេះ បានបញ្ជាឲ្យកងទ័ពបាញ់ទម្លាក់យន្តហោះគ្មានមនុស្សបើក(ដ្រូន)ជាច្រើនគ្រឿង ដែលបានហោះចូលមកទឹកដីកម្ពុជានៅពេលយប់ត្រង់ចំណុចខេត្តរតនគីរី។ នៅក្នុងឃ្លីបសម្លេងថ្លែងតាមប្រព័ន្ធទំនាក់ទំនងតេឡេក្រាម លោក ហ៊ុន សែន បានប៉ាន់ស្មានថាជាដ្រូនបច្ចាមិត្ត ដែលធ្វើការវាយប្រហារទៅក្នុងទឹកដីវៀតណាម ខណៈដែលភាគីវៀតណាមបានបដិសេធថាមិនមែនជាដ្រូនរបស់គេ។ ហេតុដូច្នេះ លោកនាយករដ្ឋមន្ត្រី បានបញ្ជាឲ្យរដ្ឋមន្ត្រីការពារជាតិ នាយអគ្គបញ្ជាការកងទ័ព និងមេបញ្ជាការអង្គរក្សរបស់លោក ប្រើប្រាស់អាវុធទំនើបបាញ់ទំលាក់ដ្រូនទាំងនោះ ដើម្បីបានដឹងច្បាស់ពីប្រភពច្បាស់លាស់របស់ដ្រូន ដែលលោកចាត់ទុកថាមិនមែនជារឿងធម្មតានោះទេ។
ចុះផ្សាយនៅថ្ងៃ៖
សូមស្តាប់ប្រសាសន៍លោកនាយករដ្ឋមន្ត្រី ហ៊ុន សែន៖
សូមរំលឹកថាកាលពី២សប្តាហ៍កន្លងទៅ មានក្រុមបះបោរ ដែលលោកសំដៅទៅលើជនជាតិភាគតិចម៉ុងតាញ៉ាវៀតណាម បានបើកការវាយលុកទៅលើសាលាឃុំចំនួន២ របស់វៀតណាម ស្ថិតនៅឈមគ្នានឹងខេត្តរតនគីរីរបស់កម្ពុជា ដែលក្នុងពេលតែមួយនោះ មេឃុំ លេខាបក្សឃុំ ប៉ូលិស ប្រជាពលរដ្ឋមួយចំនួនត្រូវបានសម្លាប់។ ប្រឈមនឹងបញ្ហានេះលោកនាយករដ្ឋមន្ត្រី ហ៊ុន សែន ក៏បានចេញបទបញ្ជាយ៉ាងម៉ឺងម៉ាត់ផងដែរទៅកាន់កម្លាំងប្រដាប់អាវុធកម្ពុជា ជាពិសេសនៅតាមព្រំដែនកម្ពុជា-វៀតណាម ក្នុងទឹកដីខេត្តរតនគិរី និងមណ្ឌលគិរី ត្រូវបង្កើនការប្រុងប្រយ័ត្នខ្ពស់ត្រៀមទប់ស្កាត់ក្រុមបះបោរជនជាតិភាគតិចនៃប្រទេសវៀតណាម ដែលមានបំណងរត់ចូលក្នុងទឹកដីកម្ពុជា។ ក៏ប៉ុន្តែរហូតមកទល់ពេលនេះ នៅពុំទាន់មានការបញ្ជាក់ណាមួយពីការចាប់ខ្លួនសកម្មជនបះបោររត់ចូលមកក្នុងទឹកដីកម្ពុជានៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ