គណបក្សប្រជាជនធ្វើខួបកំណើត៧២ឆ្នាំភ្ជាប់ថ្ងៃឃោសនាបោះឆ្នោតនៅថ្ងៃទី០១ ខែកក្កដា
នៅថ្ងៃទី២៨ ខែមិថុនា ឆ្នាំ២០២៣នេះ គណបក្សប្រជាជនកម្ពុជាបានចាប់កំណើត៧២ឆ្នាំហើយ ដោយនៅឆ្នាំនេះ គណបក្សប្រជាជនដែលដឹកនាំដោយលោកនាយករដ្ឋមន្ត្រី ហ៊ុន សែន បានលើកមិទ្ទិញប្រារព្ធខួបកំណើតរបស់ខ្លួនទៅធ្វើរួមគ្នានៅថ្ងៃទី០១ ខែកក្កដាវិញ ដែលជាថ្ងៃឃោសនាបោះឆ្នោតដំបូងនៃការជ្រើសតាំងតំណាងរាស្ត្រនីតិកាលទី៧។ ជាមួយគ្នានេះ លោក សម រង្ស៊ី ដែលជាមេដឹកនាំប្រឆាំងនៅក្រៅប្រទេសក៏បានឆ្លៀតឱកាសនេះវាយប្រហារលើគណបក្សកាន់អំណាចផងដែរ ទាក់ទងទៅនឹងប្រវត្តិមេដឹកនាំគណបក្សប្រជាជនកម្ពុជា។ តែមន្ត្រីជាន់ខ្ពស់គណបក្សថាជាការមួលបង្កាច់។
ចុះផ្សាយនៅថ្ងៃ៖
ស្តាប់ - ០២:១៨
គណបក្សប្រជាជនកម្ពុជានឹងប្រារព្ធខួបកំណើត៧២ឆ្នាំ របស់ខ្លួននៅថ្ងៃទី០១ ខែកក្កដា ឆ្នាំ២០២៣ខាងមុខ ជាមិទ្ទិញទ្រង់ទ្រាយធំនៅទូទាំងប្រទេសភ្ជាប់នឹងថ្ងៃដំបូងនៃយុទ្ធនាការឃោសនារកសម្លេងឆ្នោត នៃការបោះឆ្នោតជ្រើសតាំងតំណាងរាស្ត្រនីតិកាលទី៧។
លោក សុខ ឥសាន អ្នកនាំពាក្យគណបក្សប្រជាជនកម្ពុជាបានបញ្ជាក់ថាមិទ្ទិញខួប៧២ឆ្នាំថ្ងៃបង្កើតគណបក្សប្រជាជននឹងត្រូវធ្វើនៅកោះពេជ្រ ដោយមានអ្នកចូលរួមពីអ្នកគាំទ្រពី៥ម៉ឺន ទី១០ម៉ឺននាក់ ដោយថ្នាក់ដឹកនាំកំពូលគណបក្សអានសារនយោបាយផ្សាយបន្តផ្ទាល់ទៅគ្រប់ខេត្តរាជធានីទូទាំងប្រទេស។ បន្ទាប់ពីមិទ្ទិញគណបក្សប្រជាជននឹងដង្ហែរក្បួនយុទ្ធនាការរកសម្លេងឆ្នោតទៅតាមតំបន់នានានៅរាជធានីភ្នំពេញ ខណៈដែលក្បួនគណបក្សនៅតាមខេត្តចេញដំណើរពីទីរួមខេត្តនីមួយៗទៅកាន់ស្រុកនានាក្នុងខេត្ត។
ស្របពេលខួប៧២ឆ្នាំថ្ងៃបង្កើតគណបក្សប្រជាជននេះដែរ លោក សម រង្ស៊ី ដែលជាមេដឹកនាំប្រឆាំងមួយរូបនៅឯក្រៅប្រទេស ក៏បានឆ្លៀតលើកឡើងដែរដោយសំអាងលើប្រវត្តិវិទូឯករាជ្យថាគណបក្សប្រជាជនជាគណបក្សដែលបង្កើតដោយវៀតណាមនៅឆ្នាំ១៩៥១ ហើយស្ថាបនិកគណបក្សនេះគឺលោក សឺង ង៉ុកមិញ ហៅអាចារ្យមៀនក៏ជាអាចារ្យក្លែងក្លាយក្បត់ជាតិដែរ។
ក៏ប៉ុន្តែអ្នកនាំពាក្យគណបក្សប្រជាជនកម្ពុជាលោក សុខ ឥសាន បានហៅការលើកឡើងរបស់លោក សម រង្ស៊ី ថាជាការមួលបង្កាច់មិនត្រឹមតែពេលនេះទេ គឺអស់រយៈពេល៤៤ឆ្នាំមកហើយ។ លោកថាការមួលបង្កាច់របស់ក្រុមប្រឆាំងមិនទទួលបានអ្វីទាំងអស់។
សូមរំលឹកថាគណបក្សប្រជាជនកម្ពុជា មានឈ្មោះដើមថា បក្សប្រជាជនបដិវត្តន៍កម្ពុជា។ គណបក្សនេះបានបដិសន្ធិឡើងនៅថ្ងៃទី២៨ ខែមិថុនា ឆ្នាំ១៩៥១ ដោយមានប្រភពពីចលនាតស៊ូរបស់ប្រជាជនកម្ពុជា ប្រឆាំងពួកអាណានិគមនិយមដើម្បីឯករាជ្យជាតិ។
ក្រោយថ្ងៃរំដោះ ៧មករា ឆ្នាំ១៩៧៩ គណបក្សប្រជាជនមានឈ្មោះថា បក្សប្រជាជនបដិវត្តន៍កម្ពុជា រហូតដល់ឆ្នាំ១៩៩១ ហើយឈ្មោះនេះ ត្រូវបានគេប្ដូរទៅជាគណបក្សប្រជាជនកម្ពុជា ដែលគេស្គាល់រហូតមកទល់ពេលបច្ចុប្បន្ន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ