គណបក្សនយោបាយចំនួន៤ចេញឃោសនារកសំឡេងគាំទ្រក្នុងក្រុងភ្នំពេញ នៅថ្ងៃដំបូង
យ៉ាងហោចណាស់ មានគណបក្សនយោបាយចំនួន៤ បានចាប់ផ្តើមចេញឃោសនារកសំឡេងគាំទ្រ នៅអំឡុងពេលយុទ្ធនាការឃោសនាការបោះឆ្នោតឆ្នាំ២០២៣ បានបើកនៅថ្ងៃទី០១កក្កដានេះ។ គណបក្សប្រជាជនកម្ពុជា ដែលជាគណបក្សកាន់អំណាច បានបង្ហាញសាច់ដុំធំជាងគេ ក្នុងថ្ងៃយុទ្ធនាការដំបូងនេះ ដោយមានអ្នកចូលរួមរហូតដល់ជាង៧ម៉ឺននាក់។
ចុះផ្សាយនៅថ្ងៃ៖
ស្តាប់ - ០១:៥៩
គណបក្សនយោបាយចំនួន៤ ដែលចេញឃោសនានៅថ្ងៃដំបូងនេះ រួមមាន គណបក្សប្រជាជនកម្ពុជា គណបក្សខ្មែររួបរួមជាតិ គណបក្សខ្មែរឈប់ក្រ និងគណបក្សខ្មែរតែមួយ។ សម្រាប់គណបក្សប្រជាជនកម្ពុជា ដែលជាគណបក្សកាន់អំណាចបានជួបជុំអ្នកគាំទ្ររបស់ខ្លួន រហូតដល់ជាង៧ម៉ឺននាក់ នៅកោះពេជ្រ ក្រោមវត្តមានដោយផ្ទាល់ របស់លោក ហ៊ុន សែន ដែលជាប្រធានគណបក្ស មុននឹងបើកក្បួនដង្ហែតាមដងផ្លូវកណ្តាលក្រុងភ្នំពេញ។
លោក ហ៊ុន សែន ប្រធានគណបក្សប្រជាជនកម្ពុជា បានថ្លែងពីគោលនយោបាយរបស់គណបក្សកាន់អំណាចដែលមានរហូតដល់៧ចំណុច ក្នុងន័យទាក់ចិត្តប្រជាពលរដ្ឋ ដែលជាកម្មករ កសិករ និងមន្ត្រីរាជការជាដើម ថា គណបក្សប្រជាជនកម្ពុជានឹងផ្តល់រាល់សេវាដល់ប្រជាពលរដ្ឋ ដោយតម្លាភាព និងជឿទុកចិត្ត។ នេះបើតាមសេចក្តីថ្លែងការណ៍របស់លោក ហ៊ុន សែន នៅព្រឹកថ្ងៃសៅរ៍។ សម្រាប់លោក ហ៊ុន សែន គឺគោលនយោបាយឆ្នាំ២០២៣-២០២៨ របស់បក្សកាន់អំណាច ជាការឆ្លើយតបទៅនឹងការវិវត្តន៍ជាក់ស្តែងនៃសភាពការណ៍ក្នុងប្រទេស និងក្រៅប្រទេស។
ដោយឡែកសម្រាប់គណបក្សដទៃ រួមមានគណបក្សខ្មែររួបរួមជាតិ ខ្មែរឈប់ក្រ និងខ្មែរតែមួយ បានធ្វើសកម្មភាពជួបជុំអ្នកគាំទ្ររបស់ខ្លួន និងបានធ្វើក្បួនដង្ហែតាមបណ្តាផ្លូវក្រុងភ្នំពេញ ដោយមិនមានការថ្លែងសារគោលនយោបាយរបស់គណបក្សគួរឲ្យកត់សម្គាល់ឡើយ។
គួរបញ្ជាក់ថា យុទ្ធនាការឃោសនារកសំឡេងគាំទ្ររបស់គណបក្សនយោបាយ នៅចំពោះមុខនៃការបោះឆ្នោតជ្រើសតាំងតំណាងរាស្ត្រអាណត្តិទី៧ នៅថ្ងៃទី២៣កក្កដាខាងមុខនេះ មានរយៈពេល២១ថ្ងៃ ដោយរាប់ពីថ្ងៃទី០១កក្កដា ដល់ ថ្ងៃទី២១កក្កដា ខណៈដែលថ្ងៃទី២២ ជាថ្ងៃស និងថ្ងៃទី២៣ជាថ្ងៃបោះឆ្នោតជាតិ។
នៅក្នុងបោះឆ្នោតឆ្នាំនេះ មានគណបក្សនយោបាយចូលរួមចំនួន១៨ ខណៈដែលគណបក្សភ្លើងទៀនដែលធ្លាប់បានសំឡេងគាំទ្រជាង២លាននៅក្នុងការបោះឆ្នោតឃុំ-សង្កាត់ឆ្នាំ២០២២ ត្រូវបានគ.ជ.ប ផាត់ចេញពីបញ្ជីបោះឆ្នោត ដោយសារកង្វះឯកសារច្បាប់ដើម។ ការណ៍នេះ បានរុញឲ្យសហគមន៍អន្តរជាតិ លើកឡើងថា ការបោះឆ្នោតថ្នាក់ជាតិខាងមុខ គឺជាការបោះឆ្នោតដែលមិនមានគោលការណ៍សេរី ពហុបក្ស ដ្បិតគណបក្សប្រឆាំងដ៏មានឥទ្ធិពលមួយ ត្រូវអវត្តមាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ