ពលរដ្ឋខ្មែរដែលមាននិន្នាការប្រឆាំងនៅអូស្ត្រាលីនឹងធ្វើបាតុកម្មប្រឆាំងការបោះឆ្នោតនៅកម្ពុជា
ប្រជាពលរដ្ឋខ្មែររស់នៅប្រទេសអូស្ត្រាលី ដែលមាននិន្នាការប្រឆាំងជាមួយរដ្ឋាភិបាល គ្រោងធ្វើបាតុកម្មនៅថ្ងៃទី១៦ កក្កដា ដើម្បីប្រឆាំងទៅនឹងការបោះឆ្នោតនៅកម្ពុជា ដោយពួកគេចាត់ទុកថា ការបោះឆ្នោតនេះ គឺជាការបោះឆ្នោតក្លែងក្លាយដើម្បីបំពេញមហិចតាក្រុមលោក ហ៊ុន សែន តែប៉ុណ្ណោះ។ ឆ្លើយតបនឹងគម្រោងបាតុកម្មនេះ អ្នកនាំពាក្យគណៈកម្មាធិការជាតិរៀបចំការបោះឆ្នោត (គជប) ថានេះជាសកម្មភាពធ្វើផ្ទុយពីច្បាប់បោះឆ្នោតជ្រើសតាំងតំណាងរាស្រ្ត ហើយអ្នកធ្វើនឹងប្រឈមទណ្ឌកម្មច្បាប់ផងដែរ។
ចុះផ្សាយនៅថ្ងៃ៖
ស្តាប់ - ០២:២៥
ដោយមើលឃើញការបោះឆ្នោតថ្នាក់ជាតិនៅកម្ពុជាពុំមានវត្តមានគណបក្សប្រឆាំងចូលរួម ប្រជាពលរដ្ឋខ្មែររស់នៅប្រទេសអូស្ត្រាលី គ្រោងធ្វើបាតុកម្មប្រឆាំង នៅថ្ងៃទី១៦ កក្កដា ចាប់ពីម៉ោង ១ដល់ម៉ោង ៣រសៀល នៅមុខសាលាក្រុងស្ព្រីងវែល (Springvale town hall) ទីក្រុងម៉ែលប៊ន (Melbourne) រដ្ឋវ៉ិកតូរីយ៉ា (Victoria) ប្រទេសអូសស្រ្តាលី។
ទាក់ទិនទៅនឹងគម្រោងធ្វើបាតុកម្មនេះ លោក អ៊ិន ហេមរ៉ា ប្រធានប្រតិបត្តិអតីតគណបក្សសង្គ្រោះជាតិនៅរដ្ឋវ៉ិកតូរីយ៉ា ប្រទេសអូស្រ្តាលី បានបញ្ជាក់នៅលើបណ្ដាញសង្គមហ្វេសប៊ុកថា ការធ្វើបាតុកម្មនេះ គឺ ក្នុងគោលដៅប្រឆាំងទៅនឹងការបោះឆ្នោតជ្រើសតាំងតំណាងរាស្រ្ត នីតិកាលទី៧ ឆ្នាំ២០២៣។ បើតាម លោក អ៊ិន ហេមរ៉ា ការបោះឆ្នោតនេះ ជាការបោះឆ្នោតក្លែងក្លាយ រៀបចំដោយក្រុមលោក ហ៊ុន សែន ដើម្បីបំពេញមហិចតារបស់ខ្លួនតែប៉ុណ្ណោះ មិនមែនជាការបោះឆ្នោតដោយសេរី ត្រឹមត្រូវ យុត្តិធម៌ ស្របតាមរបបប្រជាធិបតេយ្យ សេរីពហុបក្សឡើយ។
លោក អ៊ិន ហេមរ៉ា ក៏បានអំពាវនាវដល់ប្រជាពលរដ្ឋរស់នៅប្រទេសអូស្រ្តាលី ចូលរួមធ្វើបាតុកម្មប្រឆាំងការបោះឆ្នោតនេះឲ្យបានច្រើន ដើម្បីជួយសង្គ្រោះប្រទេសកម្ពុជាឲ្យមានដំណើរការប្រជាធិបតេយ្យ សេរីពហុបក្ស និងការគោរពសិទ្ធិមនុស្ស។
ឆ្លើយតបចំពោះគម្រោងធ្វើបាតុកម្មប្រឆាំងទៅនឹងការបោះឆ្នោតនៅកម្ពុជាខាងលើនេះ អ្នកនាំពាក្យគណៈកម្មាធិការជាតិរៀបចំការបោះឆ្នោត លោក សោម សូរីដា បានចាត់ទុកគម្រោងបាតុក្មនេះ គឺជាសកម្មភាពធ្វើឡើងផ្ទុយពីច្បាប់បោះឆ្នោតជ្រើសតាំងតំណាងរាស្រ្ត ត្រង់មាត្រា ១៤២ថ្មី គឺចែងអំពីការផាកពិន័យចំនួន ៥លានរៀលទៅ ២០លានរៀល ចំពោះបុគ្គលដែលរារាំងពលរដ្ឋមិនឲ្យទៅបោះឆ្នោត ឬបំផ្លាញដល់ការបោះឆ្នោតទាំងមូល និងធ្វើឲ្យការបោះឆ្នោតទាំងមូលបាត់បង់ទំនុកចិត្ត។ បើតាមមាត្រានេះ បុគ្គលដែលបានប្រព្រឹត្តសកម្មភាពខុស នឹងត្រូវ (គ.ជ.ប) លុបឈ្មោះចេញពីបញ្ជីបោះឆ្នោត ឬដកសិទ្ធិមិនឲ្យពលរដ្ឋបោះឆ្នោតឲ្យយ៉ាងតិច៥ឆ្នាំផងដែរ។
ជាកាត់សម្គាល់គម្រោងបាតុកម្មដែលធ្វើឡើងដោយប្រជាពលរដ្ឋខ្មែររស់នៅប្រទេសអូស្រ្តាលីនេះ ស្របពេលដែលគណបក្សនយោបាយនៅកម្ពុជា បាននិងកំពុងធ្វើយុទ្ធនាការឃោសនាបោះឆ្នោត និងឈានទៅរកការបោះឆ្នោតនៅថ្ងៃទី២៣ កក្ដដា ខណៈការបោះឆ្នោតនេះ ពុំមានវត្តមានគណបក្សភ្លើងទៀន ដែលគេចាត់ថា ជាគណបក្សប្រឆាំងដ៏ធំមួយនៅកម្ពុជាបន្ទាប់ពីអតីតគណបក្សសង្រ្គោះជាតិ។
ការបោះឆ្នោតដែលគ្មានវត្តមានគណបក្សប្រឆាំងចូលរួម ត្រូវបានសហគមន៍ជាតិ និងអន្តរជាតិចាត់ទុកថា ជាការបោះឆ្នោតបង្គ្រប់កិច្ច និងជាការបោះឆ្នោតដែលមិនមានគោលការណ៍សេរី ពហុបក្ស ដ្បិតគណបក្សប្រឆាំងដ៏មានឥទ្ធិពលមួយដែលមានប្រជាពលរដ្ឋគាំទ្រជាង ២លាននាក់ ត្រូវបានផាត់ចេញពីការប្រកួតដោយសារកង្វះឯកសារច្បាប់ដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ