HRW៖ «ការបោះឆ្នោតជាតិកម្ពុជាឆ្នាំ២០២៣បន្តមានការលួចបន្លំសន្លឹកឆ្នោតនិងភាពប្រក្រតី ដូចអាណត្តិមុនដែរ»
តាមការវិភាគដោយយោងទៅលើរបាយការណ៍ជាក់ស្តែង អង្គការឃ្លាំមើលសិទ្ធិមនុស្ស Human Right Watch វិនិច្ឆ័យថាការបោះឆ្នោតជាតិនៅកម្ពុជាឆ្នាំ២០២៣ខាងមុខ នឹងបន្តមានការលួចបន្លំសន្លឹកឆ្នោត និងមានភាពមិនប្រក្រតីដូចជាការបោះឆ្នោតនៅអាណត្តិមុនដែរ។ ចំណែក គណៈកម្មាធិការរៀបចំការបោះឆ្នោត តែងតែ អះអាងថា ដំណើរការរៀបចំបោះឆ្នោតនៅកម្ពុជារៀបចំឡើងស្របទៅតាមច្បាប់ស្តីពីការបោះឆ្នោត។
ចុះផ្សាយនៅថ្ងៃ៖
ស្តាប់ - ០២:៤៩
នៅក្នុងសេចក្តីថ្លែងការណ៍ចេញផ្សាយនៅថ្ងៃទី៣កក្កដាឆ្នាំ២០២៣ អង្គការឃ្លាំមើលបញ្ហាសិទ្ធិមនុស្ស Human Right Watch បានបរិហារ ទុកជាមុន អំពីការបោះឆ្នោតជ្រើសតាំងតំណាងរាស្ត្រនៅកម្ពុជាអាណត្តិទី៧ ក្នុងពេលដ៏ខ្លីខាងមុខនេះថា នឹងមានការរំខាន មានការលួចបន្លំសន្លឹកឆ្នោត។ ជាលំអានចាស់ ដែលHuman Right Watch បានកត់សម្គាល់ សម្រាប់ការបោះឆ្នោតនាពេលកន្លងមក។
ការរិះគន់របស់ Human Right Watch ធ្វើឡើង ក្រោយបានពិនិត្យផ្ទៀងផ្ទាត់ «កំណត់ហេតុនៃការរាប់សន្លឹកឆ្នោត» ឬ «ទម្រង់បែបបទ១១០២» នៅការិយាល័យបោះឆ្នោតរាជធានីភ្នំពេញ ក្នុងដំណើរការបោះឆ្នោតកាលពីឆ្នាំ២០២២។ ក្នុងទម្រង់១១០២នេះ ការិយាល័យបោះឆ្នោតនៅភ្នំពេញចំនួន ២១៥៥មណ្ឌល មាន១៩ភាគរយមិនបានសរសេរបំពេញតួលេខបានត្រឹមត្រូវ ១៥ភាគរយជាការលុបកែតម្រូវកំហុសឯកសារដែលគ្មានការពន្យល់ ជាង៣ភាគរយទៀតបាត់តួលេខ និង៣ភាគរយបាត់ឈ្មោះគណបក្ស ឬ សំឡេងឆ្នោតក្នុងការបំពេញទម្រង់ ១១០២នេះ។
គួរដឹងថា ទម្រង់បែបបទ១១០២ គឺជាទម្រង់ឯកសារសំខាន់ ដែលមានភ្ជាប់បញ្ជីឈ្មោះអ្នកបោះឆ្នោត គល់បញ្ជីសន្លឹកឆ្នោតដែលបានប្រើ ឬ មិនបានប្រើ, សន្លឹកឆ្នោតបានការ ឬមិនបានការ ឬក៏ខូច, ត្រាសម្ងាត់សម្រាប់ការិយាល័យបោះឆ្នោត ព្រមទាំង បណ្ដឹងជំទាស់ ឬតវ៉ាជាដើម។ ឯកសារច្បាប់ទម្រង់១១០២ ទើបនឹងត្រូវបានកែសម្រួលទម្លាប់ចែកទៅកាន់ភាគីពាក់ព័ន្ធនៅមុនការបោះឆ្នោតឆ្នាំ២០២២នោះឯង។
ហើយអ្វីដែលជាការកត់សម្គាល់ភាពមិនប្រក្រតីមួយទៀតនោះ គឺអ្នកសង្កេតការណ៍បោះឆ្នោតដ៏ច្រើនលើសលុបចំនួន ៤៤ភាគរយ គឺមកពីគណបក្សកាន់អំណាច នៅក្នុងការឃ្លាំមើលការបោះឆ្នោត។ នេះបើតាមHuman Right Watch។
បន្ថែមពីនេះដែរ Human Right Watch បានលើកឡើងទៀតថា អ្នកឃ្លាំមើលនិងអ្នកស្ម័គ្រចិត្តក្នុងស្រុកជាច្រើនបានផ្តល់ព័ត៌មានមកថា មានយ៉ាងហោចណាស់មណ្ឌលបោះឆ្នោតចំនួន៥ នៅការិយាល័យបោះឆ្នោតរាជធានីភ្នំពេញ បានបិទទ្វារបង្អួត អំឡុងពេលនៃការរាប់សន្លឹកឆ្នោតកាលបោះឆ្នោតឆ្នាំ២០២២។
ជុំវិញបញ្ហាខាងលើនេះHuman Right Watch អះអាងថា បានផ្ញើលិខិតទៅកាន់ប្រធានគណៈកម្មាធិការជាតិរៀបចំការបោះឆ្នោតតាំងតែពីថ្ងៃទី៥មិថុនាឆ្នាំ២០២៣ដែរ ប៉ុន្តែគ្មានការឆ្លើយតបសោះ។
គួរជម្រាបជូនថា ការបោះឆ្នោតជ្រើសតាំងតំណាងរាស្ត្រនៅកម្ពុជាអាណត្តិទី៧ នឹងប្រព្រឹត្តិទៅនៅថ្ងៃទី២៣ ខែកក្កដា ឆ្នាំ២០២៣ ដោយមានបក្សនយោបាយចូលរួមប្រកួតចំនួន ១៨គណបក្ស។ ដោយការបោះឆ្នោតគ្មានវត្តមានបក្សភ្លើងទៀនដែលជាបក្សប្រឆាំង ការបោះឆ្នោតជាតិឆ្នាំ២០២៣នេះ បានទទួលរងនូវការរិះគន់ជាច្រើនពីសហគមន៍អន្តរជាតិ បណ្តាអង្គទូតជាច្រើន និងអង្គការសង្គមស៊ីវិលផ្សេងទៀត ស្របពេលដែលរដ្ឋាភិបាលកម្ពុជាក៏កំពុងតែរៀបចំសម្រេចការធ្វើវិសោធនកម្មច្បាប់បោះឆ្នោត។ ជាវិសោធនកម្មច្បាប់ដែលទទួលមតិរិះគន់យ៉ាងសន្ធឹកថាផ្ទុយពីប្រជាធិបតេយ្យពហុបក្ស និងបង្កភាពភ័យខ្លាចដល់ម្ចាស់ឆ្នោត តែត្រូវបានរដ្ឋាភិបាលបដិសេធ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ