លោក សុខ ឥសាន៖ សកម្មភាពរបស់ក្រុមប្រឆាំងនៅក្រៅប្រទេសនឹងរុញឲ្យភ្លើងទៀនរលាយឆាប់
អ្នកនាំពាក្យគណបក្សកាន់អំណាចព្រមានថា ការធ្វើសកម្មភាពរបស់ក្រុមអ្នកនយោបាយប្រឆាំងនៅក្រៅប្រទេសនឹងរុញឲ្យមានការរំលាយគណបក្សភ្លើងទៀនដែលនៅក្នុងស្រុកកាន់តែឆាប់។ ការប្រតិកម្មយ៉ាងដូច្នេះ គឺជាការឆ្លើយតបនឹងសាររបស់លោក សម រង្ស៊ី នៅប៉ុន្មានថ្ងៃជាប់គ្នាមកនេះហាក់ដូចជារុញឲ្យអ្នកគាំទ្របក្សកាន់អំណាចគូសសន្លឹកឆ្នោតចោល និងស្របពេលដែលមានបាតុកម្មមួយនៅទីក្រុងឡូវែល ដោយធ្វើរូបសំណាកលោក ហ៊ុន សែន ដើម្បីដុតចោល។
ចុះផ្សាយនៅថ្ងៃ៖
ស្តាប់ - ០១:៣៧
ការបង្កើនសកម្មភាពកាន់តែក្តៅនៅក្រៅប្រទេសនឹងបង្កផលវិបាកដល់អ្នកនយោបាយប្រឆាំងនៅក្នុងស្រុកទៅវិញទេ។ នេះបើតាមលោក សុខ ឥសាន។ អ្នកនាំពាក្យគណបក្សកាន់អំណាច រូបនេះ បានព្រមានថា គណបក្សភ្លើងទៀននឹងត្រូវរំលាយកាន់តែឆាប់ ដោយសារតែសកម្មភាពរបស់អ្នកនយោបាយប្រឆាំងនៅក្រៅប្រទេសនាប៉ុន្មានថ្ងៃចុងក្រោយនេះ។
សកម្មភាពរបស់ក្រុមប្រឆាំងនៅក្រៅប្រទេសប៉ុន្មានថ្ងៃចុងក្រោយនេះ គឺមានបាតុកម្មមួយនៅទីក្រុងឡូវែល រដ្ឋម៉ាសាឈូសេត ដែលមានការចូលរួមពីអ្នកនយោបាយសំខាន់ៗមួយចំនួនដែលនៅកៀកនឹងលោក សម រង្ស៊ី។ បាតុកម្មនៅថ្ងៃអាទិត្យ៩កក្កដានោះ ក្រៅពីរំឭកខួបលោក កែម ឡី ក្រុមបាតុករ បានធ្វើរូបសំណាកលោក ហ៊ុន សែនផ្តួលទៅនឹងដី ដោយនាំគ្នាដើរជាន់ក ហើយលើកដាក់ក្នុងមឈូស រោយអំបិល ដើម្បីយកទៅដុតចោល។
បាតុកម្មនេះត្រូវបានលោក អេង ឆៃអ៊ាង និងលោកស្រី មូរ សុខហួរ លើកឡើងថា ជាសារប្រាប់ទៅអន្តរជាតិពីការមិនពេញចិត្តរបស់ពលរដ្ឋខ្មែរ ទៅនឹងការបោះឆ្នោតនៅថ្ងៃទី២៣កក្កដាខាងមុខ ហើយដែលនាំឲ្យមានការធ្វើយុទ្ធនាការគូសសន្លឹកឆ្នោតចោល។
ចំណែក នៅតាមហ្វេសប៊ុកវិញ លោក សម រង្ស៊ី នៅប៉ុន្មានថ្ងៃចុងក្រោយជាប់ៗគ្នាមកនេះហាក់ដូចជារុញឲ្យអ្នកគាំទ្របក្សកាន់អំណាចទៅគូសសន្លឹកឆ្នោតចោល ដែរ។
សម្រាប់ លោក សុខ ឥសាន សកម្មភាពនេះគឺមិនមែនជារឿងថ្មីឡើយ ហើយថា គ្មានឥទ្ធិពលអ្វីទៅលើទឹកចិត្តរបស់ពលរដ្ឋមិនឲ្យពួកគេចេញទៅបោះឆ្នោតនោះដែរ។
ផ្ទុយទៅវិញ អ្នកនាំពាក្យគណបក្សកាន់អំណាចព្រមានថា ការធ្វើសកម្មភាពរបស់ក្រុមអ្នកនយោបាយប្រឆាំងនៅក្រៅប្រទេសនឹងរុញឲ្យមានការរំលាយគណបក្សភ្លើងទៀនដែលនៅក្នុងស្រុកកាន់តែឆាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ