គណៈកម្មាធិការចម្រុះកិច្ចការព្រំដែន បដិសេធព័ត៌មានថាមានការបង្ខិតព្រំដែនវៀតណាមចូលកម្ពុជា
គណៈកម្មាធិការចម្រុះកិច្ចការព្រំដែន នៅថ្ងៃសុក្រ បានចេញមុខមកបដិសេធជាដាច់អហង្ការចំពោះការចោទប្រកាន់របស់ក្រុមប្រឆាំងពីការបង្ខិតព្រំដែនទឹកដីវៀតណាមចូលមកក្នុងប្រទេសកម្ពុជា។ ការច្រានចោលនេះ ធ្វើឡើងភ្លាមៗបន្ទាប់ពីក្រុមអ្នកប្រឆាំងពីក្រៅប្រទេស បានធ្វើយុទ្ធនាការផ្សព្វផ្សាយឡើងវិញ នូវបណ្តាវីដេអូឯកសារបញ្ហាព្រំដែនរវាងកម្ពុជា-វៀតណាម ដោយដាក់ខ្លឹមសារថា «វៀតណាមបានបង្ខិតបង្គោលព្រំដែនចូលទឹកដីកម្ពុជា»។
ចុះផ្សាយនៅថ្ងៃ៖
ស្តាប់ - ០២:១៧
ដោយយល់ថា ជាចេតនាបង្កើតរឿងប្រឌិត និងផ្សព្វផ្សាយព័ត៌មានក្លែងក្លាយ ក្នុងគោលដៅញុះញង់ប្រជាពលរដ្ឋក្នុងកំឡុងពេលជិតបោះឆ្នោតនេះ គណៈកម្មាធិការចម្រុះកិច្ចការព្រំដែន បានសម្រេចចេញសេចក្តីថ្លែងការណ៍បដិសេធទាំងស្រុងចំពោះការចោទប្រកាន់គ្មានមូលដ្ឋាន មកលើការងារព្រំដែនរបស់រដ្ឋាភិបាលកម្ពុជា អំពីការបាត់បង់ទឹកដី និងការរំលោភបំពានពីប្រទេសជិតខាង ជាពិសេសបញ្ហាព្រំដែនកម្ពុជា-វៀតណាម។
បើតាមសេចក្តីថ្លែងការណ៍ គឺកិច្ចការងារខណ្ឌសីមា និងបោះបង្គោលព្រំដែនរវាងកម្ពុជា-វៀតណាម បានធ្វើឡើងយ៉ាងត្រឹមត្រូវ ម៉ត់ចត់ និងច្បាស់លាស់បំផុត ដើម្បីរក្សាបានផ្ទៃក្រឡាដីកម្ពុជា ១៨១ ០៣៥គីឡូម៉ែត្រក្រឡា ដោយបានកំណត់ក្នុងរដ្ឋធម្មនុញ្ញកម្ពុជា។
គួរកត់សម្គាល់ថា ការចេញមកបដិសេធរបស់គណៈកម្មាធិការជំនាញព្រំដែននេះ ធ្វើឡើងបន្ទាប់ក្រុមអ្នកនយោបាយនៅក្រៅប្រទេស បាននិងកំពុងផ្សព្វផ្សាយព័ត៌មានអំពីបញ្ហាព្រំដែនកម្ពុជា-វៀតណាម នាអំឡុងពេលដែលកម្ពុជាកំពុងធ្វើយុទ្ធនាការឃោសនាស្វែងរកសំឡេងគាំទ្ររបស់គណបក្សនយោបាយ និងកំពុងឈានទៅរកការបោះឆ្នោតជ្រើសតាំងតំណាងរាស្ត្រនីតិកាលទី៧ នៅថ្ងៃទី២៣កក្កដាខាងមុខនេះ។ បញ្ហានេះ គណៈកម្មាធិការចម្រុះកិច្ចការព្រំដែន បានស្នើឲ្យប្រជាពលរដ្ឋ កុំមានការយល់ច្រឡំ និងចែកចាយព័ត៌មានទាំងនោះជាបន្ត ដែលអាចនាំឲ្យមានបញ្ហាប្រឈមចំពោះមុខច្បាប់។
បញ្ហាព្រំដែនកម្ពុជា-វៀតណាម នេះក៏ត្រូវបានអាជ្ញាធរខេត្តត្បូងឃ្មុំ ចាត់ទុកការចុះផ្សាយព័ត៌មានមិនពិតរបស់ទូរទស្សន៍ព្រះអាទិត្យកម្ពុជាបែបនេះថា ជាការភន់ច្រឡំទៅដល់សាធារណជន និងបង្កឱ្យជះផលប៉ះពាល់ដល់អធិបតេយ្យភាព និងបូរណភាពទឹកដីនៅតាមតំបន់ព្រំដែន។ អាជ្ញាធរខេត្តបានធ្វើការដើរល្បាតត្រួតពិនិត្យនៅតាមខ្សែបន្ទាត់ព្រំដែន ជាឯកតោភាគីជាប់ជាប្រចាំ ក៏ដូចជាដាក់ចេញនូវវិធានការទប់ស្កាត់បទល្មើសគ្រប់ប្រភេទ ពិសេសការលួចនាំមនុស្សឆ្លងដែនខុសច្បាប់ជាដើម។ នេះបើតាមសេចក្តីបំភ្លឺព័ត៌មានរបស់ស្នងការនគរបាលខេត្តត្បូងឃ្មុំ។
សូមបញ្ជាក់ថា បញ្ហាព្រំដែនរវាងកម្ពុជា-វៀតណាម បានដោះស្រាយបានចំនួន៨៤% ខណៈដែល១៦%ដែលសេសសល់នៅជាប់គាំង ហើយគណៈកម្មការចម្រុះព្រំដែននៃប្រទេសទាំងពីរនៅបន្តចរចាប្រកបដោយសុឆន្ទៈបន្ថែមទៀត។ នេះបើតាមលោកស្រី កុយ ពិសី អនុប្រធានលេខាធិការដ្ឋានអចិន្ត្រៃយ៍ នៃអាជ្ញាធរជាតិទទួលបន្ទុកកិច្ចការព្រំដែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ