ទំហំពាណិជ្ជកម្មកម្ពុជាជាមួយប្រទេសសំខាន់ៗថយចុះនៅរយៈពេល៦ខែដើមឆ្នាំនេះ
ពាណិជ្ជកម្មទ្វេភាគីកម្ពុជាជាមួយប្រទេសសំខាន់ៗរយៈពេល៦ខែ មានទំហំប្រមាណ២៣.៧ពាន់លានដុល្លារ ថយចុះ១៣ភាគរយធៀបនឹងរយៈពេលដូចគ្នាកាលពីឆ្នាំ២០២២ ដែលមានទំហំ២៧.២ពាន់លានដុល្លារ។ ខណៈការនាំចូលទំនិញពីប្រទេសសំខាន់ៗថយចុះ ២២.៩ភាគរយ ប៉ុន្តែការនាំចេញរបស់កម្ពុជាកើនឡើង ០.៨ភាគរយ។ ដោយឡែក៦ខែក្នុងឆ្នាំ២០២៣នេះ កម្ពុជាបន្តស្គាល់កំណើនពាណិជ្ជកម្មជាមួយចិន(២.៨%) តែផ្ទុយទៅវិញក្នុងរយៈពេលដូចគ្នាទំហំពាណិជ្ជកម្មរវាងកម្ពុជានិងអាមេរិកបានធាក់ថយក្រោយ(-៩.៦%)។
ចុះផ្សាយនៅថ្ងៃ៖
ស្តាប់ - ០២:៥១
ប្រទេសចំនួន២០មានឈ្មោះក្នុងរបាយការណ៍ពាណិជ្ជកម្មបណ្តោះអាសន្នរបស់អគ្គនាយករដ្ឋានគយនិងរដ្ឋាករកម្ពុជាដូចជាៈ ចិន អាមេរិក វៀតណាម ថៃ ជប៉ុន សិង្ហបុរី ឥណ្ឌូណេស៊ី អាល្លឹម៉ង់ កាណាដា ជាដើម។ ប្រទេសចិនឈរនៅលេខរៀងទី១នាំមុខគេក្នុងការធ្វើជាពាណិជ្ជកម្មជាមួយប្រទេសកម្ពុជា តាមពីក្រោយអាមេរិក ខណៈវៀតណាមឈរនៅលេខទី៣ ថៃលេខរៀងទី៤ និងជប៉ុនឈរលំដាប់រៀងទី៥។
ជាក់ស្ដែងចិននាំចូលកម្ពុជាក្នុងទំហំទឹកប្រាក់ជាង៥ពាន់លានដុល្លា(៥,៤៤០,០៦៨) ខណៈកម្ពុជានាំទៅចិនក្នុងទំហំទឹកប្រាក់៧០០លានដុល្លា(៧១៣,២៧៦)។ អាមេរិកនាំចូលកម្ពុជាក្នុងទំហំទឹកប្រាក់ជាង១០០លានដុល្លា(១១៩,៥២១)ខណៈការនាំចេញពីកម្ពុជាទៅវិញក្នុងទំហំទឹកប្រាក់ជាង៤ពាន់លានដុល្លា(៤,២៣៦,០៩៩)។ វៀតណាមនាំចូលកម្ពុជាក្នុងទំហំទឹកប្រាក់ជាង១៨០០លានដុល្លា(១,៨៧២,៦៦២) ខណៈការនាំចេញក្នុងទំហំទឹកប្រាក់ជាង១៤០០លានដុល្លា(១,៤២៩,៦០៩)។ ថៃនាំចូលកម្ពុជាក្នុងទំហំទឹកប្រាក់ជាង១៤០០លានដុល្លា(១,៤៤៧,៧៧៥)ខណៈការនាំចេញក្នុងទំហំទឹកប្រាក់ជាង៥០០លានដុល្លា(៥២៧,៨៨៦)។ ជប៉ុននាំចូលក្នុងទំហំទឹកប្រាក់៣០០លានដុល្លា(៣១៥,២៦៥)ខណៈការនាំចេញក្នុងទំហំទឹកប្រាក់៥០០លានដុល្លា(៥៤៥,០១១)។
គួរជម្រាបជូនថា ប្រទេសចិននៅតែនាំគេក្នុងធ្វើពាណិជ្ជកម្មជាមួយកម្ពុជា។ តួយ៉ាងក្នុងឆ្នាំ២០២២ប្រទេសចិនបានបន្តឈរលើកំពូលតារាងជាប្រទេសដែលមានទំហំពាណិជ្ជកម្មទ្វេភាគីជាមួយកម្ពុជាច្រើនជាងគេក្នុងទំហំទឹកប្រាក់ជាង ១១,៦៨ ពាន់លានដុល្លារកើនជាង ៤ ភាគរយបើធៀបឆ្នាំ ២០២១ ហើយចំនួនទឹកប្រាក់ដែលចិននាំទំនិញមកកម្ពុជាបានគ្របដណ្តប់ដល់ជិត ៩០ ភាគរយនៃទំហំពាណិជ្ជកម្មសរុប។
ជាមួយអាមេរិកវិញកម្ពុជាអះអាងថា ប្រទេសមហាអំណាចមួយនេះជាដៃគូពាណិជ្ជកម្មធំជាងគេលំដាប់ទី២តែសហរដ្ឋអាមេរិកជាទីផ្សារនាំចេញធំជាងគេបង្អស់របស់កម្ពុជា ហើយពាណិជ្ជកម្មទ្វេភាគីក្នុងឆ្នាំ២០២២មានចំនួន៩ ២៨១លានដុល្លារនិងឆ្នាំ២០២១មានចំនួន៧ ៤៩០លានដុល្លារ។
បើតាមអ្នកសេដ្ឋកិច្ចការធ្វើពាណិជ្ជកម្មរវាងកម្ពុជានិងអាមេរិកថយចុះមិនមែនហេតុផលនយោបាយឬក៏មិនមែនដោយសារអាមេរិករងចាំមើលដំណើរការបោះឆ្នោតនោះឡើយ។ តែអាចដោយសារភាពជាប់គាំងនៃសេដ្ឋកិច្ចអាមេរិកខ្លួនឯង ព្រោះតាំងតែពីចុងឆ្នាំ២០២២មក សហរដ្ឋអាមេរិកបានធ្វើគោលនយោបាយដំឡើងការប្រាក់ក្នុងប្រទេស ដើម្បីបង្កើនប្រាក់សន្សំដែលបង្ខំឲ្យពលរដ្ឋអាមេរិកកាត់បន្ថយការចំណាយ។ដូច្នេះហើយអាមេរិកក៏កាត់បន្ថយការនាំចូលពីប្រទេសផ្សេងៗ។ វិបត្តិសង្គ្រាមនៅអ៊ុយក្រែនក៏រាប់បញ្ចូលផងដែរថា ជាហេតុធ្វើសេដ្ឋកិច្ចលើសកលលោកជាប់គាំង។ នេះបើតាមលោកបណ្ឌិត គី សេរីវឌ្ឍ អ្នកស្រាវជ្រាវសេដ្ឋកិច្ចនៅកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ