គណបក្សភ្លើងទៀន៖ ការចាប់ឃុំខ្លួនសមាជិក២នាក់ទៀតរបស់បក្សនេះធ្វើឡើងដោយអយុត្តិធម៌
គណបក្សភ្លើងទៀនបានចេញសេចក្តីថ្លែងការណ៍មួយនៅថ្ងៃអាទិត្យម្សិលមិញ ដោយអំពាវនាវឲ្យដោះលែងសមាជិក២នាក់ដែលត្រូវបានចាប់ខ្លួនក្រោមការចោទប្រកាន់ថា«ញុះញង់ឲ្យពលរដ្ឋគូសសន្លឹកឆ្នោតចោល»។ គណបក្សជំទាស់នេះ ចាត់ទុកការចាប់ឃុំខ្លួនសមាជិក២នាក់ទៀតរបស់បក្សនេះថាធ្វើឡើងដោយអយុត្តិធម៌ ខណៈគណបក្សមិនត្រូវបានអនុញ្ញាតឲ្យចូលរួមប្រកួតផងនោះ។
ចុះផ្សាយនៅថ្ងៃ៖
ស្តាប់ - ០១:៣២
គណបក្សភ្លើងទៀនបានកត់សំគាល់នៅក្នុងសេចក្តីថ្លែងការណ៍របស់ខ្លួននៅថ្ងៃទី១៦កក្កដាថា បើទោះបីជាគណបក្សនេះមិនត្រូវបានអនុញ្ញាតឲ្យចូលរួមបោះឆ្នោតក៏ដោយ ក៏សកម្មជន និងថ្នាក់ដឹកនាំមួយចំនួននៅតែបន្តរងការគៀបសង្កត់ ការគំរាមកំហែង ក្នុងការធ្វើសកម្មភាពស្របច្បាប់ និងរដ្ឋធម្មនុញ្ញ។
ការកត់សំគាល់នេះធ្វើឲ្យភ្ជាប់នឹងការអំពាវនាវឲ្យដោះលែងសមាជិក២នាក់ដែលត្រូវបានចាប់ខ្លួននៅថ្ងៃ១៤កក្កដា ក្រោមការចោទប្រកាន់ថា«ញុះញង់ឲ្យពលរដ្ឋគូសសន្លឹកឆ្នោតចោល»។
មន្ត្រីជាន់ខ្ពស់គណបក្សភ្លើងទៀន២រូបនេះ ដែលត្រូវបានចាប់ខ្លួននោះ គឺលោក លី រី ជាសមាជិកគណកម្មាធិការនាយក និង លោក ប៊ុន ខេត ជាប្រធានស្តីទីប្រតិបត្តិ រាជធានីភ្នំពេញ នៃគណបក្សភ្លើងទៀន។ លោក ប៊ុន ខេត បានចេញវីដេអូសុំទោស លោក ហ៊ុន សែន និងទម្លាក់កំហុសដាក់លោក សម រង្ស៊ី ខណៈតុលាការសម្រេចឃុំខ្លួនក្រោមបទចោទប្រកាន់«ញង់ញង់បង្កភាពវិកវរធ្ងន់ធ្ងរ ដល់សន្ដិសុខសង្គម»។
លោក ហ៊ុន សែន តាមរយៈតេឡេក្រាម បានចោទសួរទៅគណបក្សភ្លើងទៀនថាត្រូវទទួលខុសត្រូវបែបណាលើរឿងនេះ ខណៈសមាជិកដែលប្រព្រឹត្តខុសទើបបញ្ជាក់ពីការធ្វើខុសរបស់ខ្លួនដែលក្នុងនោះមានទាំងបញ្ជាក់ពីការធ្វើតាមបទបញ្ជារបស់លោក សម រង្ស៊ី ផងនោះ។
លោក សម រង្ស៊ី ដែលជាអ្នកជំរុញឲ្យពលរដ្ឋគូសសន្លឹកឆ្នោតចោល បានអះអាងថា ការខ្វែងចោលសន្លឹកឆ្នោតចោលនៅថ្ងៃ ២៣ កក្កដា ដើម្បីប្រឆាំងរបបផ្តាច់ការ ដែលរារាំងមិនឲ្យគណបក្សភ្លើងទៀន ចូលរួមក្នុងការបោះឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ