មន្រ្តីបក្សភ្លើងទៀនចំនួន២រូបទៀតត្រូវចាប់ខ្លួនក្រោមបទចោទបង្កចលាចលដល់ការបោះឆ្នោត
មន្រ្តីគណបក្សភ្លើងទៀនចំនួន ២រូបទៀត ត្រូវបានចាប់ខ្លួននៅរសៀលថ្ងៃទី១៧ ខែកក្កដា ក្រោមបទចោទប្រកាន់ថា បង្កចលាចលដល់ការបោះឆ្នោត។ ការចាប់ខ្លួននេះ រំលងតែមួយថ្ងៃប៉ុណ្ណោះ បន្ទាប់ពីគណបក្សភ្លើងទៀនចេញសេចក្តីថ្លែងការណ៍ អំពាវនាវឲ្យដោះលែងសមាជិកចំនួន ២រូបដែលត្រូវបានចាប់ខ្លួនក្រោមការចោទប្រកាន់ថា «ញុះញង់ឲ្យពលរដ្ឋគូសសន្លឹកឆ្នោតចោល»។
ចុះផ្សាយនៅថ្ងៃ៖
ស្តាប់ - ០២:១៧
សមត្ថកិច្ចបានចាប់ខ្លួនមន្រ្តីគណបក្សភ្លើងទៀនចំនួន២រូបទៀត តាមដីកាបង្គាប់ឲ្យនាំខ្លួនរបស់ចៅក្រមស៊ើបសួរសាលាដំបូងរាជធានីភ្នំពេញ នៅថ្ងៃទី១៧ ខែកក្កដា ដោយចោទប្រកាន់ពួកគេថា បានបង្កឲ្យមានភាពវឹកវរធ្ងន់ធ្ងរដល់សន្តិសុខសង្គម (បង្កចលាចលដល់ការបោះឆ្នោត)។ មន្រ្តីគណបក្សភ្លើងទៀនចំនួន២រូបដែលត្រូវបានចាប់ខ្លួនទៀតនេះ មានដូចជា អ្នកស្រី វង រុន្នី ប្រធានចលនាស្ត្រីថ្នាក់ជាតិគណបក្សភ្លើងទៀន និងលោក អេង ស្រូយ ប្រធានគណៈកម្មាធិការប្រតិបត្តិខេត្តត្បូងឃ្មុំ។
ការចាប់ខ្លួនមន្រ្តីគណបក្សភ្លើងទៀនចំនួន២រូបទៀតនេះ ធ្វើឡើងក្រោយមួយថ្ងៃប៉ុណ្ណោះ បន្ទាប់ពីគណបក្សភ្លើងទៀនចេញសេចក្តីថ្លែងការណ៍ អំពាវនាវឲ្យដោះលែងសមាជិករបស់ខ្លួនចំនួន ២រូប ដែលត្រូវបានចាប់ខ្លួនក្រោមការចោទប្រកាន់ថា «ញុះញង់ឲ្យពលរដ្ឋគូសសន្លឹកឆ្នោតចោល» កាលពីពេលថ្មីៗនេះ។ គណបក្សភ្លើងទៀន ចាត់ទុកការចាប់ឃុំមន្រ្តីខ្លួននេះថាធ្វើឡើងដោយអយុត្តិធម៌ ខណៈគណបក្សមិនត្រូវបានអនុញ្ញាតឲ្យចូលរួមប្រកួតប្រជែងការបោះឆ្នោតថ្នាក់ជាតិផងនោះ។
ការចាប់ខ្លួនមន្រ្តីគណបក្សភ្លើងទៀនជាបន្តបន្ទាប់មកនេះ ត្រូវបានអ្នកវិភាគបញ្ហាសង្គម និងនយោបាយមួយចំនួនលើកឡើងថា មិនមែនជារូបភាពល្អនៅមុនការបោះឆ្នោតថ្នាក់ជាតិឡើយ ខណៈការបោះឆ្នោតនេះ បាននិងកំពុងទទួលរងនូវការរិះគន់ពីសហគមន៍អន្តរជាតិ។
សូមបញ្ជាក់ថា គិតមកទល់នឹងពេលនេះមានមន្រ្តីគណបក្សភ្លើងទៀនចំនួន ៤រូបហើយត្រូវបានចាប់ខ្លួនក្នុងនោះមាន លោក លី រី សមាជិកគណកម្មាធិការនាយក និងលោក ប៊ុន ខេត ជាប្រធានស្តីទីប្រតិបត្តិ រាជធានីភ្នំពេញ នៃគណបក្សភ្លើងទៀន ត្រូវបានតុលាការសម្រេចឃុំខ្លួនក្រោមបទចោទប្រកាន់ «ញុះញង់បង្កភាពវឹកវរធ្ងន់ធ្ងរ ដល់សន្ដិសុខសង្គម»។ ចំណែក២រូបទៀត គឺអ្នកស្រី វង រុន្នី ប្រធានចលនាស្ត្រីថ្នាក់ជាតិគណបក្សភ្លើងទៀន និងលោក អេង ស្រូយ ប្រធានគណៈកម្មាធិការប្រតិបត្តិខេត្តត្បូងឃ្មុំ ដែលទើបនឹងចាប់ខ្លួនកាលពីម្សិលមិញ។
ក្រោយពីចាប់ខ្លួនអ្នកទាំងនេះ គេកត់សម្គាល់ឃើញថា មានមួយចំនួនបានចេញវីដេអូ និងសរសេរលិខិតសុំទោសលោក ហ៊ុន សែន និងបានទម្លាក់កំហុសរបស់ខ្លួនដោយភ្ជាប់នឹងលោក សម រង្ស៊ី ទៅវិញ ជាពិសេសគឺ លោក ប៊ុន ខេត។ លោក ហ៊ុន សែន តាមរយៈតេឡេក្រាម បានចោទសួរទៅគណបក្សភ្លើងទៀនថា ត្រូវទទួលខុសត្រូវបែបណាលើរឿងនេះ ខណៈសមាជិកដែលប្រព្រឹត្តខុសទើបបញ្ជាក់ពីការធ្វើខុសរបស់ខ្លួន ដែលក្នុងនោះមានទាំងបញ្ជាក់ពីការធ្វើតាមបទបញ្ជារបស់លោក សម រង្ស៊ី ផងនោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ