គណបក្សនយោបាយទាំង១៨ បិទបញ្ចប់យុទ្ធនាការតាមទម្រង់ដដែលដូចពិធីបើក
នៅថ្ងៃទី២១ ខែកក្កដានេះ គឺជាថ្ងៃបញ្ចប់នៃយុទ្ធនាការឃោសនារកសម្លេងឆ្នោតរបស់គណបក្សនយោបាយចំនួន១៨ ដែលបានចូលរួមនៅក្នុងការបោះឆ្នោតជ្រើសតាំងតំណាងរាស្ត្រនីតិកាលទី៧។ គណបក្សមួយចំនួនបានបិទបញ្ចប់យុទ្ធនាការរបស់ខ្លួនដោយការជួបជុំនិងដង្ហែរក្បួនទ្រង់ទ្រាយធំ ដូចកាលពីការចាប់ផ្តើមដែរ ហើយគណបក្សក្រៅរដ្ឋាភិបាលភាគច្រើនបានបញ្ចប់ការឃោសនាក្នុងទម្រង់រូបភាពតូចតាច តាមលទ្ធភាពធនធានមនុស្ស និងហិរញ្ញវត្ថុរបស់ពួកគេ។
ចុះផ្សាយនៅថ្ងៃ៖
ស្តាប់ - ០២:៤២
មិនខុសគ្នាពីការបើកនោះទេ គណបក្សប្រជាជនកម្ពុជាប្រចាំរាជធានីភ្នំពេញបានបិទបញ្ចប់យុទ្ធនាការឃោសនារបស់ខ្លួន ដោយជួបប្រជុំគ្នាធំនៅកោះពេជ្រ ដើម្បីស្តាប់ការថ្លែងការណ៍របស់លោក ហ៊ុន ម៉ាណែត បេក្ខជននាយករដ្ឋមន្ត្រីអនាគត។ បន្ទាប់ពីនេះអ្នកគាំទ្រគណបក្សប្រជាជនបានដង្ហែរក្បួនទៅតាមខណ្ឌរៀងៗខ្លួន។ នៅតាមបណ្តាខេត្តនានា គណបក្សប្រជាជនកម្ពុជាក៏បានរៀបចំបញ្ចប់យុទ្ធនាការតាមទម្រង់ដូចគ្នាដែរ។
ជាមួយគ្នានេះ ក្រោមដំណក់ភ្លៀងនាព្រឹកព្រលឹម គណបក្សរាជានិយមហ្វុនស៊ិនប៉ិច ក៏បានរៀបចំការដង្ហែរក្បួននៅថ្ងៃចុងក្រោយនេះ តាមរូបភាពទ្រង់ទ្រាយធំដែរនៅភ្នំពេញ ដែលដឹកនាំដោយព្រះអង្គម្ចាស់ នរោត្តម ចក្រាវុធ ប្រធានគណបក្ស។ ដោយឡែក គណបក្សខ្មែររួបរួមជាតិដែលដឹកនាំដោយលោក ញឹក ប៊ុនឆៃ បានផ្តោតការដង្ហែរក្បួនធំចុងក្រោយនៅខេត្តកំពង់ចាមសម្រាប់ពេលព្រឹក និងបញ្ចប់នៅរាជធានីភ្នំពេញនាពេលរសៀល ខណៈមេដឹកនាំគណបក្សប្រជាធិបតេយ្យមូលដ្ឋាន បានប្រមូលផ្តុំគ្នាជាក្រុមតូចៗ ធ្វើសេចក្តីថ្លែងការណ៍ស្តីពីគោលនយោបាយរបស់ខ្លួននៅតាមទីសាធារណៈនានា។
ចំពោះគណបក្សនយោបាយក្រៅរដ្ឋាភិបាលផ្សេងៗទៀតដូចជាគណបក្សខ្មែរតែមួយ គណបក្សសំបុកឃ្មុំសង្គមប្រជាធិបតេយ្យ គណបក្សកសិករ គណបក្សធម្មាធិបតេយ្យ គណបក្សប្រំណងពលរដ្ឋ គណបក្សយុវជនកម្ពុជា គណបក្សខ្មែរឈប់ក្រ គណបក្សស្ត្រីដើម្បីស្ត្រី និងគណបក្សមួយចំនួនទៀត គឺសុទ្ធសឹងតែធ្វើការឃោសនាតាមរូបភាពតូចៗ ក្នុងនោះមានការជិះរថយន្ត និងម៉ូតូ នៅតាមបណ្តាខេត្តរាជធានី ចែកខិតប័ណ្ណគោលនយោបាយគណបក្សដល់ពលរដ្ឋនៅតាមគេហដ្ឋាន កន្លែងប្រកបអាជីវកម្ម នៅតាមទីប្រជុំជននានាចាប់តាំងពីខេត្តរាជធានីរហូតដល់ស្រុកភូមិចុងកាត់មាត់ញ៉ក។
សូមបញ្ជាក់ថា អស់រយៈពេល២០ថ្ងៃកន្លងទៅនេះ គណបក្សនយោបាយទាំង១៨ បានបើកយុទ្ធនាការស្វែងរកសម្លេងឆ្នោតតាមលទ្ធភាព និងមធ្យោបាយរៀងៗខ្លួន។ គណៈកម្មាធិការជាតិរៀបចំការបោះឆ្នោតបានវាយតម្លៃថា បរិយាកាសទូទៅនៃយុទ្ធនាការឃោសនាបោះឆ្នោតបានប្រព្រឹត្តទៅល្អ ខណៈអ្នកតាមដានសង្គមមួយចំនួនយល់ឃើញថា ការឃោសនារបស់គណបក្សនយោបាយពេលនេះ មិនសូវមានការចាប់អារម្មណ៍ ក៏ព្រោះតែការបោះឆ្នោតពេលនេះ មិនមានគូប្រជែងស្រួចស្រាល់។ សូមបញ្ជាក់ដែរថា ក្រោយបញ្ចប់យុទ្ធនាការនៅថ្ងៃសុក្រនេះ ថ្ងៃទី២២ ខែកក្កដាស្អែក គឺជាថ្ងៃស្ងប់ស្ងាត់ ឬថ្ងៃស ដោយប្រជាពលរដ្ឋត្រៀមលក្ខណៈចេញទៅបោះឆ្នោតជ្រើសតាំងតំណាងរាស្ត្រនីតិកាលទី៧ នៅថ្ងៃអាទិត្យទី២៣ ខែកក្កដាខាងមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ