លោក ហ៊ុន សែន ប្រាប់បណ្តាញផ្សព្វផ្សាយរបស់ចិនថា មួយខែទៀតលោកនឹងអស់អំណាច
ការប្រកាសអស់អំណាចរបស់លោក ហ៊ុន សែន ត្រូវបានលើកឡើងនៅក្នុងបទសម្ភាសមួយដែលចុះផ្សាយនៅថ្ងៃទី២០កក្កដា ថ្មីៗនេះ ដោយទូរទស្សន៍រដ្ឋរបស់ចិនឈ្មោះថា Phoenix TV។ បន្ទាប់ពីកាន់អំណាចជិត៤០ឆ្នាំ នាយករដ្ឋមន្ត្រីយូរជាងគេរូបនេះ ឆ្លើយតបនឹងសំណួររបស់ស្ត្រីជាអ្នកសារព័ត៌មាននោះថា លោក ហ៊ុន ម៉ាណែត កូនប្រុសរបស់លោក អាចក្លាយជានាយករដ្ឋមន្ត្រី ដែលនៅសល់ពេលតែ១ខែទៀតប៉ុណ្ណោះ។
ចុះផ្សាយនៅថ្ងៃ៖
ស្តាប់ - ០២:៣៤
លោកនាយករដ្ឋមន្ត្រី ហ៊ុន សែន ដែលកាន់អំណាច ៣៨ឆ្នាំមកហើយ អះអាងថាកូនប្រុសច្បងរបស់លោក គឺលោក ហ៊ុន ម៉ាណែត ដែលជាបេក្ខភាពនាយករដ្ឋមន្រ្តីរបស់គណបក្សកាន់អំណាច អាចក្លាយជានាយករដ្ឋមន្ត្រីភ្លាមៗ ខណៈលោកគូសបញ្ជាក់ថា បេក្ខជននាយករដ្ឋមន្ត្រីគណបក្សប្រជាជនកម្ពុជាមានដល់ទៅ២រូប។ ២រូបគឺលោក ហ៊ុន សែន ជានាយករដ្ឋមន្ត្រីស្រាប់ និងលោក ហ៊ុន ម៉ាណែត ជាបេក្ខជននាយករដ្ឋមន្ត្រីអនាគត។
នៅក្នុងបទសម្ភាសន៍ទូរទស្សន៍រដ្ឋរបស់ចិនឈ្មោះថា Phoenix TV លោក ហ៊ុន សែន ថ្លែងថា៖ ចាំមើលប្រជាជនចេញទៅបោះឆ្នោតប៉ុន្មាននាក់។ ហើយថាមិនត្រូវនៅត្រឹមតែបីបួនអាទិត្យទៀត លោក ហ៊ុន ម៉ាណែត អាចក្លាយទៅជានាយករដ្ឋមន្ត្រី ក៏ថាបាន ខណៈលោកជឿថា កូនប្រុសច្បងរបស់លោករូបនេះ មានលទ្ធភាពខ្ពស់ជាងនេះ។
លោក ហ៊ុន សែន អះអាងថា លោកគឺជាអ្នកលះបង់ធំជាងគេ ដោយសារតែពេលនេះលោកកំពុងមានអំណាចពេញដៃ ប៉ុន្តែត្រូវលះបង់អំណាច ដើម្បីសន្តិភាពប្រទេស មិនមែនលះបង់អំណាចដើម្បីកូនរបស់លោកនោះទេ។ ជាមួយនឹងការអះអាងថាលោក ហ៊ុន ម៉ាណែត នឹងបម្រើប្រជាជនល្អជាងឳពុករបស់ខ្លួននោះ លោក ហ៊ុន សែន ចំអកឱ្យអ្នកទិតៀនបង្កើនការទិតៀនថែមទៀត។
ការបង្ហើបពីការចូលកាន់តំណែងជានាយករដ្ឋមន្ត្រីរបស់លោក ហ៊ុន ម៉ាណែត ពីសំណាក់លោក ហ៊ុន សែន គឺស្របពេលដែលកន្លងមកនេះមានការបញ្ចេញលខិតព្រាងសមាសភាពគណៈរដ្ឋមន្ត្រីបន្តវេនក្រោយការបោះឆ្នោតថ្ងៃទី២៣កក្កដា។ តាមលិខិតដែលត្រូវបានការសម្រួលជាលើកចុងក្រោយបំផុតនៅអំឡុងខែកុម្ភៈ២០២៣នោះ គឺបង្ហាញថា លោក ហ៊ុន ម៉ាណែត ជានាយករដ្ឋមន្ត្រី អមដោយឧបនាយករដ្ឋមន្ត្រីចំនួន១០រូប ដូចជា លោក នេត សាវឿន លោក ស សុខា កាន់ក្រសួងមហាផ្ទៃ លោក ទៀ សីហា កាន់ក្រសួងការពារជាតិ លោក កើត រិទ្ធិ នៅក្រសួងយុត្តិធម៌ដដែល លោក សាយ សំអាល់ ទៅកាន់ក្រសួងដែនដី ។
ដោយឡែក ក៏មានរដ្ឋមន្ត្រីខ្លះដូចជា លោក ស៊ុន ចាន់ថុន ត្រូវដំឡើងជាឧបនាយករដ្ឋមន្ត្រីតែមិនកាន់ក្រសួងណាមួយនោះទេ។ ចំណែក លោក អ៊ូន ព័ន្ធមុនីរ័ត្ន នៅកាន់ក្រសួងសេដ្ឋកិច្ចដដែល ខណៈលោក ហង់ ជួនណារ៉ុន ក៏ត្រូវតំឡើងជាឧបនាយករដ្ឋមន្ត្រីបន្តកាន់ក្រសួអប់រំ។
លើសពីនេះ លោក សុខ ចិន្តាសោភា ទៅកាន់ក្រសួងការបរទេស ហើយលោក វង្សី វិសុទ្ធ ទៅកាន់ទីស្តីការគណៈរដ្ឋមន្ត្រី ដោយដំឡើងជាឧបនាយករដ្ឋមន្ត្រី។
តាមបញ្ជីសមាសភាពគណៈរដ្ឋមន្ត្រីថ្មីនោះ គឺមានរដ្ឋមន្ត្រីនៅតាមក្រសួងនិងរដ្ឋលេខាធិការដ្ឋានសរុបចំនួន៣០ ហើយស្ទើរតែទាំងអស់ គឺជារដ្ឋមន្ត្រីថ្មី ក្នុងនោះនៅសល់រដ្ឋមន្ត្រីចាស់តែ៩ក្រសួងប៉ុណ្ណោះ ខណៈលោក ហ៊ុន ម៉ានី ទៅកាន់ក្រសួងមុខងាសាធារណៈ។
ទោះជាយ៉ាងណា លោក សុខ ឥសាន អ្នកនាំពាក្យគណបក្សប្រជាជនកម្ពុជាអះអាងថា បញ្ជីឈ្មោះរដ្ឋមន្ត្រីថ្មីទាំងនោះមិនទាន់ចាត់ទុកជាផ្លូវការនៅឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ