ពលរដ្ឋខ្មែរសម្រុកទៅបោះឆ្នោតកកកុញនៅពេលព្រឹក ហើយថមថយនៅថ្ងៃត្រង់
នៅក្នុងឱកាសនៃការបោះឆ្នោតជ្រើសតាំងតំណាងរាស្ត្រនីតិកាលទី៧នាថ្ងៃទី២៣ ខែកក្កដានេះ មនុស្សម្នាបាននាំគ្នាសម្រុកទៅកាន់ការរិយាល័យបោះឆ្នោតចាប់តាំងពីការរិយាល័យបើកដំណើរការគ្រប់ទីកន្លែងនៃប្រទេសកម្ពុជានៅម៉ោង៧ព្រឹក។ មិនខុសគ្នាពីការបោះឆ្នោតមុនៗទេ ការដែលប្រជែងគ្នារហូតដល់ស្ទះផ្លូវជាអន្លើនោះ ក៏ព្រោះតែភាគច្រើនយល់ថាយកពេលសម្រាក និងដើរកម្សាន្តនៅពេលរសៀល ហើយខ្លះទៀត ហាក់បង្ហាញថាវត្តមាននៃការទៅបោះឆ្នោត គឺជាការចាំបាច់បំផុត។
ចុះផ្សាយនៅថ្ងៃ៖
ស្តាប់ - ០២:០៦
ចរាចណ៍នៅតំបន់ដែលមានមណ្ឌលបោះឆ្នោតបានកកស្ទះនាពេលព្រឹកព្រលឹមជាអន្លើ ប្រជាពលរដ្ឋដែលគ្រប់អាយុបោះឆ្នោតបានចេញពីលំនៅដ្ឋានទៅកាន់មណ្ឌលបោះឆ្នោត ដែលរៀបចំឡើងនៅតាមភូមិឃុំរបស់ពួកគេរស់នៅ ក្នុងនោះមានវត្តអារាម សាលារៀន និងទីតាំងសាធារណៈដែលបោះតង់លើកំណាត់ផ្លូវ ឬសួនច្បារសាធារណៈផងដែរ។
ស្ទើរគ្រប់មណ្ឌលបោះឆ្នោតទាំងអស់ ត្រូវគេរាយការណ៍ស្រដៀងៗគ្នាថា មានប្រជាជនសម្រុកទៅបោះឆ្នោតដំណាលគ្នាជាពិសេសអំឡុងពេលពីពីរ ទៅបីម៉ោងព្រឹក ដោយពួកគេកាន់ឯកសារចាំបាច់នៅនឹងដៃ ក្នុងនោះរួមមានអត្តសញ្ញាណប័ណ្ណ និងលិខិតបញ្ជាក់ពីអាជ្ញាធរដែលអាចបោះឆ្នោតបាន។
ជាការកត់សម្គាល់ការិយាល័យបោះឆ្នោតនីមួយៗ ត្រូវបានទទួលរ៉ាក់ទាក់ពីមន្ត្រីប្រចាំការ ក្រោមការការពារសន្តិសុខយ៉ាងម៉ត់ចត់ និងសម្រួលឲ្យមានការបោះឆ្នោតបានលឿន ហើយមិនសូវមានការរាំងស្ទះបើទោះណាជាការិយាល័យខ្លះត្រូវតម្រង់ជួរវែងយ៉ាងណាក៏ដោយ។
ក្រៅពីការហាមថតរូបភាព និងវីដេអូនៅក្នុងការរិយាល័យបោះឆ្នោត អ្នកបោះឆ្នោតជាច្រើនបាននាំគ្នាថតម្រាមដៃរបស់ខ្លួនដោយម្នាក់ឯង ឬជាក្រុម ដើម្បីទុកជាភស្តុតាងថាពួកគេបានទៅបោះឆ្នោត ហើយអ្នកខ្លះទៀតដែលជាមន្ត្រីរាជការ បានចាត់ទុកការថតចុងម្រាមដៃជ្រលក់ទឹកខ្មៅក្រោយការបោះឆ្នោតថាជារឿងសំខាន់បំផុត ខណៈអ្នកបោះឆ្នោតរួចភាគច្រើនបានបង្ហាញមា្រដៃជ្រលក់ទឹកខ្មៅរបស់ខ្លួនតាមហ្វេសប៊ុក។
ទោះជាមានភាពចម្រូងចម្រាសនយោបាយមុនការបោះឆ្នោត ដែលគណបក្សកាន់អំណាច និងគណៈកម្មាធិការជាតិរៀបចំការបោះឆ្នោត(គ.ជ.ប) បានប្រទាញប្រទង់គ្នាជាមួយសកម្មជនប្រឆាំងខាងក្រៅប្រទេស ពិសេសលោក សម រង្ស៊ី ក៏ដោយ ក៏ប៉ុន្តែអ្នកទៅបោះឆ្នោតហាក់បង្ហាញនូវទឹកមុខរីករាយនៅមណ្ឌលបោះឆ្នោត ក៏មានផងដែរការខ្សឹបសខ្សៀវគ្នាមួយចំនួនដែរ ក្រោយពេលដែលពលរដ្ឋខ្លះបានបោះឆ្នោតហើយ។
ទោះយ៉ាងណា ការបោះឆ្នោតដែលត្រូវបិទការិយាល័យនៅម៉ោង៣រសៀល បានថមថយអ្នកបោះឆ្នោតចាប់តាំងពីថ្ងៃត្រង់ទៅ ដែលស្ថានភាពនេះមិនខុសពីការបោះឆ្នោតមុនៗទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ