អ្នកសង្កេតការណ៍អន្តរជាតិ៖ ការបោះឆ្នោតនៅកម្ពុជាមានភាព សេរី យុត្តិធម៌ និងមានសន្តិភាពរឹងមាំ
ក្រុមអ្នកសង្កេតការណ៍អន្តរជាតិមួយចំនួនចាត់ទុកការបោះឆ្នោតថ្នាក់ជាតិនៅកម្ពុជាថា មានភាពសេរី យុត្តិធម៌ និងអាចជឿទុកចិត្តបាន។ ទុកចិត្តបាន បើតាមក្រុមអ្នកមកសង្កេតការណ៍អន្តរជាតិទាំងនោះ ដំណើរការបោះឆ្នោតនៅកម្ពុជាកាលពីថ្ងៃទី២៣ កក្កដា ប្រព្រឹត្តិទៅដោយរលូន គ្មានបាតុភាពហិង្សា គ្មានការគំរាមកំហែង និងការបង្ខិតបង្ខំណាមួយកើតឡើងឡើយ។
ចុះផ្សាយនៅថ្ងៃ៖
ស្តាប់ - ០២:២០
ក្រោយដំណើរការបោះឆ្នោតជ្រើសតាំងតំណាងរាស្ត្រនីតិកាលទី៧ត្រូវបានបិទបញ្ចប់កាលពីថ្ងៃទី២៣ កក្កដា គណៈកម្មាធិការរៀបចំការបោះឆ្នោតម៉ាល់ឌីវ និងគណៈកម្មាធិការសម្រាប់កិច្ចសហប្រតិបត្តិការយុវជនអាស៊ាន និងក្រុមប្រឹក្សាយុវជនអាស៊ានបានចេញសេចក្តីថ្លែងការណ៍វាយតម្លៃពីភាពជោគជ័យនៃការបោះឆ្នោតនៅកម្ពុជា។
ក្នុងសេចក្តីថ្លែងការណ៍របស់ក្រុមអ្នកសង្កេតការណ៍ទាំងពីរនេះមើលឃើញថា ទិដ្ឋាភាពជារួមនៃដំណើរការបោះឆ្នោតគ្រប់មណ្ឌល និងការិយាល័យបោះឆ្នោតនៅកម្ពុជា មានសភាពល្អប្រសើរ និងបានអនុលោមស្របទៅតាមប្បញ្ញត្តិច្បាប់ដែលមានចែង រួមជាមួយនឹងការធានាបាននូវភាពសម្ងាត់ និងតម្លាភាពនៃការគូសសន្លឹកឆ្នោតរបស់ម្ចាស់ឆ្នោតផង។
បន្ថែមពីនេះ ក្រុមអ្នកសង្កេតការណ៍អន្តរជាតិទាំងនេះចាត់ទុកការបោះឆ្នោតនៅកម្ពុជាសម្រាប់អាណត្តិទី៧ ប្រព្រឹត្តិទៅដោយរលូត សេរី យុត្តិធម៌ សម្ងាត់ និងគ្មានការគំរាមកំហែង ព្រមទាំងស្របតាមស្តង់ដារអន្តរជាតិ។
បើតាម គណៈកម្មាធិការរៀបចំការបោះឆ្នោតម៉ាល់ឌីវ និងគណៈកម្មាធិការសម្រាប់កិច្ចសហប្រតិបត្តិការយុវជនអាស៊ាន ការបោះឆ្នោតនៅកម្ពុជានាពេលនេះ បានបង្ហាញពីឆន្ទៈរបស់ពលរដ្ឋខ្មែរ ក្នុងការរក្សាសន្តិភាព ស្ថិរភាព រួមនឹងលទ្ធិប្រជាធិបតេយ្យក្នុងប្រទេសផង ខណៈស្ថាប័នអន្តរជាតិទាំងពីរនេះសង្កេតឃើញថា សន្ទុះនៃយុវជនកម្ពុជា ក៏មានភាពសកម្មក្នុងដំណើរការនយោបាយក្នុងរបស់ប្រទេសខ្លួនផងដែរ។
ក្រៅពីនេះ ក្រុមអ្នកសង្កេតការណ៍មកពីបណ្តាប្រទេសហ្វ្រង់កូហ្វូនី និងមកពីបណ្តាប្រទេសសហភាពអឺរ៉ុប ក៏បានវាយតម្លៃដូចគ្នាដែរថា ការបោះឆ្នោតនៅកម្ពុជាប្រព្រឹត្តិទៅប្រកបដោយតម្លាភាព សេរីប្រជាធិបតេយ្យ និងគ្មានអំពើហិង្សា។ នៅក្នុងសន្និសីតកាសែតព្រឹកថ្ងៃទី២៤ កក្កដា ក្រុមអ្នកសង្កេតការណ៍ទាំងនេះ អះអាងថា នៅតាមមណ្ឌល និងការិយាល័យបោះឆ្នោតដែលពួកគេចុះទៅអង្កេតនោះ ពុំមានបាតុភាពអ្វីកើតឡើងដែលបង្កឱ្យប៉ះពាល់ដល់ដំណើរការបោះឆ្នោតឡើយ។
សូមជម្រាបថា នៅក្នុងដំណើរការបោះឆ្នោតជ្រើសតាំងតំណាងរាស្ត្រនីតិកាលទី០៧ ឆ្នាំ២០២៣នេះ កម្ពុជាមានអ្នកសង្កេតការណ៍ជាតិចំនួនជិត៩ពាន់នាក់ ដែលមកពីសមាគម និងអង្គការមិនមែនរដ្ឋាភិបាលចំនួន១៣៤ ខណៈអ្នកសង្កេតការណ៍អន្តរជាតិវិញ មានចំនួន១៦៣រូប ដែលមកពី៥២ស្ថាប័ន។ នេះបើយោងតាមសេចក្ដីប្រកាសព័ត៌មានរបស់គជប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ