បោះឆ្នោត២០២៣៖ ក្រសួងការបរទេសកម្ពុជាលើកសរសើរ តែប្រទេសលោកខាងលិចបន្តប្រតិកម្មរិះគន់
នៅក្រោយការបោះឆ្នោតជាតិឆ្នាំ២០២៣បានបញ្ចប់ បណ្តាប្រទេសជាច្រើនរួមមាន បារាំង អង់គ្លេស អូស្ត្រាលី និងអ៊ឺរ៉ុប ជាដើម បានចាត់ទុកដំណើរការបោះឆ្នោតនៅកម្ពុជាថាបានប្រាចាកពីលទ្ធិប្រជាធិបតេយ្យ។ ជាការឆ្លើយតប ក្រសួងការបរទេសកម្ពុជានៅថ្ងៃចន្ទម្សិលមិញនេះអះអាងថា ការបោះឆ្នោតនៅកម្ពុជាកាលពីថ្ងៃទី២៤កក្កដា ឆ្លុះបញ្ជាំងយ៉ាងច្បាស់ពីភាពចាស់ទុំខាងប្រជាធិបតេយ្យរបស់កម្ពុជាទៅវិញ។
ចុះផ្សាយនៅថ្ងៃ៖
ស្តាប់ - ០៣:៤៧
បន្ទាប់ពីអាមេរិក ប្រតិកម្មសម្តែងការខកចិត្តចំពោះការបោះឆ្នោតជាតិនៅកម្ពុជាឆ្នាំ២០២៣នេះ បន្តធ្លាក់មកជាបន្តបន្ទាប់ពីបណ្តាប្រទេសលោកខាងលិចដែលរួមមាន បារាំង អង់គ្លេស អូស្រ្តាលី អាល្លឺម៉ង កាណាដា និងអ៊ឺរ៉ុបជាដើម គិតត្រឹមរសៀលថ្ងៃទី២៥ ខែកក្កដា ឆ្នាំ២០២៣។ ក្នុងសេចក្តីថ្លែងការណ៍ដែលមានខ្លឹមសារស្រដៀងៗគ្នា បណ្តាបរទេសទាំងនោះ បានចាត់ទុកការបោះឆ្នោតសភាអណត្តិទី៧នៅកម្ពុជា គឺជាការបោះឆ្នោតដែលខ្វះយុត្តិធម៌និងតម្លាភាពលើគោលការណ៍ប្រជាធិបតេយ្យ ស៊េរី ពហុបក្ស។
ក្នុងសេចក្តីថ្លែងការណ៍ ក្រសួងអ៊ឺរ៉ុបនិងការបរទេសបារាំង បានទទួលស្គាល់លទ្ធផលបោះឆ្នោតនេះ ក៏ប៉ុន្តែសោកស្តាយ ដែលសង្វៀងប្រកួតប្រជែងបោះឆ្នោត ប្រព្រឹត្តិទៅដោយគ្មានបេក្ខភាពបក្សប្រឆាំង។ ចំពោះអ៊ឺរ៉ុបនិងបារាំង អវត្តមានគណបក្សភ្លៀងទៀនបានប៉ះពាល់ដល់ការបោះឆ្នោតបែបពហុនិយម។ អ៊ឺរ៉ុបនិងបារាំងក៏បានរំព្ញកដែរថា រដ្ឋាភិបាលកម្ពុជា គួរដោះលែងអ្នកទោសនយោបាយទាំងអស់ ហើយត្រូវតែអនុលោមទៅតាមសន្ធិសញ្ញាទីក្រុងប៉ារីស ឆ្នាំ១៩៩១ និងរដ្ឋធម្មនុញ្ញកម្ពុជា ហើយស្តារសិទ្ធជាមូលដ្ឋានឡើងវិញ ជាការចាំបាច់។
ស្រដៀងគ្នានេះដែរ អូស្ត្រាលី អង់គ្លេស និងកាណាដា តាមរយៈស្ថានទូតនៅកម្ពុជា បានកត់សម្គាល់អំពីបរិយាកាស ដែលគ្មានការចូលរួមបោះឆ្នោតរបស់បក្សភ្លើងទៀន ការដាក់សម្ពាធប្រព័ន្ធផ្សព្វផ្សាយ និងសង្គមស៊ីវិលជាដើម។ ទន្ទឹមគ្នានេះ អូស្ត្រាលី អង់គ្លេស និងកាណាដា បន្តអះអាងធ្វើការជាមួយរដ្ឋាភិបាលកម្ពុជា និងគាំទ្រដល់កិច្ចខិតខំប្រឹងប្រែង ដើម្បីបង្កើនដំណើរការប្រជាធិបតេយ្យ លំហពលរដ្ឋនៅកម្ពុជា ក៏ដូចជាបន្តគាំទ្រដល់ប្រជាជនកម្ពុជា។
បន្ថែមពីការកត់សម្គាល់ដំណើរការបោះឆ្នោតនៅកម្ពុជាស្រដៀងនឹងបណ្តាបរទេសខាងលើនេះដែរ អាល្លឺម៉ង់វិញ ក៏បានស្នើឱ្យតំណាងរាស្ត្រដែលជាប់ឆ្នោតក្នុងអាណត្តិទី៧នេះ និងរដ្ឋាភិបាលកម្ពុជារៀបចំថ្មី ឱ្យដំណើរការលទ្ធិប្រជាធិបតេយ្យ សេរី ពហុបក្ស ឱ្យបានពេញលេញឡើងវិញ និងត្រូវគោរពសិទ្ធិមនុស្ស ដូចដែលបានធានាដោយរដ្ឋធម្មនុញ្ញរបស់កម្ពុជា។
ផ្ទុយពីប្រតិកម្មខាងលើ ក្រសួងការបរទេសកម្ពុជានៅថ្ងៃទី២៤ ខែកក្កដា ឆ្នាំ២០២៣ បានចេញសេចក្តីថ្លែងការណ៍លើកសរសើរថា «ការបោះឆ្នោតសកលឆ្នាំ២០២៣នៅកម្ពុជា ឆ្លុះបញ្ចាំងយ៉ាងពិតប្រាកដពីភាពចាស់ទុំខាងប្រជាធិបតេយ្យរបស់កម្ពុជា»។ ការលើកសសើរដោយយោងលើហេតុផលមួយចំនួនរួមមាន៖ អត្រាខ្ពស់នៃអ្នកចូលរួមបោះឆ្នោត បង្ហាញពីប្រជាធិបតេយ្យដ៏រស់រវើករហូតជាង ៨,២លាននាក់។ ហើយលទ្ធផលនេះ បង្ហាញពីការបដិសេធយ៉ាងច្បាស់ចំពោះការអំពាវនាវឱ្យធ្វើពហិការការបោះឆ្នោត។ ក្រសួងការបរទេសកម្ពុជា ក៏លើកឡើងអំពីការចូលរួមអង្កេតការបោះឆ្នោតជាតិនិងអន្តរជាតិ ក៏ដូចជាការគោរពតាមច្បាប់ជាធរមាន។
ជាការកត់សម្គាល់ បណ្តាប្រទេសសមាជិកអាស៊ានវិញ នៅពុំទាន់មានប្រតិកម្មយ៉ាងណានៅឡើយទេចំពោះការបោះឆ្នោតនៅកម្ពុជា គិតត្រឹមថ្ងៃទី២៥ ខែកក្កដា ឆ្នាំ២០២៣។
មិនទាន់ចេញលទ្ធផលបោះឆ្នោតផង ប្រធានាធិបតីចិន លោក ស៊ី ជិនពីង នៅថ្ងៃទី២៥ ខែកក្កដា ឆ្នាំ២០២៣ បានផ្ញើសារអបអរសាទរមកលោកនាយករដ្ឋមន្រ្តី ហ៊ុន សែន ថាគណបក្សប្រជាជនកម្ពុជាទទួលបានជ័យជំនះជាថ្មី។ តាមរយៈសារលិខិតលោក ស៊ី ជិនពីង បាននិយាយលើកតម្កើនការដឹកនាំរបស់លោក ហ៊ុន សែន ថាបាននាំឱ្យកម្ពុជាសម្រេចបាននូវស្ថិរភាពនយោបាយ សេដ្ឋកិច្ច ការអភិវឌ្ឍ ជីវភាពស្ដង់ដារ និងមានកេរ្តិ៍ឈ្មោះទាំងនៅលើឆាកអន្តរជាតិ និងក្នុងតំបន់។ មិត្តចិនក៏បានសន្យាបន្តគាំទ្រដល់កម្ពុជា ដើម្បីបន្តជំហានអភិវឌ្ឍប្រទេសដែលសក្តិសមនឹងលក្ខខណ្ឌរបស់ជាតិ។
គួររំព្ញកផងដែរថា អាមេរិកបានសម្រេចកាត់ផ្តាច់ផ្នែកខ្លះនៃជំនួយបរទេសមកកម្ពុជា និងរឹតត្បិតទិដ្ឋាការលើមន្ត្រីរដ្ឋាភិបាលមួយចំនួន ចំពោះទង្វើបំផ្លាញលទ្ធិប្រជាធិបតេយ្យ តាមរយៈការបោះឆ្នោតជាតិ អាណត្តិទី៧នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ