ឧត្តមស្នងការទទួលបន្ទុកសិទ្ធិមនុស្សចាត់ទុកការបោះឆ្នោតធ្វើឡើងក្នុងរូបភាពរឹតត្បិតដែលជះឥទ្ធិលពលដល់ការសម្រេចចិត្តរបស់ពលរដ្ឋ
សេចក្ដីថ្លែងការណ៍បង្ហាញការខកចិត្តជុំវិញដំណើរការបោះឆ្នោតនៅកម្ពុជា ពីសំណាក់សហគមន៍អន្តរជាតិនៅតែបន្តធ្លាក់មកមិនទាន់ចប់ទេ គិតមកដល់ពេលនេះ។ ជាក់ស្ដែងនៅថ្ងៃទី២៦កក្កដាម្សិលមិញ ឧត្តមស្នងការទទួលបន្ទុកសិទ្ធិមនុស្ស ចាត់ទុកការបោះឆ្នោតនៅថ្ងៃទី២៣កក្កដា ធ្វើឡើងក្នុងរូបភាពរឹតត្បិតដែលជះឥទ្ធិលពលដល់ការសម្រេចចិត្តរបស់ពលរដ្ឋ។
ចុះផ្សាយនៅថ្ងៃ៖
ស្តាប់ - ០២:៤០
នៅក្នុងសេចក្ដីប្រកាសព័ត៌មានរបស់ការិយាល័យនៃឧត្តមស្នងការទទួលបន្ទុកសិទ្ធិមនុស្សនៅថ្ងៃទី២៦កក្កដា លោក វលឃ័រ ធឹក (Volker Türk) លើកឡើងថា គ្រប់ទិដ្ឋភាពនៃដំណើរការបោះឆ្នោតមានការរឹតត្បិតយ៉ាងធ្ងន់ធ្ងរ ដែលជះឥទ្ធិពលអវិជ្ជមានដល់សិទ្ធិរបស់ប្រជាពលរដ្ឋ ក្នុងការចូលរួមឲ្យបានពេញលេញនិងស្មើភាព។ បើតាមការិយាល័យនៃឧត្តមស្នងការទទួលបន្ទុកសិទ្ធិមនុស្ស ការរឹតត្បិតអំឡុងពេលរៀបចំការបោះឆ្នោតនិងបោះឆ្នោត គណបក្សកាន់អំណាចដែលដឹកនាំរដ្ឋាភិបាលបានប្រើប្រាស់ច្បាប់រារាំងដល់ការចុះឈ្មោះនិងការចូលរួមរបស់បេក្ខជន និងគណបក្សនយោបាយ ជាពិសេសគណបក្សប្រឆាំង។
មិនត្រឹមតែបង្ហាញការខកចិត្តជុំវិញដំណើរការបោះឆ្នោតដែលគ្មានវត្តមានបក្សប្រឆាំងប៉ុណ្ណោះទេ លោកVorker Turk ក៏លើកយកក្ដីបារម្ភជុំវិញការបិទគេហទំព័រអង្គភាពសារព័ត៌មានមួយចំនួន ដែលផ្សាយពីរឿងរ៉ាវកម្ពុជាផងដែរ។ រីឯសហជីព អង្គការក្រៅរដ្ឋាភិបាល ក៏ដូចជាប្រព័ន្ធផ្សព្វផ្សាយត្រូវប្រឈមនឹងសំណុំរឿងព្រហ្មទណ្ឌ ការគំរាមកំហែង ការបំភិតបំភ័យ និងការវាយប្រហាររាងកាយ…ជាដើម។
ជុំវិញការលើកឡើងទាំងអំបាលមាណរបស់ការិយាល័យនៃឧត្តមស្នងការទទួលបន្ទុកសិទ្ធិមនុស្សត្រូវបានអ្នកនាំពាក្យគណៈកម្មាធិការសិទ្ធិមនុស្សកម្ពុជាបង្ហាញការសោកស្ដាយត្រឡប់ទៅវិញ និងបានចាត់ទុកការវាយតម្លៃអំពីដំណើរការបោះឆ្នោតនៅកម្ពុជាធ្វើឡើងដោយប្រាចាកពីគោលការណ៍សិទ្ធិមនុស្ស។ បើតាមលោក កត្តា អន ធៀបនឹងការបោះឆ្នោតអាណត្តិមុនៗអាណត្តិនេះ ការបោះឆ្នោតមានស្ថានភាពល្អ ព្រោះប្រជាជននិងគណបក្សនយោបាយបានប្រើប្រាស់សិទ្ធរបស់ខ្លួនដោយសេរី ត្រឹមត្រូវ ស្របតាមរដ្ឋធម្មនុញ្ញពោលគឺគ្មានការរឹតត្បិតនិងបង្ខិតបង្ខំឡើយ។
លោក កត្តា អន បានទទូចឲ្យប្រទេសដែលតាំងខ្លួនជាអ្នកប្រជាធិបតេយ្យសម្លឹងមើលប្រជាធិបតេយ្យក្នុងប្រទេសខ្លួននិងសម្លឹងមើលអារម្មណ៍របស់ប្រជាជនខ្លួនឯង ព្រោះប្រជាជនខ្មែរជាង៨០ភាគរយបានចេញទៅបោញឆ្នោតដោយគ្មានការរារាំង។
គួរជម្រាបជូនថា ក្រោយការបោះឆ្នោតនៅកម្ពុជាអាមេរិកនាំមុខគេក្នុងការចេញសេចក្ដីបង្ហាញការខកចិត្តហើយអាមេរិកសម្រេចផ្អាកផ្តល់ជំនួយមួយចំនួន និងរឹតត្បិតទិដ្ឋាការមន្ត្រីរដ្ឋាភិបាល ចំពោះការបោះឆ្នោតដែលគេយល់ថា មិនសេរី។ តាមពីក្រោយអាមេរិក ប្រទេសលោកខាងលិចដែលរួមមាន បារាំង អង់គ្លេស អូស្រ្តាលី អាល្លឺម៉ង កាណាដា និងអ៊ឺរ៉ុបជាដើម សេចក្តីថ្លែងការណ៍ដែលមានខ្លឹមសារស្រដៀងៗគ្នាចាត់ទុកការបោះឆ្នោតសភាអណត្តិទី៧នៅកម្ពុជា ខ្វះយុត្តិធម៌និងតម្លាភាពលើគោលការណ៍ប្រជាធិបតេយ្យ ស៊េរី ពហុបក្ស។ ចំពោះអ៊ឺរ៉ុបនិងបារាំង អវត្តមានគណបក្សភ្លើងទៀនបានប៉ះពាល់ដល់ការបោះឆ្នោតបែបពហុនិយម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ