កម្ពុជាសុំអាមេរិកផ្តល់ប្រព័ន្ធអនុគ្រោះពន្ធ GSP ឡើងវិញ ដើម្បីពង្រឹងទំនាក់ទំនងពាណិជ្ជកម្ម
ក្រសួងពាណិជ្ជកម្មកម្ពុជា បានចេញមុខស្នើសុំការផ្តល់ប្រព័ន្ធអនុគ្រោះពន្ធ GSP ឡើងវិញ បន្ទាប់ពីប្រព័ន្ធអនុគ្រោះពន្ធរបស់អាមេរិក បានអស់សុពលភាពតាំងពីដើមឆ្នាំ២០២១។ ការស្នើសុំនេះ ធ្វើឡើងដោយដ្បិតភាគីកម្ពុជាយល់ថា ជាការពង្រឹងកិច្ចសហប្រតិបត្តិការពាណិជ្ជកម្មប្រទេសទាំងពីរ ដោយផ្តល់ផលចំណេញទៅវិញទៅមក។
ចុះផ្សាយនៅថ្ងៃ៖
ស្តាប់ - ០២:៣៤
ការបោះដៃរកប្រព័ន្ធអនុគ្រោះពន្ធ GSP សហរដ្ឋអាមេរិក ពីសំណាក់កម្ពុជាពេលនេះ បានធ្វើឡើងតាមរយៈជំនួបមួយរវាងលោក ប៉ាន សូរស័ក្ត រដ្ឋមន្ត្រីក្រសួងពាណិជ្ជកម្ម និងលោក Jason Smith ប្រធានគណៈកម្មាធិការស្តីពីរបៀប និងមធ្យោបាយនៃសភាអាមេរិក នៅថ្ងៃទី២សីហា។ នេះបើតាមក្រសួងពាណិជ្ជកម្ម។ ក្រសួងពាណិជ្ជកម្មបានអះអាងថា លោក ប៉ាន សូរស័ក្ត រដ្ឋមន្ត្រីក្រសួងពាណិជ្ជកម្ម បានស្នើសុំឱ្យសភាអាមេរិកបន្តឡើងវិញនូវប្រព័ន្ធ GSP របស់ខ្លួន ជាពិសេសសម្រាប់ទំនិញមួយចំនួន ដូចជា សម្លៀកបំពាក់ ស្បែកជើង និងទំនិញធ្វើដំណើរ ជាដើម។ ការស្នើនេះ ក៏ព្រោះតែការបន្តប្រព័ន្ធអនុគ្រោះពន្ធ GSP របស់អាមេរិកឲ្យកម្ពុជាឡើងវិញ នឹងពង្រឹងកិច្ចសហប្រតិបត្តិការពាណិជ្ជកម្មរវាងកម្ពុជា-អាមេរិក។
លោក ប៉ែន សុវិជាតិ អ្នកនាំពាក្យក្រសួងពាណិជ្ជកម្ម បានបញ្ជាក់ប្រាប់វិទ្យុបារាំងអន្តរជាតិ ថា ប្រព័ន្ធអនុគ្រោះពន្ធ GSP របស់អាមេរិក បានផ្តល់ការអនុគ្រោះដល់តែការនាំចេញកាតូបធ្វើដំណើររបស់កម្ពុជាតែប៉ុណ្ណោះ។ ដោយឡែក សម្រាប់ការនាំចេញសំលៀកបំបាក់ និងស្បែកជើង ពីកម្ពុជាទៅកាន់អាមេរិក គឺធ្វើឡើងតាមរយៈការបង់ពន្ធ គិតតាមគោលការណ៍ MFN។ បើតាមអ្នកនាំពាក្យក្រសួងពាណិជ្ជកម្ម ទោះបីកន្លងមក ប្រព័ន្ធអនុគ្រោះពន្ធ GSP របស់អាមេរិក បានអស់សុពលភាព តែទំហំពាណិជ្ជកម្មរវាងកម្ពុជានិងអាមេរិក នៅតែមានការកើនឡើងគួរឲ្យកត់សម្គាល់។
គួរបញ្ជាក់ថា ប្រព័ន្ធអនុគ្រោះពន្ធ GSP របស់អាមេរិក បានអស់សុពលភាពតាំងពីចុងឆ្នាំ២០២០ ក្រោយពេលដែលសភាអាមេរិកមិនបានអនុម័តបន្ត។ លោក ប៉ែន សុវិជាតិ បញ្ជាក់ថា ករណីនេះភាគីកម្ពុជា និងបណ្តាប្រទេសមួយចំនួនទៀត ក៏ធ្លាប់ស្នើឲ្យភាគីអាមេរិកបន្តប្រព័ន្ធអនុគ្រោះពន្ធនេះឡើងវិញ តែជាសិទ្ធិសម្រេចរបស់អាមេរិកដោយផ្ទាល់។ បើតាមអ្នកនាំពាក្យក្រសួងពាណិជ្ជកម្ម កម្ពុជាក៏មិនរំពឹងពេកដែរ ថាអាមេរិកនឹងអាចផ្តល់ប្រព័ន្ធអនុគ្រោះពន្ធ GSP ឡើងវិញ ខណៈដែលបច្ចុប្បន្នកម្ពុជាបាននិងកំពុងត្រៀមប្រែខ្លួនពីប្រទេសអភិវឌ្ឍតិចតួច ទៅជាប្រទេសកំពុងអភិវឌ្ឍក្នុងពេលខាងមុខ។ ម្យ៉ាងវិញទៀត ក្នុងដៃកម្ពុជាបច្ចុប្បន្ន ក៏មានកិច្ចព្រមព្រៀងពាណិជ្ជកម្មសេរីមួយចំនួនប្រទេសមួយចំនួន ហើយកិច្ចព្រមព្រៀងភាពជាដៃគូសេដ្ឋកិច្ចគ្រប់ជ្រុងជ្រោយ RCEP ជាដើម។
សូមរំលឹកថា ក្នុងឆ្នាំ២០២២កន្លងទៅ ទំហំពាណិជ្ជកម្មទ្វេភាគីកម្ពុជា-អាមេរិក មានទំហំជាង ៩,២៨១ ពាន់លានដុល្លារ កើនឡើង ១៨,៦ ភាគរយបើធៀបឆ្នាំ ២០២១។ ការនាំចេញរបស់កម្ពុជា មានទឹកប្រាក់ជិត ៨,៩៦៩ ពាន់លានដុល្លារ កើនឡើង ១៩,៧ ភាគរយ និងនាំចូលមានចំនួនជាង ៣១២ លានដុល្លារ ធ្លាក់ចុះ ៧,១ ភាគរយ។ នេះបើតាមអគ្គនាយកដ្ឋានគយ និងរដ្ឋាករកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ