គណបក្សភ្លើងទៀនព្យាយាមជួបក្រសួងមហាផ្ទៃ តែមន្ត្រីក្រសួងមហាផ្ទៃថាមិនមានភាពចាំបាច់
គណបក្សភ្លើងទៀនសម្តែងការសោកស្តាយចំពោះក្រសួងមហាផ្ទៃ ដែលបានបដិសេធមិនទទួលលិខិតស្នើសុំជួបលោក ស ខេង រដ្ឋមន្ត្រីក្រសួងមហាផ្ទៃ ដើម្បីពិភាក្សាលើដំណោះស្រាយពាក់ព័ន្ធនឹងឯកសារលិខិតបញ្ជាក់ការចុះបញ្ជីគណបក្សនយោបាយរបស់គណបក្សភ្លើងទៀនដែល គ.ជ.ប តម្រូវឲ្យមានឯកសារច្បាប់ដើម។ ក៏ប៉ុន្តែមន្ត្រីជាន់ខ្ពស់ក្រសួងមហាផ្ទៃបានអះអាងថា មិនមានភាពចាំបាច់ ដោយក្រសួងមហាផ្ទៃបានធ្វើការងារនេះអស់ពីសមត្ថកិច្ចហើយ។
ចុះផ្សាយនៅថ្ងៃ៖
ស្តាប់ - ០១:៥២
ក្រៅពីសម្តែងការសោកស្តាយ ដែលក្រសួងមហាផ្ទៃបដិសេធលិខិតសុំជួបម្តងហើយម្តងទៀត ដើម្បីស្វែងរកដំណោះស្រាយធ្វើយ៉ាងណាឲ្យគណបក្សភ្លើងទៀនអាចចូលរួមបោះឆ្នោតបាន គណបក្សប្រឆាំងមួយនេះ បានប្តេជ្ញាថានឹងប្រឹងប្រែងបន្ថែមទៀត ដើម្បីជួបជាមួយក្រសួងមហាផ្ទៃនៃរដ្ឋាភិបាលថ្មី។
ក៏ប៉ុន្តែសម្រាប់ពេលនេះ អ្នកនាំពាក្យក្រសួងមហាផ្ទៃលោក ខៀវ សុភ័គ បានប្រាប់វិទ្យុបារាំង RFI ថា មិនមានប្រយោជន៍អ្វីទេ ដោយសារការសុំជួបមិនអាចដោះស្រាយអ្វីបាននោះ។ លោកដាក់ជាសំណួរថា តើជាការជួបដើម្បីបង្កបញ្ហាឬ?
អ្នកនាំពាក្យរូបនេះបន្ថែមថាក្រសួងមហាផ្ទៃកន្លងមកបានបញ្ជាក់តាមបែបបទរដ្ឋបាលរួចរាល់អស់ហើយ តែក្រសួងមិនមានសមត្ថកិច្ចអ្វីធំជាងការសម្រេចរបស់គណៈកម្មាធិការជាតិរៀបចំការបោះឆ្នោត(គ.ជ.ប) និងក្រុមប្រឹក្សាធម្មនុញ្ញ។
សូមរំលឹកថាគណបក្សភ្លើងទៀន មិនត្រូវបានអនុញ្ញាតឲ្យចូលរួមបោះឆ្នោតជ្រើសតាំងតំណាងរាស្ត្រនីតិកាលទី៧ កាលពីថ្ងៃទី២៣ ខែកក្កដា ឆ្នាំ២០២៣ទេ ដោយសារខ្វះឯកសារចុះបញ្ជីគណបក្សច្បាប់ដើម។ ចំណុចនេះគណបក្សភ្លើងទៀនដែលបានបង្កើតឡើងដោយលោក សម រង្ស៊ី កាលពីឆ្នាំ១៩៩៨ បានបាត់លិខិតច្បាប់ដើមនៃការចុះបញ្ជីគណបក្សនយោបាយអំឡុងពេលដែលគណបក្សសង្គ្រោះជាតិត្រូវបានបិទ ខណៈដែលទីស្នាក់ការគណបក្សភ្លើងទៀន បានស្ថិតនៅផ្នែកខាងក្រោមនៃអតីតគណបក្សសង្គ្រោះជាតិ។
ជុំវិញបញ្ហានេះ គណបក្សភ្លើងទៀនបានព្យាយាមសុំជួបក្រសួងមហាផ្ទៃជាច្រើនលើកចាប់តាំងពីថ្ងៃទី១២ ខែមិថុនាមក ពោលគឺមុនការបិទការចុះបញ្ជីគណបក្សនយោបាយចូលរួមក្នុងការបោះឆ្នោតជ្រើសតាំងតំណាងរាស្ត្រនីតិកាលទី៧នេះ។ ក៏ប៉ុន្តែក្រសួងមហាផ្ទៃតែងបដិសេធ ហើយទីបញ្ចប់គណបក្សភ្លើងទៀនមិនត្រូវបានអនុញ្ញាតឲ្យចូលរួមបោះឆ្នោតនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ