តំណាងរាស្ត្រគណបក្សហ្វ៊ុនស៊ិនប៉ិចជាប់ឆ្នោតភាគច្រើនគឺវ័យក្មេង
លទ្ធផលផ្លូវការនៃការបោះឆ្នោតជ្រើសតាំងតំណាងរាស្ត្រកាលពីថ្ងៃទី២៣កក្កដា បានចេញជាផ្លូវការហើយនៅថ្ងៃទី៥សីហានេះ។ ក្នុងចំណោមតំណាងរាស្ត្រទាំង១២៥នៅរដ្ឋសភា គឺមានកៅអីចំនួន១២០បានទៅលើគណបក្សប្រជាជនកម្ពុជា និងនៅសល់៥កៅអីទៀតបានទៅលើគណបក្សហ្វ៊ុនស៊ិនប៉ិច។ គណបក្សរាជានិយមមួយនេះ ទើបស្គាល់កៅអីតំណាងរាស្ត្រឡើងវិញនៅអាណត្តិទី៧នេះ បន្ទាប់ពីមិនជាប់ឆ្នោតចំនួនពីរអាណ្តត្តិជាប់ៗគ្នា តាំងពីឆ្នាំ២០១៣ និង២០១៨។ ក្នុងចំណោមតំណាងរាស្ត្រទាំងអស់គឺលោក ញឿន រ៉ាដែន វ័យក្មេងជាងគេបំផុតគឺ៣៧ឆ្នាំ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
នៅក្នុងសេចក្តីថ្លែងការណ៍នៅថ្ងៃនេះ គណបក្សហ្វ៊ុនស៊ិនប៉ិច បានទទួលស្គាល់នូវលទ្ធផលបោះឆ្នោតនេះ ដោយសារតែមានអ្នកបោះឆ្នោតឲ្យជិត១លាននាក់ ទើបទទួលបានកៅអីតំណាងរាស្ត្រចំនួន៥អាសនៈ។
ជាការកត់សំគាល់ ការដែលគណបក្សរាជានិយមដែលធ្លាក់ដល់សូន្យកៅអីតំណាងរាស្ត្រពីអាណត្តិជាប់គ្នា ហើយទើបស្គាល់កៅអីតំណាងរាស្ត្រឡើងវិញនៅពេលនេះ គឺបង្ហាញថា បេក្ខជនដែលជាប់ឆ្នោតភាគច្រើនក្នុងចំណោម៥អសនៈនោះគឺជាយុវជន។
ព្រះអង្គម្ចាស់ នរោត្តម ចក្រាវុធ បុត្រា ជាព្រះប្រធានបក្ស និងជាបុត្រាសម្តេច ក្រុមព្រះ ជាប់ជាតំណាងរាស្ត្រមណ្ឌលភ្នំពេញ ដែលមានវ័យ៥៣ឆ្នាំ ខណៈដែល លោក ញឿន រ៉ាដែន ជាអ្នកនាំពាក្យគណបក្សនេះមានវ័យក្មេងជាងគេបំផុតក្នុងបញ្ជីតំណារាស្ត្រអាណត្តិនេះ គឺ៣៧ឆ្នាំ ជាប់តំណាងរាស្ត្រមណ្ឌលកំពង់ចាម។
ក្រៅពីនោះតំណាងរាស្ត្រ៣រូបទៀតរបស់គណបក្សហ្វ៊ុនស៊ិនប៉ិច គឺលោក នាង ចាន់ណាក់ វ័យ៤០ឆ្នាំ ជាប់តំណាងរាស្ត្រនៅមណ្ឌលកំពង់ធំ។ លោក គង់ បណ្តូល វ័យ ៤៨ ជាប់តំណាងរាស្ត្រមណ្ឌលកណ្តាល និងលោក ភឹម រ៉ុង វ័យ ៥២ ឆ្នាំជាប់នៅជាប់តំណារងរាស្ត្រមណ្ឌលព្រៃវែង។
ការដែលគណបក្សហ្វ៊ុនស៊ិនប៉ិច បានជាប់កៅអីតំណាងរាស្ត្រឡើងវិញនៅពេលនេះ គឺអាចដោយសារតែគណបក្សនេះផ្លាស់ប្តូរក្បាលម៉ាស៊ីនដឹកនាំបក្សថ្មីដែលជាយុវជន។ ម្យ៉ាងទៀតក៏ដោយសារតែគណបក្សភ្លើងទៀន ដែលបក្សប្រឆាំងធំមួយនៅកម្ពុជាមិនត្រូវបានអនុញ្ញាឲ្យចូលរួមប្រកួត។ នេះបើតាមអ្នកវិភាគ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ