លោក ហ៊ុន ម៉ាណែត អាចនឹងត្រូវអ្នកធ្វើជំនួញទទួលស្វាគមន៍នៅទីក្រុងញូវយ៉ក
លោក ហ៊ុន ម៉ាណែត ដែលនឹងឡើងធ្វើជានាយករដ្ឋមន្ត្រីបន្តពីឪពុក នៅចុងខែនេះ អាចនឹងត្រូវបានគេទទួលស្វាគមន៍នៅទីក្រុងទីញូវយ៉ក ជាទីដែលមានរៀបចំមហាសន្និបាតអង្គការសហប្រជាជាតិ (UNGA) ដែលបានធ្វើឡើងនៅក្នុងខែកញ្ញា។ ប៉ុន្តែអ្នកដែលប្រកាសថានឹងទទួលស្វាគមន៍នោះ គឺជាក្រុមអ្នកវិនិយោគមួយក្រុម ដែលត្រូវបានភ្នាក់ងារសារព័ត៌មានរ៉យទ័រស្រង់សំដីចុះផ្សាយនៅថ្ងៃសៅរ៍ទី៥ សីហា ២០២៣។
ចុះផ្សាយនៅថ្ងៃ៖
លោក Ted Osius ប្រធានក្រុមប្រឹក្សាធុរកិច្ចអាមេរិក-អាស៊ានបាននិយាយកាលពីថ្ងៃព្រហស្បតិ៍ថា ពួកគេនឹងធ្វើជាម្ចាស់ផ្ទះ ទទួល លោក ហ៊ុន ម៉ាណែត។ ពួកគេសង្ឃឹមថា នេះជាការបើកទំព័រថ្មី រវាងទីក្រុងវ៉ាស៊ីនតោន និងទីក្រុងភ្នំពេញ។ ប៉ុន្តែវាមិនមែនជាទំព័រថ្មីទាំងស្រុងទេ ដោយសារថា នេះមិនមែនជាឪពុករបស់គាត់។
បើតាមអតីតអ្នកការទូតអាមេរិកប្រចាំប្រទេសវៀតណាមជិតខាងរបស់កម្ពុជារូបនេះ លោកនឹងនាំនាយកប្រតិបត្តិ នាយកប្រតិបត្តិជាន់ខ្ពស់ ដែលចាប់អារម្មណ៍មកកម្ពុជា ឲ្យស្គាល់លោក ហ៊ុន ម៉ាណែត ហើយថាប្រហែលជាចង់ទទួលបានទស្សនៈពីមេដឹកនាំថ្មីរូបនេះ។
ថ្មីៗនេះ កម្ពុជាបានស្នើសុំសហរដ្ឋអាមេរិកឱ្យផ្តល់នូវប្រព័ន្ធអនុគ្រោះពន្ធ GSPឡើងវិញ ដើម្បីពង្រឹងទំនាក់ទំនងពាណិជ្ជកម្មរវាងគ្នា ក្រោយដកហូតកាលពីឆ្នាំ២០២០ ខណៈអ្នកជំនាញអះអាងថា ការបាត់GSP ធ្វើឱ្យទំនិញកម្ពុជាដែលនាំចេញទៅសហរដ្ឋអាមេរិកខាតបង់ច្រើន។
វ៉ាស៊ីនតោន ចេញសេចក្តីថ្លែងការណ៍មិនទទួលស្គាល់ការបោះឆ្នោតនៅកម្ពុជាថ្មីៗនេះឡើយ ដោយថា ការបោះឆ្នោតមិនសេរី ឬយុត្តិធម៌ ដោយសារតែបក្សប្រឆាំងត្រូវបានរារាំងមិនឲ្យឡើងសង្វៀន។
អ្នកនាំពាក្យក្រសួងការបរទេសសហរដ្ឋអាមេរិក ត្រូវបានដកស្រង់សំដីមកផ្សាយដោយរ៉យទ័រថា ការបង្កើតរដ្ឋាភិបាលថ្មី គឺជាឱកាសមួយសម្រាប់គណបក្សប្រជាជនកម្ពុជា ដើម្បីលើកកម្ពស់ជំហរអន្តរជាតិរបស់កម្ពុជា។ ប៉ុន្តែនៅសង្កត់ធ្ងន់ថា មធ្យោបាយដែលអាចធ្វើបានរួមមាន "ការស្តារលទ្ធិប្រជាធិបតេយ្យសេរីពហុបក្ស បញ្ចប់ការកាត់ក្តីបែបនយោបាយ បង្វែរការផ្តន្ទាទោសអ្នករិះគន់រដ្ឋាភិបាល និងការអនុញ្ញាតឱ្យប្រព័ន្ធផ្សព្វផ្សាយឯករាជ្យបើកឡើងវិញ និងដំណើរការដោយគ្មានការជ្រៀតជ្រែក"៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ