ប៉ូលីសបាត់ដំបង៖ ជនសង្ស័យរត់កង់បីប៉ុនប៉ងគម្រាមប្លន់ស្ត្រីជនជាតិបារាំង ត្រូវបញ្ជូនទៅតុលាការ
ជនសង្ស័យឈ្មោះ ទេព ភាឡី ហៅ លីញ ជាអ្នករត់ម៉ូតូកង់បីដឹកស្ត្រីជនជាតិបារាំងបានសារភាពនៅថ្ងៃអង្គារនេះថាសកម្មភាពរបស់គេនាវេលាទៀបភ្លឺថ្ងៃទី៥ ខែសីហា ឆ្នាំ២០២៣ កន្លងទៅ គឺជាការប៉ុនប៉ង(គំរាមប្លន់)យកទ្រព្យសម្បត្តិរបស់ស្រ្តីរងគ្រោះ។ ការបញ្ជាក់របស់ជនសង្ស័យរូបនេះ គឺធ្វើឡើងបន្ទាប់ពីសមត្ថកិច្ចនគរបាលខេត្តបាត់ដំបងបានឃាត់ខ្លួនបុរសរូបនេះ កាលពីថ្ងៃចន្ទម្សិលមិញ ក្រោយរូបគេគេចខ្លួនអស់រយៈពេលពីរថ្ងៃ។
ចុះផ្សាយនៅថ្ងៃ៖
ស្តាប់ - ០២:២១
នៅចំពោះមុខសមត្ថកិច្ចស្នងការដ្ឋានខេត្តបាត់ដំបង ជនសង្ស័យ ទេព ភាឡី ហៅ លីញ បានផ្តល់ចម្លើយថារូបគេបានធ្វើសកម្មភាពចំពោះស្ត្រីបរទេសម្នាក់ជាជនជាតិបារាំងអាយុ២២ឆ្នាំ ដោយព្យាយាមដឹកស្ត្រីរូបនេះតាមម៉ូតូកង់បីទៅកន្លែងស្ងាត់ណាមួយ ដើម្បីប៉ុនប៉ង(គម្រាមប្លន់)យកទ្រព្យសម្បត្តិរបស់នាងកាលពីថ្ងៃទី០៥ ខែសីហាកន្លងទៅ ខណៈដែលស្ត្រីបរទេសរូបនេះបានចុះពីរថយន្តក្រុង ហើយជិះ PassApp ទៅកាន់កន្លែងស្នាក់នៅ។
ប៉ូលីសខេត្តបាត់ដំបងឲ្យដឹងតាមរយៈទំព័រហ្វេសប៊ុករបស់ខ្លួនថា ជនសង្ស័យដែលរត់ម៉ូតូកង់បីមិនបានជូនស្ត្រីបរទេសរងគ្រោះទៅកាន់គោលដៅផ្ទះសំណាក់ ពេជ្រ ខៀវ ក្នុងក្រុងបាត់ដំបងទេ ដោយព្យាយាមជិះពង្វាងទៅកន្លែងផ្សេង ហើយក៏ក្រឡាប់ម៉ូតូកង់បីជាហេតុធ្វើឲ្យស្ត្រីទេសចរជនជាតិបារាំងមានឱកាសរត់ចេញពីនោះទាំងរបួសរាងកាយ ក្នុងនោះក៏បាក់ឆ្អឹងម្រាមដៃកណ្តាលផងដែរ។
ករណីនេះ ត្រូវម្ចាស់គណនីហ្វេសប៊ុកឈ្មោះ Sam Achhara ដោយមានការសំណូមពរពីភ្ញៀវទេសចរបរទេសនេះ បានសរសេររៀបរាប់ពីហេតុការណ៍ដែលបានកើតឡើង ដើម្បីជាដំណឹងដល់អាជ្ញាធរមានសមត្ថកិច្ច។ប៉ូលីសខេត្តបាត់ដំបងនិយាយថា សមត្ថកិច្ចបានទទួលព័ត៌មាននេះពីអ្នកប្រើប្រាស់បណ្តាញសង្គមហើយឈានទៅធ្វើការឃាត់ខ្លួនជនសង្ស័យនៅថ្ងៃទី០៧ ខែសីហាម្សិលមិញនេះ។
ជាមួយគ្នានេះ អ្នកឆ្លើយឆ្លងលើបណ្តាញសង្គមហ្វេសប៊ុកបានបញ្ចេញនូវទស្សនៈស្រដៀងៗគ្នាថា ប្រសិនបើរឿងនេះជាការពិត នោះអាជ្ញាធរត្រូវតែដាក់ទោសជនសង្ស័យរត់ម៉ូតូកង់បីនេះឲ្យបានធ្ងន់ធ្ងរ ដោយសារសកម្មភាពរបស់គេបានធ្វើឲ្យប៉ះពាល់ដល់មុខមាត់ប្រទេសជាតិ សន្តិសុខ និងវិស័យទេសចរណ៍យ៉ាងធ្ងន់ធ្ងរផងដែរ។
សូមបញ្ជាក់ថាជនសង្ស័យឈ្មោះ ទេព ភាឡី ហៅ លីញ នេះ ធ្លាប់ត្រូវបានសមត្ថកិច្ចនគរបាលខេត្តបាត់ដំបងធ្វើការឃាត់ខ្លួនបញ្ជូនទៅអនុវត្តទោសតាមផ្លូវច្បាប់ម្តងរួចមកហើយ កាលពីខែវិច្ឆិកា ឆ្នាំ២០១៨ដែលកាលនោះរូបគេបានធ្វើសកម្មភាពឆក់យកទ្រព្យសម្បត្តិរបស់ជនរងគ្រោះម្នាក់ជាស្ត្រីជនជាតិបារាំងដែរ នៅក្រុងបាត់ដំបង ប៉ុន្តែក្រោយពីចេញពីពន្ធនាគារវិញ បុគ្គលនេះនៅតែបន្ត ប្រព្រឹត្តសកម្មភាពល្មើស បន្តទៀតដោយគ្មានការរាងចាល ដែលពេលនេះប៉ូលីសកំពុងរៀបចំសំណុំរឿងបញ្ជូនជនសង័្សយ និងវត្ថុតាងទៅតុលាការខេត្តបាត់ដំបង ដើម្បីអនុវត្តទោសជាថ្មីម្តងទៀតទៅតាមផ្លូវច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ