សឹង្ហបុរី និងឡាវ អបអរលោក ហ៊ុន ម៉ាណែត ក្រោយព្រះមហាក្សត្រចាត់តាំងជានាយករដ្ឋមន្ត្រី
មួយថ្ងៃក្រោយព្រះមហាក្សត្រខ្មែរព្រះបាទ សម្តេចព្រះនរោត្តម សីហមុនី បានចាត់តាំងលោក ហ៊ុន ម៉ាណែត ជានាយករដ្ឋមន្ត្រីអាណត្តិថ្មី សឹង្ហបុរី និងឡាវ បានចេញមកសាទរមុនគេ ក្នុងចំណោមប្រជាជាតិអាស៊ានទាំង១០។ ប្រមុខរដ្ឋាភិបាល និងប្រមុខរដ្ឋនៃប្រទេសទាំងពីរ បានសម្តែងនូវការគាំទ្រ និងត្រៀមលក្ខណៈធ្វើការជាមួយរដ្ឋាភិបាលថ្មីកម្ពុជាអាណត្តិទី៧ ដែលដឹកនាំដោយលោកបណ្ឌិត ហ៊ុន ម៉ាណែត។
ចុះផ្សាយនៅថ្ងៃ៖
ស្តាប់ - ០២:០៧
លោក លី ស៊ានឡុង នាយករដ្ឋមន្ត្រីសិង្ហបុរី និងប្រមុខរដ្ឋឡាវ ដែលជាប្រទេសអាស៊ាន២ បានចេញមុខមកអបអរសាទរមុនគេ ដល់លោកបណ្ឌិត ហ៊ុន ម៉ាណែត បន្ទាប់ពីលោកត្រូវបានព្រះមហាក្សត្រចាត់តាំងជានាយករដ្ឋមន្ត្រីសម្រាប់នីតិកាលទី៧ នៃរដ្ឋសភា។
នៅក្នុងលិខិតខ្លីជាភាសាអង់គ្លេស ដែលផ្ញើទៅកាន់លោក ហ៊ុន ម៉ាណែត ដោយផ្ទាល់ ហើយត្រូវបានបកប្រែក្រៅផ្លូវការ នាយករដ្ឋមន្ត្រីសិង្ហបុរី លោក លី ស៊ានឡុង បានបញ្ជាក់ថាក្នុងនាមរដ្ឋាភិបាលសិង្ហបុរី លោកសូមអបអរសាទរដល់លោក ហ៊ុន ម៉ាណែត ដែលត្រូវបានតែងតាំងជានាយករដ្ឋមន្ត្រីនៃកម្ពុជា។
លោក លី បានសរសេររៀបរាប់ពីទំនាក់ទំនងមិត្តភាពយូរអង្វែង និងកិច្ចសហប្រតិបត្តិការលើវិស័យសំខាន់ៗជាច្រើនរវាងកម្ពុជា និងសិង្ហបុរី ព្រមទាំងរំពឹងថា នឹងធ្វើការជាមួយលោក ហ៊ុន ម៉ាណែត និងក្រុមការងាររបស់លោក ដើម្បីបន្តពង្រឹងកិច្ចសហប្រតិបត្តិការ ទំនាក់ទំនងទ្វេភាគី និងពហុភាគី។ បន្ថែមពីនេះ ប្រមុខរដ្ឋាភិបាលសិង្ហបុរី ក៏រំពឹងដែរថា នឹងបានជួបលោក ហ៊ុន ម៉ាណែត ដោយផ្ទាល់ នៅក្នុងឱកាសនៃកិច្ចប្រជុំកំពូលអាស៊ានលើកទី៤៣ ក្នុងទីក្រុងហ្សាការតា នៅខែកញ្ញាខាងមុខនេះ។
ដោយឡែក ជាមួយឡាវវិញ លោក ថង លុនស៊ីសុលីត អគ្គលេខាធិការនៃគណៈកម្មាធិការមជ្ឈិមបក្សប្រជាជនបដិវត្តន៍ឡាវ និងជាប្រធានរដ្ឋឡាវ ក៏បានសម្តែងការអបអរសាទរ និងគាំទ្រពេញទំហឹង ដែលព្រះមហាក្សត្រកម្ពុជា បានចាត់តាំងលោក ហ៊ុន ម៉ាណែត ជានាយករដ្ឋមន្ត្រី ព្រមទាំងប្តេជ្ញាថានឹងបន្តពង្រឹងទំនាក់ទំនងដ៏ល្អប្រសើររវាងគណបក្ស រដ្ឋាភិបាល និងប្រជាជននៃប្រទេសទាំងពីរ។ នេះបើតាមសេចក្តីប្រកាសព័ត៌មានរបស់គណបក្សប្រជាជនកម្ពុជា បន្ទាប់ពីជំនួបតាមអនឡាញរវាងលោក ហ៊ុន សែន ប្រធានគណបក្ស និងប្រមុខរដ្ឋឡាវនៅថ្ងៃអង្គារនេះ។
សូមបញ្ជាក់ថាបន្ទាប់ពីចាត់តាំងជានាយករដ្ឋមន្ត្រីអាណត្តិថ្មី លោក ហ៊ុន ម៉ាណែត នៅថ្ងៃទី៨ ខែសីហានេះ ត្រូវបានព្រះមហាក្សត្រត្រាស់បង្គាប់ផ្តល់គោរមងារកិត្តិយសពិសេសដ៏ឧត្តុង្គឧត្តមបំផុតនៃរាជបណ្ឌិត្យសភាកម្ពុជាជា«កិត្តិទេសាភិបាលបណ្ឌិត»តែមួយរូបគត់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ