បណ្តឹងប្រជាពលរដ្ឋរងគ្រោះបានកើនឡើងជាង១ពាន់បណ្ដឹង ប្រឆាំងនឹងក្រុមហ៊ុនពិភពដីមាស
គិតមកត្រឹមថ្ងៃទី០៩ ខែសីហា ម្សិលមិញ ប្រជាពលរដ្ឋខេត្តកំពតបានបន្តដាក់ពាក្យបណ្តឹងបន្ថែមទៀតរហូតដល់ ១ ១០៥ បណ្ដឹង ប្រឆាំងនឹងក្រុមហ៊ុនពិភពដីមាស។ នេះបើគិតត្រឹមខេត្តកំពតមួយប៉ុណ្ណោះ ដោយមិនទាន់ដឹងពីប្រតិបត្តិការក្រុមហ៊ុននេះនៅកន្លែងដទៃផ្សេងទៀត។ ការដាក់ពាក្យប្តឹងរបស់ប្រជាពលរដ្ឋច្រើនសន្ធឹកសន្ធាប់បែបនេះ គឺដោយសារតែក្រុមហ៊ុនអលនទ្រព្យពិភពដីមាសនេះ បានធ្វើជំនួញមិនសុច្ចរិត ដោយលក់ដីខ្យល់ឲ្យប្រជាពលរដ្ឋ។
ចុះផ្សាយនៅថ្ងៃ៖
ស្តាប់ - ០២:១៦
តាមការឲ្យដឹងពីស្នងការដ្ឋាននគរបាលខេត្តកំពត មកទល់នឹងថ្ងៃទី០៩ ខែសីហាម្សិលមិញ ប្រជាពលរដ្ឋនៅក្នុងខេត្តនេះ បានដាក់ពាក្យប្តឹងក្រុមហ៊ុនពិភពដីមាសមកសមត្ថកិច្ចចំនួន ១ ១០៥ បណ្ដឹង គិតជាទឹកប្រាក់ជាង ២១លានដុល្លារ ដែលទឹកប្រាក់ខាតបង់ទាំងនេះ សុទ្ធសឹងជាប្រាក់ដើមទាំងអស់។
កាលពីថ្ងៃចន្ទកន្លងទៅ សមត្ថកិច្ចរាជធានីភ្នំពេញ បានចាប់ខ្លួនម្ចាស់ក្រុមហ៊ុនពិភពដីមាសលោកឧកញ៉ា ហ៊ី គីមហុង និងបក្សពួក ១៣នាក់ផ្សេងទៀត ដែលមានទីស្នាក់ការលក់នៅភ្នំពេញ បញ្ជូនទៅតុលាការ ក្រោមបទចោទឆបោកមានស្ថានទម្ងន់ទោស ការញុះញង់ឲ្យប្រព្រឹត្តអំពើប្រឆាំងអ្នករាជការសាធារណៈ និងការសម្អាតប្រាក់ផងដែរ។
ស្នងការប៉ូលីសខេត្តកំពតបញ្ជាក់តាមបណ្តាញសង្គមហ្វេសប៊ុកថា អ្នកដែលពាក់ព័ន្ធនៅក្នុងសំណុំរឿងនេះផ្សេងទៀត នឹងមិនរួចខ្លួនទេ។ នៅក្នុងន័យនេះ ត្រូវប្រជាពលរដ្ឋរាយការណ៍ថាក្រុមហ៊ុនពិភពដីមាស លក់ដីខ្យល់នេះ បានបញ្ចុះបញ្ចូលប្រជាពលរដ្ឋតាមរយៈភ្នាក់ងាររបស់ខ្លួនជាច្រើននាក់នៅតាមមូលដ្ឋាន ឲ្យប្រជាជនទិញដី ចូលរួមវិនិយោគជាមួយក្រុមហ៊ុន ដើម្បីស្វែងរកប្រាក់ចំណេញ។ ក៏ប៉ុន្តែជាក់ស្តែងប្រជាជនមិនទទួលបានអ្វីទាំងអស់ ក្រៅតែពីដាក់ដើមទុនចូលរួមជាមួយក្រុមហ៊ុន ដែលមានការបញ្ចុះបញ្ចូលដ៏អាក្រក់។
សូមបញ្ជាក់ថាកាលពីខែមេសា ឆ្នាំ២០២៣ កន្លងទៅ លោកឧកញ៉ា ជា សារ៉ន និងបក្ខពួក៨នាក់ផ្សេងទៀត ក៏ត្រូវប្រជាពលរដ្ឋនៅខេត្តកំពតជាង២ពាន់គ្រួសារ បានតវ៉ារឿងចាញ់បោកការវិនិយោគដីខ្យល់នេះរបស់ក្រុមហ៊ុន ជា សារ៉ន សរុបជាទឹកប្រាក់ជិត៤០លានដុល្លារ។
អ្នកតាមដានបញ្ហាសង្គមនានា មើលឃើញថា ក្រុមអ្នកមានឥទ្ធិពលនៅក្នុងសង្គមមួយចំនួន ដែលមានងារជាឧកញ៉ាជាបន្តបន្ទាប់តែងប្រព្រឹត្តអំពើទុច្ចរិតកេងប្រវ័ញ្ច បោកប្រាក់ប្រជាពលរដ្ឋតាមរយៈវិស័យអចលនទ្រព្យនេះ ក៏ព្រោះតែការអនុវត្តច្បាប់នៅមានកំរិត និងម្យ៉ាងទៀតអាចជាការបង្ហាញរូបភាពតៗគ្នានូវការទទួលបានផលចំណេញច្រើនពីយុទ្ធសាស្ត្រ និងរូបភាពឆបោកបែបនេះ បើទោះណាជាអ្នកប្រព្រឹត្តត្រូវទទួលនូវទោសទណ្ឌមួយរយៈកាលក៏ដោយ។ ដោយឡែកអ្នកដែលខាតបង់គឺប្រជាពលរដ្ឋស្លូតត្រង់ ដែលស្ថានភាពនេះបានរុញច្រានពួកគេឲ្យកាន់តែធ្លាក់ទៅក្នុងសភាពក្រីក្របន្ថែមទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ