ករណីដឹកឧក្រិដ្ឋជនគ្រឿងញៀនចិនទៅព្យាបាលខាងក្រៅពន្ធនាគារ រងការរិះគន់ថាស្តង់ដារពីរ
សមត្ថកិច្ចខ្មែរនៅថ្ងៃទី១៨ ខែសីហានេះ បានចាប់ខ្លួនជនប្រដាប់អាវុធ៦នាក់ បន្ទាប់ពីពួកគេបានធ្វើសកម្មភាពរំដោះអ្នកទោសជនជាតិចិនម្នាក់ ជាមេខ្លោងជួញដូរគ្រឿងញៀនពីក្នុងគ្លីនិកធ្មេញមួយក្នុងខេត្តសៀមរាប។ ក៏ប៉ុន្តែមេខ្លោងឧក្រិដ្ឋជនគ្រឿងញៀនចិននេះ នៅមិនទាន់ចាប់មកវិញបាននៅឡើយ។ ករណីនេះ បង្កើតបានជាការរិះគន់ពីសំណាក់ពលរដ្ឋខ្មែរ និងក្រុមអ្នកនយោបាយប្រឆាំងថាមានស្តង់ដារពីរ ខណៈដែលលោក ថាច់ សេដ្ឋា អនុប្រធានគណបក្សភ្លើងទៀន ដែលជាប់ពន្ធនាគារដែរនោះ មិនត្រូវបានអនុញ្ញាតឲ្យទៅព្យាបាលជំងឺបេះដូងធ្ងន់ធ្ងររបស់លោកតាមការស្នើសុំទេ។
ចុះផ្សាយនៅថ្ងៃ៖
ស្តាប់ - ០១:៤៧
ខណៈដែលរឿងឧក្រិដ្ឋជនចូលរំដោះអ្នកទោសជនជាតិចិន ដែលជាមេខ្លោងជួញដូរគ្រឿងញៀននៅក្នុងគ្លីនិកព្យាបាលធ្មេញមួយកន្លែងនៅខេត្តសៀមរាបក្លាយជារឿងដ៏កក្រើកកាលពីថ្ងៃទី១៧ ខែសីហាម្សិលមិញ ការរិះគន់ក៏បានកើតឡើងព្រមគ្នាដែរ។
តាមរយៈបណ្តាញសង្គម ឧក្រិដ្ឋជនជួញដូរគ្រឿងញៀនជនជាតិចិនប្រកបដោយគ្រោះថ្នាក់បែរជាអនុញ្ញាតឲ្យចេញទៅពិនិត្យព្យាបាលសុខភាពនៅខាងក្រៅពន្ធនាគារ ខណៈលោក ថាច់ សេដ្ឋា ដែលជាអនុប្រធានគណបក្សភ្លើងទៀន មិនត្រូវបានអនុញ្ញាតឲ្យចេញទៅក្រៅពន្ធនាគារដើម្បីព្យាបាលជំងឺបេះដូងរបស់លោក ដែលមានសភាពធ្ងន់ធ្ងរ។
ក្រុមអ្នករិះគន់តាមបណ្តាញសង្គមក៏បានលើកយកករណីលោក ថាច់ សេដ្ឋា ដែលធ្លាប់តែព្យាបាលជំងឺបេះដូងយ៉ាងទៀងទាត់នៅមន្ទីពេទ្យទៅប្រៀបធៀបនឹងឧក្រិដ្ឋជនគ្រឿងញៀនជនជាតិចិនថាមានស្តង់ដារពីរ។
អ្នកទទួលខុសត្រូវពន្ធនាគារ និងស្ថាប័នអយ្យការមិនអាចទាក់ទងសុំការពន្យល់បានទេជុំវិញការរិះគន់ខាងលើ ក៏ប៉ុន្តែលោក ខៀវ សុភ័គ អ្នកនាំពាក្យក្រសួងមហាផ្ទៃបានប្រាប់វិទ្យុបារាំង RFI ថាករណីនេះ ពេលខ្លះមិនមែនពន្ធនាគារជាអ្នកសម្រេចទេ គឺត្រូវសុំទៅព្រះរាជអាជ្ញាទៀត។ តាមលោក ខៀវ សុភ័គ បញ្ហានេះអាចអាស្រ័យលើប្រភេទនៃសំណុំរឿង ដោយលោកលើកឡើងថាអាចសំណុំរឿងខ្លះតុលាការក្តាប់មិនទាន់ជុំ សំណុំរឿងខ្លះអាចបារម្ភពីការតវ៉ា ឬបាតុកម្មផ្សេងៗ។
សូមរំលឹកថាសមត្ថកិច្ចបានរកឃើញ និងចាប់ខ្លួនឧក្រិដ្ឋជនចំនួន៦នាក់ ដែលបានធ្វើសកម្មភាពដូចក្នុងភាពយន្តរំដោះមេខ្លោងជនជាតិចិនរបស់ពួកគេចេញពីគ្លីនិកធ្មេញ ជុំ ចិន្តា នៅខេត្តសៀមរាប។ ក៏ប៉ុន្តែមេខ្លោងឧក្រិដ្ឋជនចិន ដែលជាប់ទោសរយៈពេល ៥២ឆ្នាំ ពីបទជួញដូរគ្រឿងញៀនឈ្មោះ Chen hsin han នៅមិនទាន់ត្រូវបានសមត្ថកិច្ចរកឃើញនៅឡើយមកទល់ពេលនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ