ក្រោយគេចខ្លួន១សប្តាហ៍ មេខ្លោងគ្រឿងញៀនជនជាតិចិនត្រូវបានចាប់ខ្លួនជាថ្មី និងប្រឈមការដាក់ទោសបន្ថែម
មេខ្លោងឧក្រិដ្ឋជនគ្រឿងញៀនជនជាតិចិនឈ្មោះ ចិន សិនហាន(Chen Hsin Han) ដែលមានទោសជាប់ពន្ធនាគារជាង៥០ឆ្នាំ ត្រូវបានសមត្ថកិច្ចកម្ពុជាចាប់ខ្លួនជាថ្មីនៅភ្នំពេញ បន្ទាប់ពីរូបគេត្រូវបានរំដោះដោយបក្សពួកចេញពីគ្លីនិកព្យាបាលធ្មេញមួយកន្លែងនៅក្នុងខេត្តសៀមរាបកាលពីសប្តាហ៍មុន។នៅក្នុងសន្និសីទកាសែត ដែលរៀបចំឡើងដោយសមត្ថកិច្ចប៉ូលីសនៅព្រឹកថ្ងៃពុធនេះ នាយឧត្តមសេនីយ៍ ម៉ក់ ជីតូ អគ្គស្នងការរងនគរបាលជាតិបានប្រាប់អ្នកកាសែតថា ការចាប់បានមកវិញមេខ្លោងជួញដូរគ្រឿងញៀន ដែលបានគេចខ្លួនរួមនឹងបក្សពួកប្រដាប់អាវុធដែលបានធ្វើសកម្មភាពរំដោះឧក្រិដ្ឋជននេះសរុបចំនួន១១នាក់ពេលនេះ ត្រូវបានដោះស្រាយស្ទើរទាំងស្រុងហើយ នៅសល់តែអ្នកពាក់ព័ន្ធមួយចំនួនទៀតប៉ុណ្ណោះ។ តាមលោក ម៉ក់ ជីតូ ហេតុការណ៍រំដោះអ្នកទោស ដែលបានកើតឡើងមិនដែលធ្លាប់មាននៅកម្ពុជានេះ មិនមែនជាឆាកល្ខោនដូចដែលទស្សនៈមួយចំនួនបានលើកឡើងនោះទេ។សូមរំលឹកថាមេខ្លោងគ្រឿងញៀន ចិន សិនហាន នេះត្រូវបានជនប្រដាប់អាវុធមួយក្រុម ធ្វើសកម្មភាពរំដោះចេញពីគ្លីនិកធ្មេញឈ្មោះ ជុំ ចិន្តា នៅខេត្តសៀមរាប កាលពីថ្ងៃទី១៧ ខែសីហា ឆ្នាំ២០២៣នេះ ដោយភ្ជង់ និងចងមន្ត្រីពន្ធនាគាររំដោះអ្នកទោសចេញពីទីនោះតាមរថយន្តមួយគ្រឿង។ ក៏ប៉ុន្តែជនប្រដាប់អាវុធទាំងនោះត្រូវបានសមត្ថកិច្ចចាប់ខ្លួនបានទាំងអស់ ហើយចុងក្រោយនេះ មេខ្លោងគ្រឿងញៀនដ៏ធំនេះក៏ត្រូវបានចាប់ខ្លួនមកវិញដែរ។ទោះយ៉ាងណាសមត្ថកិច្ចនៅបន្តស្វែងរកអ្នកពាក់ព័ន្ធបន្ថែមទៀត នៅក្នុងសំណុំរឿងនេះ។ សូមបញ្ជាក់ថាក្រុមប្រដាប់អាវុធ ដែលធ្វើសកម្មភាព និងជាប់ពាក់ព័ន្ធការរៀបគម្រោងរំដោះមេខ្លោងគ្រឿងញៀនជនជាតិចិនទាំង១០នាក់នេះ មាន៦នាក់ជាជនជាតិអាមេរិកដើមកំណើតខ្មែរ ស្ត្រីជនជាតិចិន ១នាក់ ជនជាតិខ្មែរ ២នាក់ និងជនជាតិអារ៉ាប៊ីសាអ៊ូឌីត ១នាក់។ សូមស្តាប់លោក ម៉ក់ ជីតូ៖
ចុះផ្សាយនៅថ្ងៃ៖
ស្តាប់ - ០២:០៤
