គណបក្ស២០ ចូលរួមក្នុងឧត្តមក្រុមប្រឹក្សាពិគ្រោះនិងផ្តល់យោបល់ តែភ្លើងទៀនថាអត់ប្រយោជន៍
គិតមកដល់ថ្ងៃព្រហស្បតិ៍នេះ មានគណបក្សនយោបាយដែលមិនបានឈ្នះអាសនៈនៅក្នុងរដ្ឋសភានៅក្នុងការបោះឆ្នោតជ្រើសតាំងតំណាងរាស្ត្រនីតិកាលទី៧ និងគណបក្សដែលមិនបានចូលរួមបោះឆ្នោតចំនួន២០ហើយ បានដាក់ពាក្យសុំចូលរួមនៅក្នុងឧត្តមក្រុមប្រឹក្សាពិគ្រោះ និងផ្តល់យោបល់អាណត្តិថ្មី។ ក៏ប៉ុន្តែគណបក្សភ្លើងទៀនដែលជាគណបក្សប្រឆាំងធំមួយមិនចាប់អារម្មណ៍ក្នុងការចូលរួមទេ។
ចុះផ្សាយនៅថ្ងៃ៖
ស្តាប់ - ០២:៤៨
លោក ឈឹម ផលវរុណ រដ្ឋមន្ត្រីប្រតិភូអមនាយករដ្ឋមន្ត្រីទទួលបន្ទុកជាប្រធានលេខាធិការដ្ឋានឧត្តមក្រុមប្រឹក្សាពិគ្រោះ និងផ្តល់យោបល់បានបញ្ជាក់ប្រាប់វិទ្យុបារាំង RFI ថាគិតមកទល់ពេលនេះ មានគណបក្សដែលមិនមានអាសនៈនៅក្នុងរដ្ឋសភាចំនួន២០ហើយ ដែលបានដាក់ពាក្យសុំចូលរួមក្នុងឧត្តមក្រុមប្រឹក្សាពិគ្រោះ និងផ្តល់យោបល់។
ក៏ប៉ុន្តែលោក ឈឹម ផលវរុណ មិនបានបញ្ជាក់ទេថាមានគណបក្សដែលបានចូលរួមបោះឆ្នោតប៉ុន្មាន និងគណបក្សដែលមិនបានចូលរួមបោះឆ្នោតប៉ុន្មាននោះទេ។ តែគេអាចដឹងបានថាគណបក្សដែលចូលរួមបោះឆ្នោតជ្រើសតាំងតំណាងរាស្ត្រនីតិកាលទី៧នេះ មានចំនួនសរុប១៨ ក្នុងនោះ២គណបក្សបានឈ្នះអាសនៈនៅក្នុងសភា គឺគណបក្សប្រជាជនកម្ពុជា និងគណបក្សហ្វុនស៊ិនប៉ិច។
កាលពីថ្ងៃទី២៦ ខែសីហា កន្លងទៅព្រះមហាក្សត្រខ្មែរព្រះបាទសម្តេចព្រះ នរោត្តម សីហមុនី បានឡាយព្រះហស្តលេខាលើព្រះរាជក្រឹត្យមួយ ដោយនៅចំណុចមាត្រា១បញ្ជាក់ថា ព្រះរាជក្រឹត្យនេះមានគោលដៅបង្កើត និងកំណត់អំពីការរៀបចំ និងការប្រព្រឹត្តទៅនៃឧត្តមក្រុមប្រឹក្សាពិគ្រោះ និងផ្តល់យោបល់ ក្នុងគោលបំណងលើកស្ទួយរបបនយោបាយប្រជាធិបតេយ្យសេរីពហុបក្ស ដើម្បីប្រមូលធាតុចូលនៃទស្សនៈពហុគំនិតជាប្រយោជន៍ដល់ការស្ថាបនាជាតិ។
ជាការកត់សម្គាល់ឧត្តមក្រុមប្រឹក្សាពិគ្រោះ និងផ្តល់យោបល់នៅក្នុងអាណត្តិថ្មីនេះ មិនត្រឹមតែបើកផ្លូវឲ្យសម្រាប់តែគណបក្សនយោបាយដែលបានចូលរួមបោះឆ្នោតហើយមិនបានឈ្នះអាសនៈរដ្ឋសភាដូចអាណត្តិមុននោះទេ គឺស្ថាប័នមួយនេះទទួលទាំងគណបក្សដែលមិនបានចូលរួមបោះឆ្នោតទាំងអស់ផងដែរ ឲ្យតែបានចុះបញ្ជីត្រឹមត្រូវនៅក្រសួងមហាផ្ទៃ។ រីឯថវិកាសម្រាប់ចំណាយទៅលើឧត្តមក្រុមប្រឹក្សាពិគ្រោះ និងផ្តល់យោបល់វិញក៏បានបញ្ជាក់នៅក្នុងព្រះរាជក្រឹត្យដែរថា ត្រូវបានផ្គត់ផ្គង់ដោយកញ្ចប់ថវិកាជាតិ ក្នុងខ្ទង់ថវិការបស់ទីស្តីការគណៈរដ្ឋមន្ត្រី។
លោក ពេជ្រ ស្រស់ ប្រធានគណបក្សយុវជនកម្ពុជា ដែលបានដាក់ពាក្យស្នើសុំចូលរួមក្នុងក្រុមប្រឹក្សាពិគ្រោះ និងផ្តល់យោបល់រួចហើយនោះ ឲ្យដឹងថាការចូលរួមជាមួយស្ថាប័ននេះ មានគុណតម្លៃ និងប្រយោជន៍ច្រើនក្នុងការជួយប្រជាពលរដ្ឋ។
ក៏ប៉ុន្តែ លោក គីមសួរ ភីរិទ្ធ អ្នកនាំពាក្យគណបក្សភ្លើងទៀនបានថ្លែងថា លោកមិនបានដឹងទេថារដ្ឋាភិបាលមានគោលនយោបាយយ៉ាងណានោះចំពោះការបន្តឲ្យមានឧត្តមក្រុមប្រឹក្សាពិគ្រោះ និងផ្តល់យោបល់នេះ ក៏ប៉ុន្តែសម្រាប់គណបក្សភ្លើងទៀន លោកគិតថាមិនមានសារៈសំខាន់ក្នុងការជួយអភិវឌ្ឍន៍លទ្ធិប្រជាធិបតេយ្យ និងជួយប្រជាពលរដ្ឋនោះទេ។ លោកថាជំហរគណបក្សភ្លើងទៀនគឺមិនមានការចាប់អារម្មណ៍ទេ។
សូមរំលឹកថាគណបក្សនយោបាយដែលបានចុះបញ្ជីនៅក្រសួងមហាផ្ទៃមានប្រមាណជាង៤០គណបក្ស ក្នុងនោះ១៨ គណបក្សបានចូលរួមបោះឆ្នោតជាតិឆ្នាំ២០២៣នេះ ខណៈគណបក្សភ្លើងទៀនត្រូវបានផាត់ចេញពីការបោះឆ្នោតនេះ ក្រោមហេតុផលខ្វះឯកសារច្បាប់ដើម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ