គណបក្សភ្លើងទៀនអំពាវនាវឲ្យដោះលែងមន្ត្រី៥រូបដែលចាប់ខ្លួននៅខេត្តបន្ទាយមានជ័យ
គណបក្សភ្លើងទៀនអំពាវនាវឲ្យដោះលែងមន្ត្រីគណបក្សជំទាស់នេះចំនួន៥រូបដែលត្រូវបានចាប់ខ្លួននៅថ្ងៃទី៩កញ្ញាម្សិលមិញ។ មន្ត្រីបក្សប្រឆាំងទាំងនោះ គឺមាន លោក ស៊ិន វុត្ថា ប្រធានគណកម្មាធិការប្រតិបត្តិខេត្តបន្ទាយមានជ័យ និងលោក សួន ខេមរិន លេខាប្រតិបត្តិខេត្ត។ លោក ទួត វាសនាប្រធានប្រតិបត្តិស្រុកមង្គលបូរី លោក ឈុំ ស៊ីណាត អនុប្រធានប្រតិបត្តិស្រុក និងលោក វ៉ាន់ ស៊ុយអ៊ីវ ជំទប់ទី២ នៃឃុំគួយម៉ែង ស្រុកមង្គលបូរី។
ចុះផ្សាយនៅថ្ងៃ៖
ស្តាប់ - ០១:៥២
លោក អ៊ុំ សំអាន អតីតតំណាងរាស្ត្របក្សប្រឆាំង យល់ថា ការចាប់ខ្លួននេះគឺជាការដាក់សម្ពាធបង្ខំឲ្យចុះចូលជាមួយគណបក្សប្រជាជនកម្ពុជា ដើម្បីឲ្យបក្សប្រឆាំងចុះខ្សោយ និងចង់រំលាយឬសគល់របស់លោក សម រង្ស៊ី។ ខណៈគេនៅមិនទាន់ដឹងមូលហេតុអ្វីពិតប្រាកដនៃការចាប់ខ្លួននេះនៅឡើយ លោក ខៀវ សុភ័គ អ្នកនាំពាក្យក្រសួងមហាផ្ទៃ ពន្យល់ជាទូទៅថា រាល់ការចាប់ខ្លួនបុគ្គលណាមួយគឺទាល់តែអ្នកនោះល្មើសច្បាប់ និងមានដីកាពីតុលាការគឺត្រូវអនុវត្តស្មើគ្នាមិនថាសកម្មជនបក្សឬជាពលរដ្ឋធម្មតានោះឡើយ។
ប៉ុន្តែ លោក អ៊ុំ សំអាន ហៅការចាប់ខ្លួនសកម្មជន៥នាក់ទៀតរបស់គណបក្សភ្លើងទៀននៅពេលនេះថាជាព្រឹត្តិការណ៍ថ្មីមួយដែលកើតឡើងក្រោយការបង្កើតរដ្ឋាភិបាលថ្មី តែការអនុវត្តន៍មិនមានអ្វីថ្មីឡើយទៅលើបក្សប្រឆាំង។
ទោះជាយ៉ាងណា នៅក្នុងសេចក្តីថ្លែងការណ៍នៅអាទិត្យនេះ គណបក្ស ភ្លើងទៀន មើលឃើញថា បើទោះបីជាគណបក្សនេះ មិនត្រូវបានអនុញ្ញាតឱ្យចូលរួមប្រកួតប្រជែងក្នុងការបោះឆ្នោតជ្រើសតាំងតំណាងរាស្ត្រ នីតិកាលទី៧ នេះក៏ដោយ ក៏សកម្មជន និងថ្នាក់ដឹកនាំគណបក្ស ភ្លើងទៀន ជាច្រើននាក់ នៅតែត្រូវទទួលរងនូវការកៀបសង្កត់ និងការគំរាមកំហែង ក្នុងការធ្វើសកម្មភាពរបស់ខ្លួន ស្របតាមរដ្ឋធម្មនុញ្ញ និងច្បាប់ជាធរមាន។
បើតាមគណបក្សជំទាស់ដែលមានសក្តានុពលនេះ ខ្លួននៅតែប្រកាន់ខ្ជាប់នូវគោលការណ៍អហិង្សា និងសន្តិវិធី ក្នុងការធ្វើនយោបាយស្របតាមច្បាប់ស្តីពីគណបក្សនយោបាយ និងរដ្ឋធម្មនុញ្ញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ