អគ្គស្នងការប៉ូលិសជាតិដកតំណែងមេប៉ុស្តិ៍សំព្រោជ ក្រោយរងការរិះគន់ថាធ្លាប់ជាប់ទោសឧក្រិដ្ឋ
អគ្គស្នងការនគរបាលជាតិនៅថ្ងៃទី១១ ខែកញ្ញានេះ បានសម្រេចដកហូតតំណែងមេប៉ុស្តិ៍នគរបាលរដ្ឋបាលសំព្រោជ ស្ថិតនៅក្នុងស្រុកស្ទោងនៃខេត្តកំពង់ធំ ដោយឲ្យមកធ្វើជាមន្ត្រីនគរបាលធម្មតាវិញ។ ការដកតំណែងមេប៉ូលីសប៉ុស្តិ៍គឺអនុសេនីយ៍ឯក ហុង សារ៉ុម ទំលាក់មកជាមន្ត្រីធម្មតានេះ បានធ្វើឡើងក្រោយមានការរិះគន់យ៉ាងខ្លាំងតាមបណ្តាញសង្គមជាពិសេសហ្វេសប៊ុក និងមានបទបញ្ជាពីប្រមុខរដ្ឋាភិបាលឲ្យមានការស៊ើបអង្កេតពីភាពមិនប្រក្រតីនេះផងដែរ។
ចុះផ្សាយនៅថ្ងៃ៖
ស្តាប់ - ០១:៥០
យោងតាមសេចក្តីសម្រេចស្តីពីការអនុវត្តវិន័យមន្ត្រីនគរបាល អគ្គស្នងការនគរបាលជាតិសម្រេចដកហូតមុខតំណែងចំពោះអនុសេនីយ៍ឯក ហុង សារ៉ុម ពីនាយប៉ុសិ៍នគរបាលរដ្ឋបាលសំព្រោជ នៃអធិការដ្ឋាននគរបាលស្រុកស្ទោង ចំណុះស្នងការនគរបាលខេត្តកំពង់ធំឲ្យមកជាមន្ត្រី ក្រោមមូលហេតុល្មើសនឹងវិន័យរបស់កងកម្លាំងនគរបាលជាតិ។ សេចក្តីសម្រេចក៏បានធ្វើនិរាករណ៍ការតែងតាំងមេប៉ុស្តិ៍រូបនេះផងដែរ។
ការសម្រេចរបស់អគ្គស្នងការនគរបាលជាតិ បានធ្វើឡើងបន្ទាប់ពីមានប្រតិកម្មរបស់មហាជនយ៉ាងសន្ធាប់តាមបណ្តាញសង្គមហ្វេសប៊ុក ដែលថាលោក ហុង សារ៉ុម ជាបុគ្គលធ្លាប់ប្រព្រឹត្តបទឧក្រិដ្ឋ ដែលមិនសក្តិសមទទួលបានការតែងតាំងជាមេប៉ូលីសប៉ុស្តិ៍ ជាក្តីសង្ឃឹមផ្នែកសន្តិសុខរបស់ប្រជាពលរដ្ឋ។
អ្វីដែលសំខាន់នោះគឺបញ្ហានេះ ត្រូវបានប្រមុខរដ្ឋាភិបាលកម្ពុជាលោក ហ៊ុន ម៉ាណែត បញ្ចេញនូវប្រតិកម្មផងដែរដោយនៅលើហ្វេសប៊ុករបស់លោកកាលពីថ្ងៃអាទិត្យ លោកបានចេញបញ្ជាទៅលោក ស ថេត អគ្គស្នងការនគរបាលជាតិ ឲ្យពិនិត្យស្រាវជ្រាវជាបន្ទាន់ ដើម្បីធ្វើការកែសម្រួលក្នុងករណីរឿងនេះជារឿងពិត។
សូមបញ្ជាក់ថាតាមរយៈសំណុំរឿងមួយនេះ មហាជនក៏មានការលើកឡើងផងដែរនូវប្រធានបទស្រដៀងគ្នានេះតាមបណ្តាញសង្គម ដែលរំលេចពីភាពមិនប្រក្រតីនៃការតែងតាំងតំណែងមន្ត្រីកន្លងមកទាំងស៊ីវិល និងក្នុងជួរកងកម្លាំងប្រដាប់អាវុធ។ ទោះយ៉ាងណា អ្នកពាក់ព័ន្ធនឹងការតែងតាំងមិនប្រក្រតីនេះ មិនត្រូវបានរងពិន័យ ឬទទួលទណ្ឌកម្មកងកម្លាំងអ្វីទេ។
ក៏ប៉ុន្តែលោកនាយករដ្ឋមន្ត្រី ហ៊ុន ម៉ាណែត ក៏បានស្នើឲ្យមានការត្រួតពិនិត្យ និងវាយតម្លៃឲ្យបានច្បាស់លាស់ នូវបុគ្គលិកលក្ខណៈរបស់បុគ្គលនីមួយៗ ឲ្យបានហ្មត់ចត់មុននឹងធ្វើការតែងតាំងនៅតាមបណ្តាស្ថាប័នរដ្ឋទាំងស៊ីវិល និងកងកម្លាំងប្រដាប់អាវុធ ទាំងថ្នាក់ជាតិនិងថ្នាក់ក្រោមជាតិ។ នេះបើតាមសំណេរនៅលើហ្វេសប៊ុក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ