លោក ស ខេង បញ្ជាក់ជាថ្មីពីជំហរគាំទ្រមុតម៉ាំដល់រដ្ឋាភិបាលថ្មី និងទាត់ចោលព័ត៌មានបែកបាក់ផ្ទៃក្នុង
លោក ស ខេង ឧត្តមទីប្រឹក្សាព្រះមហាក្សត្រ និងជាអនុប្រធានគណបក្សប្រជាជនកម្ពុជាកាលពីថ្ងៃចន្ទម្សិលមិញបានចេញមកបញ្ជាក់ថាលោកធ្វើការអះអាងឡើងវិញនូវគោលជំហរឥតងាករេក្នុងការបន្តគំាទ្រ ដល់រាជរដ្ឋាភិបាលអាណត្តិទី៧ នៃរដ្ឋសភា ដែលដឹកនាំដោយលោកនាយករដ្ឋមន្ត្រី ហ៊ុន ម៉ាណែត។ ការបញ្ជាក់របស់លោក ស ខេង ដូច្នេះ គឺធ្វើឡើងបន្ទាប់ពីលោកមើលឃើញថាមជ្ឈដ្ឋានប្រឆាំងយករូបលោកធ្វើជាកម្មវត្ថុនៃការវាយប្រហារបំបែកបំបាក់ផ្ទៃក្នុងគណបក្សប្រជាជនកម្ពុជា។
ចុះផ្សាយនៅថ្ងៃ៖
ស្តាប់ - ០២:១៥
នៅក្នុងសំណេរចុះផ្សាយតាមហ្វេសប៊ុកផ្លូវការរបស់លោក លោក ស ខេង អនុប្រធានគណបក្សប្រជាជនកម្ពុជា និងជាឧត្តមទីប្រឹក្សាព្រះមហាក្សត្របានសរសេរថា នៅក្នុងរយៈពេលចុងក្រោយនេះ ជាពិសេសក្រោយពេលដែលរាជរដ្ឋាភិបាលអាណត្តិទី៧ នៃរដ្ឋសភា ត្រូវបានបង្កើតឡើង មជ្ឈដ្ឋានដែលមាននិន្នាការប្រឆាំងនៅតែបន្តលើកឡើងដដែលៗតាមរយៈបណ្តាញសង្គម សារព័ត៌មាននានា និងជាពិសេសតាមការឃោសនាអកុសល ប្រតិដ្ឋនូវព័ត៌មាននានាក្នុងបំណងដ៏កខ្វក់ ដើម្បីបំបែកបំបាក់ផ្ទៃក្នុងគណបក្សប្រជាជន ហើយបានយកឈ្មោះលោកជាប្រធានបទសម្រាប់បម្រើមហិច្ឆតាទុច្ចរិតរបស់ពួកគេ។
លោក ស ខេង បានបញ្ជាក់ថា ក្នុងនាមលោកជាអនុប្រធានគណបក្សប្រជាជនកម្ពុជា លោកគូសបញ្ជាក់ថា ការលើកឡើងរបស់មជ្ឈដ្ឋានដែលមាននិន្នាការប្រឆាំង ជាការប៉ុនប៉ងទាំងល្ងិតល្ងង់ក្នុងគ្រាអស់សង្ឃឹម និងជាការបំផុសបំផុលដ៏គ្រោះថ្នាក់ដល់ប្រទេសជាតិ ដោយលោកធ្វើការអំពាវនាវឲ្យក្រុមដែលលោកយល់ងថាជាជនអគតិ និងទុច្ចរិតទាំងនោះ បញ្ឈប់ជាបន្ទាន់រាល់ទង្វើទាំងឡាយណា ដែលប៉ះពាល់ដល់សន្តិភាព ស្ថិរភាពនយោបាយ និងរាំងស្ទះដល់ការអភិវឌ្ឍន៍សង្គម សេដ្ឋកិច្ចកម្ពុជា និងធ្វើឲ្យសាធារណជនមានការភ័ន្តច្រឡំលើគោលការណ៍ដឹកនាំដ៏របស់គណបក្សប្រជាជនកម្ពុជា។
ជាការកត់សម្គាល់លោក ស ខេង ឬពាក្យថាក្រុមលោក ស ខេង ត្រូវបានប្រព័ន្ធផ្សព្វផ្សាយនៅក្រៅប្រទេស និងអ្នកនយោបាយជំទាស់មួយចំនួន តែងលើកយកមកធ្វើជាប្រធានបទវែកញែក ដោយបង្កប់អត្ថន័យជាការបែកបាក់ និងជំលោះទាស់ទែងផ្ទៃក្នុងគណបក្សកាន់អំណាច។
ក៏ប៉ុន្តែ អតីតឧបនាយករដ្ឋមន្ត្រី និងជារដ្ឋមន្ត្រីក្រសួងមហាផ្ទៃរូបនេះ បានអះអាងជាថ្មីឡើងវិញនូវគោលជំហរឥតងាករេរបស់លោក ដែលថាលោកនៅតែបន្តគាំទ្រ និងលើកទឹកចិត្តតាមការដែលអាចធ្វើបានដល់រដ្ឋាភិបាលអាណត្តិទី៧ នៃរដ្ឋសភាដែលដឹកនាំដោយលោកនាយករដ្ឋមន្ត្រី ហ៊ុន ម៉ាណែត។
ការវាយប្រហារជុំវិញប្រធានបទនៃការបែកបាក់ផ្ទៃក្នុងបក្សកាន់អំណាចនេះដែរ កាលពីដើមខែសីហា ឆ្នាំ២០២៣ លោក ស ខេង ក៏បានចេញមកបញ្ជាក់ម្តងហើយថាគណបក្សប្រជាជនកម្ពុជាកំពុងមានឯកភាពផ្ទៃក្នុងរឹងមាំ និងទទួលបានទំនុកចិត្តពីប្រជាពលរដ្ឋឲ្យដឹកនាំប្រទេសជាបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ