ជប៉ុនចង់ផលិតទំនិញកែច្នៃតាមបច្ចេកវិទ្យាទំនើប ដោយប្រើវត្ថុធាតុដើមកម្ពុជា
នៅក្នុងជំនួបជាមួយនាយករដ្ឋមន្ត្រីថ្មីកម្ពុជា លោក ហ៊ុន ម៉ាណែត ប្រធានសមាគមជប៉ុន-កម្ពុជា លោក តាកាហាស៊ី ហ្វូមីអាគី ឲ្យដឹងថាអ្នកវិនិយោគជប៉ុននៃវិស័យសហគ្រាសធុនតូច និងមធ្យម មានចំណាប់អារម្មណ៍វិនិយោគនៅកម្ពុជា ដោយប្រើប្រាស់បច្ចេកវិទ្យាទំនើបរបស់ជប៉ុន ដោយប្រើប្រាស់វត្ថុធាតុដើមកម្ពុជា។ ការលើកឡើងរបស់ប្រធានសមាគមជប៉ុន-កម្ពុជាដូច្នេះ ធ្វើឡើងស្របពេលដែល កម្ពុជា និងជប៉ុន កំពុងក្លាយទៅជាដៃគូយុទ្ធសាស្ត្រគ្រប់ជ្រុងជ្រោយ។
ចុះផ្សាយនៅថ្ងៃ៖
ប្រធានសមាគមជប៉ុន-កម្ពុជា លោក តាកាហាស៊ី ហ្វូមីអាគី ដែលជាអតីតឯកអគ្គរដ្ឋទូតជប៉ុនប្រចាំកម្ពុជាផងនោះ បានថ្លែងឲ្យដឹងថាវិស័យសហគ្រាសធុនតូច និងមធ្យមជប៉ុន(SMEs) បានបង្ហាញនូវចំណាប់អារម្មណ៍ចំពោះវិស័យសំខាន់ៗ ២ គឺទី១ ការផលិតទំនិញកែច្នៃ ដែលប្រើប្រាស់វត្ថុធាតុដើមកម្ពុជា ដោយប្រើបច្ចេកវិទ្យាទំនើបជប៉ុន ដើម្បីផលិតជាផលិតផលសម្រេចសម្រាប់នាំចេញ និងទី២ គឺការបណ្តុះបណ្តាលជំនាញវិជ្ជាជីវៈ ដោយផ្តោតលើសេវាបដិសណ្ឋារកិច្ច មេកានិក យានយន្ត (សេវាជួសជុលរថយន្តជប៉ុន) ការតុបតែង និងកែសម្ផស្ស សេវាថែទាំអ្នកជំងឺ-មនុស្សចាស់ និងជំនាញបច្ចេកវិទ្យាព័ត៌មាន និងឌីជីថល។
ការលើកឡើងរបស់ប្រធានសមាគមជប៉ុន-កម្ពុជា ត្រូវបានឆ្លើយតបជាវិជ្ជមានដោយលោក ហ៊ុន ម៉ាណែត ដោយលោកនាយករដ្ឋមន្ត្រីជម្រុញឲ្យសមាគមធុរកិច្ចជប៉ុនសហការ និងបង្កើនទំនាក់ទំនងការងារជាមួយភាគីពាក់ព័ន្ធកម្ពុជា ដើម្បីសម្រេចបាននូវវត្ថុបំណងទាំងនេះ ខណៈដែលលោកត្រៀមខ្លួនជាស្រេចដើម្បី សម្របសម្រួល និងគាំទ្រធុរកិច្ចជប៉ុនតាមរយៈគោលនយោបាយ និងកញ្ចប់លើកទឹកចិត្តដ៏ទាក់ទាញ។
ជាការកត់សម្គាល់ទំនាក់ទំនងមិត្តភាពកម្ពុជា-ជប៉ុន រយៈពេល៧០ឆ្នាំកន្លងទៅនេះ បានរុញច្រានប្រទេសទាំងពីរឲ្យឈរនៅចំណុចដៃគូយុទ្ធសាស្ត្រគ្រប់ជ្រុងជ្រោយ បន្ទាប់ពីទំនាក់ទំនងចិន-កម្ពុជា។ ជប៉ុនជាប្រទេសដែលមានវិនិយោគិនមកបណ្តាក់ទុននៅកម្ពុជាលំដាប់ទី៤។ ជប៉ុន និងចិន ជាប្រទេសពីរនាំមុខគេក្នុងការផ្តល់ជំនួយឥតសំណង និងផ្តល់ឥណទានឥតការប្រាក់ជាច្រើនដល់កម្ពុជា។ ក៏ប៉ុន្តែជំនួយជប៉ុន មិនបានរងនូវការរិះគន់ដូចជាជំនួយចិននោះទេ។ នេះបើតាមការកត់សម្គាល់ពីអ្នកតាមដានសង្គមនានា។
សូមរំលឹកថា ការផ្លាស់ប្តូរទំនិញរវាងកម្ពុជា និងជប៉ុនគិតត្រឹមរយៈពេល៧ខែឆ្នាំ២០២៣នេះ មានសរុបជាង ១ពាន់លានដុល្លារ ថយចុះ ៩,៩% ធៀបទៅនឹងរយៈពេលដូចគ្នាកាលពីឆ្នាំ២០២២ ដែលមាន ១,១៣ ពាន់លានដុល្លារ។ ការនាំទំនិញពីកម្ពុជាទៅជប៉ុនមានទឹកប្រាក់ជាង ៦៥០លានដុល្លារ ធ្លាក់ចុះ ១,៩% ហើយជប៉ុននាំចូលមកកម្ពុជាមានប្រមាណ ៣៧០លានដុល្លារ ធ្លាក់ចុះជាង ២១%។ នេះបើតាមរបាយការណ៍អគ្គនាយកដ្ឋានគយ និងរដ្ឋាករកម្ពុជា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ