លោក ហ៊ុន សែន សរសើរកូនប្រុសច្បងលោកថាធ្វើបានល្អជាងការរំពឹងទុក
នៅលើឆាណែល តេឡេក្រាមរបស់លោក លោក ហ៊ុន សែន អតីតនាយករដ្ឋមន្ត្រី បច្ចុប្បន្នជាប្រធានគណបក្សប្រជាជនកម្ពុជា បានចេញមកសរសើរកូនប្រុសច្បងរបស់លោក គឺលោក ហ៊ុន ម៉ាណែត ដោយលោកហ៊ុន សែន វាយតម្លៃថាសមត្ថភាពគ្រប់គ្រងសភាពការណ៍របស់លោក ហ៊ុន ម៉ាណែត ក្នុងតួនាទីជានាយករដ្ឋមន្ត្រី ធ្វើបានល្អជាងការគិតទុកជាមុនរបស់លោក។ ការបញ្ជាក់របស់លោក ហ៊ុនសែន ដូច្នេះធ្វើឡើងខណៈដែលរដ្ឋាភិបាលថ្មីដឹកនាំដោយលោក ហ៊ុន ម៉ាណែត បានចេញដំណើរមិនទាន់បាន១ខែផង។
ចុះផ្សាយនៅថ្ងៃ៖
ស្តាប់ - ០២:៥០
«ត្រូវលោតទៅក្នុងទឹកទើបចេះហែលទឹក»។ នេះជាសំណេររបស់លោក ហ៊ុន សែន នៅលើឆាណែលតេឡេក្រាមរបស់លោកកាលពីថ្ងៃទី១៤ ខែកញ្ញា ម្សិលមិញ។ លោក ហ៊ុន សែន សរសេរបន្តថា លោកកំពុងតាមសង្កេតមើលសកម្មភាពរបស់នាយករដ្ឋមន្ត្រីថ្មី ទាំងការងារក្នុងប្រទេស និងការងារក្រៅប្រទេស ព្រមទាំងលើកឡើងថា ដោយធ្លាប់អនុវត្តផ្ទាល់លើមុខដំណែងជានាយករដ្ឋមន្ត្រីអស់រយៈពេលជាង៣៨ឆ្នាំ លោកអាចនិយាយបានថា នាយករដ្ឋមន្ត្រី ហ៊ុន ម៉ាណែត ធ្វើបានល្អជាងការគិតទុករបស់លោកទៅទៀត។
លោក ហ៊ុន សែន ការពារខ្លួនថាមិនមែននិយាយលើកសរសើរកូនខ្លួនឯងនោះទេ មុននេះលោកគិតថាត្រូវប្រើពេលប្រមាណ៣ខែ ទើបនាយករដ្ឋមន្ត្រីថ្មីអាចគ្រប់គ្រងលើការងារបានទាំងស្រុង។ ក៏ប៉ុន្តែអតីតប្រមុខរដ្ឋាភិបាលកម្ពុជា បន្តថាផ្ទុយពីការគិតរបស់លោក នាយករដ្ឋមន្ត្រីថ្មីរូបនេះចេញដំណើរ ដោយការជឿជាក់គ្រប់គ្រងបានសភាពការណ៍លើគ្រប់ផ្នែក ទាំងតូចទាំងធំក្នុងប្រទេស និងឈានទៅសម្រេចបាននូវកិច្ចការបរទេស តាមរយៈវេទិកាអាស៊ាន និងដៃគូ និងដំណើរទស្សនកិច្ចផ្លូវការលើកដំបូង ទៅកាន់ប្រទេសចិន និងត្រៀមខ្លួនចេញដំណើរទៅចូលរួមមហាសន្និបាតអង្គការសហប្រជាជាតិនាសប្តាហ៍ក្រោយ។
លោកបណ្ឌិត មាស នី អ្នកសិក្សាការអភិវឌ្ឍន៍សង្គមយល់ថាអាចជាការវាយតម្លៃពីជ្រុងណាមួយរបស់លោក ហ៊ុន សែន ខណៈដែលលោក ហ៊ុន ម៉ាណែត បានចេញទៅក្រៅប្រទេសដូចជាចូលរួមកិច្ចប្រជុំកំពូលអាស៊ានថ្មីៗនេះ នៅឥណ្ឌូនេស៊ី និងការបំពេញទស្សនកិច្ចនៅប្រទេសចិនជាដើម។ ក៏ប៉ុន្តែសម្រាប់ការគ្រប់គ្រងប្រទេសទាំងមូលលោក មាស នី ថាហាក់ដូចជាឆាប់ពេលក្នុងការវាយតម្លៃ។ ទោះយ៉ាងណាលោកបណ្ឌិត មាស នី គិតថាការគ្រប់គ្រងប្រទេសទូទៅក៏មិនមានបញ្ហាអ្វីកើតឡើងជាធំដុំ និងចម្លែកដែរ ដោយសារអ្នកដឹកនាំរដ្ឋាភិបាលថ្មីសុទ្ធសឹងមានឪពុក ម្តាយ ពួកគេនៅចាំជួយពីក្រោយរៀងៗខ្លួន។
ទោះយ៉ាងណា លោក ហ៊ុន សែន ក៏បានលេងពាក្យចុងបញ្ចប់នៃសំណេររបស់លោកថា«កូននាគរាជច្បាស់ជាមិនក្លាយទៅកូនកង្កែបនោះឡើយ»។
សូមរំលឹកថាលោក ហ៊ុន ម៉ាណែត ត្រូវបានជ្រើសតាំងជានាយករដ្ឋមន្ត្រីសម្រាប់នីតិកាលទី៧ នៃរដ្ឋសភា កាលពីថ្ងៃទី២២ ខែសីហា ឆ្នាំ២០២៣នេះ ក្រោយគណបក្សប្រជាជនបានឈ្នះឆ្នោត១២០អាសនៈ លើ១២៥អាសនៈនៃរដ្ឋសភា។
សមាសភាពរដ្ឋាភិបាលថ្មីស្ទើរតែទាំងអស់ជាកូន ចៅ មេដឹកនាំគណបក្សប្រជាជន ដែលមានឪពុកម្តាយរបស់ពួកគេជាជន្ទល់នៅពីក្រោយ។ ក្រៅពីនេះរដ្ឋាភិបាលក៏បានទាញយកមនុស្សពីខាងក្រៅដ៏ច្រើនសន្ធឹកសន្ធាប់ឲ្យចូលរួមធ្វើជាជន្ទល់ហែរហម ផ្តល់យោបល់ និងជួយការងារ ជាហេតុធ្វើឲ្យមានការរិះគន់ថារដ្ឋាភិបាលក្បាលធំជាងខ្លួន ខណៈមតិខ្លះទៀតយល់ថារដ្ឋាភិបាលថ្មីមានមូលដ្ឋាន និងធនធានមនុស្សគ្រប់គ្រាន់ និងចេញដំណើរយ៉ាងស្វាហាប់ បើដឹកនាំមិនមានលទ្ធផលល្អ នោះគឺជាកំហុសដ៏ធ្ងន់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ