ដំណោះស្រាយ៖ បក្សភ្លើងទៀននឹងសរសេរលិខិតសុំលោក ហ៊ុន ម៉ាណែត និងចងសម្ព័ន្ធជាមួយបក្សដទៃ
ដើម្បីរកច្រកចេញគណបក្សភ្លើងទៀន នឹងសរសេរលិខិតទៅកាន់លោក ហ៊ុន ម៉ាណែត នាយករដ្ឋមន្ត្រីនៃកម្ពុជា ទាក់ទងទៅនឹងឯកសារបញ្ជាក់ការចុះបញ្ជីគណបក្សនយោបាយនៅក្រសួងមហាផ្ទៃ និងចងសម្ព័ន្ធភាពជាមួយគណបក្សផ្សេងទៀត ដែលមានទស្សនៈ និងជំហរនយោបាយដូចគ្នាទៅអនាគត។ ការសម្រេចដូច្នេះបានធ្វើឡើងបន្ទាប់ពីគណបក្សភ្លើងទៀនបានបើកកិច្ចប្រជុំមួយនៅថ្ងៃចន្ទនេះ នៅទីស្នាក់ការធំគណបក្សនាទីក្រុងភ្នំពេញ ក្រោយបរាជ័យជំនួបជាមួយក្រសួងមហាផ្ទៃកាលពីសប្តាហ៍មុន។
ចុះផ្សាយនៅថ្ងៃ៖
ស្តាប់ - ០១:៥២
ក្រោយកិច្ចពិភាក្សាពេញមួយព្រឹកស្តីពី«លទ្ធផលនៃកិច្ចប្រជុំរវាងតំណាងជាន់ខ្ពស់ក្រសួងមហាផ្ទៃ និងតំណាងគណបក្សភ្លើងទៀន ស្តីពីការរកដំណោះស្រាយពាក់ព័ន្ធនឹងឯកសារលិខិតបញ្ជាក់ការចុះបញ្ជីគណបក្សនយោបាយនៅក្រសួងមហាផ្ទៃ គណៈកម្មការនាយកគណបក្សបានសម្រេចពីរចំណុច។
ចំណុចទី១ គឺសរសេរលិខិតស្នើសុំលោកនាយករដ្ឋមន្ត្រី ហ៊ុន ម៉ាណែត ដើម្បីជួយធ្វើអន្តរាគមន៍ទៅក្រសួងមហាផ្ទៃ ដែលជាស្ថាប័នមានសមត្ថកិច្ចក្នុងការចេញប្រកាសស្តីពីការចុះឈ្មោះក្នុងបញ្ជីគណបក្សនយោបាយ ឲ្យជួយផ្តល់ដំណោះស្រាយពាក់ព័ន្ធឯកសារ «លិខិតបញ្ជាក់ការចុះបញ្ជីគណបក្សនយោបាយនៅក្រសួងមហាផ្ទៃ របស់គណបក្សភ្លើងទៀន» សម្រាប់គណបក្សនេះយកទៅប្រើប្រាស់ក្នុងការចុះបញ្ជីគណបក្សនយោបាយឈរឈ្មោះបោះឆ្នោតស្របតាមច្បាប់បោះឆ្នោត។
រីឯចំណុចទី២នៃការសម្រេចរបស់គណៈកម្មការនាយកវិញ គឺគណបក្សភ្លើងទៀន នឹងប្រកាសចងសម្ព័ន្ធភាពឆ្ពោះទៅអនាគត ជាមួយគណបក្សមួយចំនួនដែលមានទស្សនៈ និងគោលជំហរនយោបាយដូចគ្នា។
ការសម្រេចដូច្នេះរបស់គណបក្សភ្លើងទៀន ដែលជាគណបក្សប្រឆាំងដ៏លេចធ្លោមួយ គឺធ្វើឡើងបន្ទាប់ពីក្រសួងមហាផ្ទៃកាលពីថ្ងៃទី២១ ខែកញ្ញា កន្លងទៅបានទាត់ចោលសំណើររបស់គណបក្សភ្លើងទៀននូវចំណុចមួយចំនួន ដែលទាក់ទងទៅនឹងការស្នើសុំចុះបញ្ជីគណបក្សនយោបាយច្បាប់ដើម ឬលិខិតទុតិយតារបស់គណបក្ស ដោយក្រសួងមហាផ្ទៃអះអាងថា ក្រសួងមិនអាចជ្រៀតជ្រែកកិច្ចការរបស់ស្ថាប័នគណៈកម្មាធិការជាតិរៀបចំការបោះឆ្នោតបានឡើយ។
សូមរំលឹកថាគណបក្សភ្លើងទៀន ត្រូវបានផាត់ចោលពីការបោះឆ្នោតជ្រើសតាំងតំណាងរាស្ត្រនីតិកាលទី៧ កាលពីថ្ងៃទី២៣ ខែកក្កដា កន្លងទៅ ក្រោមហេតុផលខ្វះឯកសារច្បាប់ដើម ដែលឯកសារនេះត្រូវបានគណបក្សបញ្ជាក់ថាបានបាត់បង់កាលពីអំឡុងអាជ្ញាធរបិទទីស្នាក់ការធំរបស់គណបក្សសង្គ្រោះជាតិ ខណៈដែលទីស្នាក់ការគណបក្សភ្លើងទៀនស្ថិតនៅក្នុងនោះជាមួយគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ