លោក ស សុខាបញ្ជាឲ្យបញ្ឈប់ការយកកម្រៃក្រៅផ្លូវការពីអ្នកឆ្លងដែន
រដ្ឋមន្ត្រីក្រសួងមហាផ្ទៃ នៅថ្ងៃទី៣តុលាម្សិលមិញ បានចេញលិខិតបញ្ជាទៅកាន់អភិបាលខេត្តតាមព្រំដែនឲ្យបិទច្រករបៀងខុសច្បាប់ទាំងអស់ ដើម្បីធានាសន្តិសុខ និងឲ្យបញ្ឈប់ជាបន្ទាន់ការចេញឯកសារមិនប្រក្រតី និងយកកម្រៃក្រៅផ្លូវការពីពលករ និងពលរដ្ឋទូទៅដែលឆ្លងកាត់ព្រំដែន ព្រោះនេះផ្ទុយពីកិច្ចព្រមព្រៀងជាមួយប្រទេសជិតខាង។
ចុះផ្សាយនៅថ្ងៃ៖
ស្តាប់ - ០២:២៧
បទបញ្ជារបស់លោកឧបនាយករដ្ឋមន្ត្រី ស សុខា គឺធ្វើឡើងដោយសារតែសង្កេតឃើញថា នៅតាមព្រំដែនខេត្តមួយចំនួនមានភាពមិនប្រក្រតីកើតចេញពីការធ្វេសប្រហែសឲ្យមានការលួចលាក់បើកច្រករបៀងខុសច្បាប់ និងយកកម្រៃក្រៅផ្លូវការពីពលករ និងពលរដ្ឋទូទៅនៅពេលឆ្លងកាត់តាមច្រកទ្វារព្រំដែន។
នៅក្នុងបទបញ្ជាដែលមាន៧ចំណុច លោក ស សុខា បានគូសបញ្ជាក់ថា ក្នុងករណីចាំបាច់ត្រូវសិក្សាផ្នែកសេដ្ឋកិច្ច ដើម្បីស្នើបើកច្រកផ្លូវការ និងត្រូវចាត់វិធានការពង្រឹងការគ្រប់គ្រង អ្នកដំណើរ ទំនិញ និងមធ្យោបាយឆ្លងកាត់សំដៅទប់ស្កាត់បទល្មើសឆ្លងដែន។
លោក ស សុខា ជំរុញឲ្យមន្ត្រីផ្តល់សេវាដល់ពលរដ្ឋដោយគ្មានការរើសអើង និងចាត់វិធានការបង្ក្រាបមេខ្យល់ និងអ្នកសមគំនិតដែលនាំពលករឆ្លងដែនខុសច្បាប់។
បើតាមក្រសួងមហាផ្ទៃ បន្ថែមពីលើបទបញ្ជានេះ ក្រសួងនឹងចាត់ក្រុមជំនាញចុះទៅពិនិត្យដោយផ្ទាល់ដល់មូលដ្ឋានខេត្តដែលពាក់ព័ន្ធ ហើយបើរកឃើញថា មានភាពមិនប្រក្រតីកើតឡើង នោះនឹងមានវិធានការតាមផ្លូវច្បាប់។
សូមបញ្ជាក់ថា ប្រមុខរដ្ឋាភិបាលលោក ហ៊ុន ម៉ាណែត កាលពីថ្ងៃទី១៣ ខែកញ្ញា បានបង្កើតគណៈកម្មការចំពោះកិច្ចត្រួតពិនិត្យ និងដោះស្រាយបញ្ហាដំណើរចេញ ចូលរបស់ពលករខ្មែរតាមព្រំដែនកម្ពុជា។
គណៈកម្មការចំពោះកិច្ចនេះ មានលោក នេត សាវឿន ឧបនាយករដ្ឋមន្ដ្រី ជាប្រធាន អមដោយអនុប្រធានប្រចាំការ១រូប អនុប្រធាន២រូប និងសមាជិកជាច្រើនរូបផ្សេងទៀត។
គណៈកម្មការនេះ ត្រូវត្រួតពិនិត្យការអនុវត្តវិធានការនានាដែលបានដាក់ចេញដោយរាជរដ្ឋាភិបាល ដោយជំរុញដល់អាជ្ញាធរមានសមត្ថកិច្ចពាក់ព័ន្ធនៅតាមព្រំដែន ជួយសម្រួលដំណើរចេញ ចូលរបស់ពលករខ្មែរ និងដោះស្រាយបណ្ដឹងតវ៉ានានា។ លើសពីនេះ ក៏ត្រូវស្រាវជ្រាវលើភាពមិនប្រក្រតី ដែលបង្កការរំខានដល់ដំណើរចេញចូល ឬប៉ះពាល់ដល់ផលប្រយោជន៍របស់ពលករខ្មែរតាមព្រំដែន។ រៀបចំឲ្យមានប្រព័ន្ធឆ្លើយតបបន្ទាន់ចំពោះភាពមិនប្រក្រតី និងសិក្សាអំពីស្ថានភាពនៃការយកកម្រៃក្រៅផ្លូវការ និងដាក់ចេញវិធានការ ដើម្បីលុបបំបាត់ការយកកម្រៃក្រៅផ្លូវការពីអ្នកធ្វើដំណើរចេញចូលនៅច្រកទ្វារព្រំដែន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ