បក្សភ្លើងទៀនត្រៀមសម្ព័ន្ធភាពឆ្ពោះទៅអនាគត ដើម្បីចូលរួមបោះឆ្នោត២០២៧-២០២៨
គណបក្សចំនួន៤ គឺគណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជាបានប្រកាសពីការបង្កើតសម្ព័ន្ធភាពឆ្ពោះទៅអនាគត ដែលការប្រកាសនេះនឹងត្រូវធ្វើឡើងនៅថ្ងៃពុធស្អែក។ ជាការកត់សម្គាល់សម្ព័ន្ធភាពរបស់គណបក្សទាំង៤ ធ្វើឡើងបន្ទាប់ពីក្រសួងមហាផ្ទៃបានច្រានចោលការចេញលិខិតបញ្ជាក់ស្តីពីការចុះបញ្ជីគណបក្សនយោបាយឲ្យគណបក្សភ្លើងទៀន កាលពីចុងខែកញ្ញាកន្លងទៅ។
ចុះផ្សាយនៅថ្ងៃ៖
គណបក្សក្រៅរដ្ឋាភិបាលទាំង៤ គឺគណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជា បានប្តេជ្ញាបង្កើត«សម្ព័ន្ធភាពឆ្ពោះទៅអនាគត» បើមើលមួយភ្លែត រូបភាពដូចនេះមិនមែនជារឿងថ្មីនោះទេ គឺការចងសម្ព័ន្ធភាពគណបក្សទាំង៤ ក៏ត្រូវបានបង្ហាញកាលពីមុនការបោះឆ្នោតជ្រើសតាំងតំណាងរាស្ត្រនីតិកាលទី៧ផងដែរ។ ក៏ប៉ុន្តែខ្លឹមសារនៃសម្ព័ន្ធភាពក្រោយការបោះឆ្នោតនៅពេលនេះ មានលក្ខណៈខុសគ្នា។
លោក គង់ មុនីកា អគ្គលេខាធិការស្តីទីគណបក្សភ្លើងទៀន និងជាស្ថាបនិកគណបក្សឆន្ទៈខ្មែរ បានពន្យល់ថាសម្ព័ន្ធភាពរវាងគណបក្សទាំង៤កន្លងទៅគឺជាការរួមគ្នាតស៊ូមតិលើបញ្ហាសំខាន់ៗមួយចំនួនដូចជាការទាមទារឲ្យមានកំណែទម្រង់គណៈកម្មាធិការជាតិរៀបចំការបោះឆ្នោត(គ.ជ.ប)ជាដើម។
ដោយឡែក សម្ព័ន្ធភាពឆ្ពោះទៅអនាគត ដែលនឹងចាប់ផ្តើមផ្លូវការនៅថ្ងៃពុធ គឺសំដៅទៅរកការរួមកម្លាំងអ្នកប្រជាធិបតេយ្យសម្រាប់ការបោះឆ្នោតឆ្នាំ២០២៧-២០២៨ ខាងមុខ។ នេះបើតាមលោក គង់ មុនីកា។
ពាក់ព័ន្ធនឹងសម្ព័ន្ធភាពឆ្ពោះទៅអនាគតនេះដែរ លោក ឯម សុវណ្ណារ៉ា សាស្ត្រាចារ្យផ្នែកវិទ្យាសាស្ត្រនយោបាយ បានមើលឃើញថាការចងសម្ព័ន្ធភាពនឹងគ្នារវាងគណបក្សក្រៅរដ្ឋាភិបាលទាំង៤ គឺជាការល្អ ជាជាងការស្ថិតនៅបែកខ្ញែកគ្នា ក៏ប៉ុន្តែនៅតែមិនមែនជាគូប្រជែងរបស់គណបក្សប្រជាជនកម្ពុជាដដែល។
តាមលោក ឯម សុវណ្ណារ៉ា គណបក្សសម្ព័ន្ធនៅតែមានឥទ្ធិពលប្រជែងនឹងបក្សកាន់អំណាចបាន ល្គឹកណាគណបក្សទាំង៤ច្របាច់បញ្ជូលគ្នាជាគណបក្សតែមួយទៅអនាគត ហើយកៀងគរកម្លាំងគណបក្សប្រជាធិបតេយ្យផ្សេងៗទៀតឲ្យចូលគ្នាកាន់តែច្រើនសម្រាប់ការបោះឆ្នោតឆ្នាំ២០២៧-២០២៨ នោះទើបអាចទាញការចាប់អារម្មណ៍ និងការគាំទ្រពីប្រជាពលរដ្ឋបាន។
សូមរំលឹកថាក្រោយពីក្រសួងមហាផ្ទៃច្រានចោលសំណើរសុំធ្វើលិខិតបញ្ជាក់ការចុះបញ្ជីគណបក្សនយោបាយឲ្យគណបក្សភ្លើងទៀន គណៈកម្មាធិការនាយកគណបក្សប្រឆាំងមួយនេះ បានសម្រេចកាលពីថ្ងៃទី២៥ ខែកញ្ញាកន្លងទៅចំនួន២ចំណុច គឺការសរសេរលិខិតសុំអន្តរាគមន៍ពីលោកនាយករដ្ឋមន្ត្រី ហ៊ុន ម៉ាណែត ធ្វើយ៉ាងណាឲ្យមានលិខិតចុះបញ្ជីគណបក្សនយោបាយ ដើម្បីចូលរួមការបោះឆ្នោតនាពេលខាងមុខ និងការប្រកាសចងសម្ព័ន្ធភាពឆ្ពោះទៅអនាគតជាមួយគណបក្សមួយចំនួន ដែលមានទស្សនៈ និងគោលជំហរនយោបាយដូចគ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ