ប្រធានស្តីទីបក្សភ្លើងទៀនយល់ថាការដើរបែកគ្នាកន្លងមកជាបរាជ័យ និងជាបទពិសោធន៍
គណបក្សក្រៅរដ្ឋាភិបាលចំនួន៤ គឺគណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជា នៅព្រឹកថ្ងៃពុធនេះ បានចុះហត្ថលេខាចងសម្ព័ន្ធនឹងគ្នា ដែលមានឈ្មោះថា«សម្ព័ន្ធភាពឆ្ពោះទៅអនាគត»។ ពិធីចងសម្ព័ន្ធនេះ បានធ្វើឡើងនៅក្នុងសណ្ឋាគារប្រណីតមួយក្នុងក្រុងភ្នំពេញ ដោយគណបក្សទាំង៤ យោងទៅលើមាត្រា៣៧ នៃច្បាប់ស្តីពីគណបក្សនយោបាយ។
ចុះផ្សាយនៅថ្ងៃ៖
ស្តាប់ - ០២:២៣
លោក សុខ ហាច តំណាងឲ្យគណបក្សភ្លើងទៀន លោក យ៉េង វីរៈ តំណាងឲ្យគណបក្សប្រជាធិបតេយ្យមូលដ្ឋាន លោក ផល ស៊ីថុន តំណាងឲ្យគណបក្សឆន្ទៈខ្មែរ និងលោក ប៉ុល ហំម តំណាងឲ្យគណបក្សកែទម្រង់កម្ពុជា បានចុះហត្ថលេខារួមគ្នានៅក្នុងឯកសារមួយ ដែលជាសេចក្តីថ្លែងការណ៍រួមស្តីពី«សម្ព័ន្ធភាពឆ្ពោះទៅអនាគត»។
តាមសេចក្តីប្រកាសរួមរបស់គណបក្សទាំង៤ សម្ព័ន្ធភាពឆ្ពោះទៅអនាគត នឹងក្លាយជាកម្លាំងចលករថ្មីមួយសម្រាប់ជាការជំរុញ និងលើកទឹកចិត្ត ព្រមទាំងជាជម្រើសរបស់ពលរដ្ឋខ្មែរក្នុងការចូលរួមកសាងសង្គមប្រជាធិបតេយ្យ យុត្តិធម៌សង្គម ការអភិវឌ្ឍន៍ប្រកបដោយសមធម៌ និងចីរភាព ព្រមទាំងភាពសុខដុមរមនាសម្រាប់ប្រជាជាតិខ្មែរទាំងមូលនាពេលអនាគត។
លោក សុខ ហាច ប្រធានស្តីទីគណបក្សភ្លើងទៀន បានថ្លែងឲ្យដឹងថាការធ្វើសម្ព័ន្ធភាពរបស់គណបក្សទាំង៤នៅពេលនេះ គឺជាក់ស្តែងបន្ទាប់ពីគណបក្សទាំង៤មិនទទួលបានសម្លេងអ្វីទាំងអស់នៅក្នុងរដ្ឋសភា បន្ទាប់ពីពួកគេបានសាកល្បងកម្លាំងដោយឡែកៗពីគ្នា តាមរយៈការបោះឆ្នោតកាលពីពេលថ្មីៗនេះ។លោក សុខ ហាច បានហៅលទ្ធផលនេះជាបរាជ័យ និងជាបទពិសោធន៍មួយដែលគណបក្សទាំង៤ត្រូវលើកយកមកធ្វើជាឧទាហរណ៍។
លោក យ៉េង វីរៈ ប្រធានគណបក្សប្រជាធិបតេយ្យមូលដ្ឋាន បានចាត់ទុកការចងសម្ព័ន្ធភាពរបស់គណបក្សទាំង៤នៅពេលនេះ គឺចំពេលវេលាមួយដែលមានសិរិសួស្តី បន្ទាប់ពីគោលបំណងនេះ មិនអាចធ្វើទៅបានកាលពីមុនការបោះឆ្នោតតំណាងរាស្ត្រនីតិកាលទី៧។
លោក ប៉ុល ហំម ប្រធានគណបក្សកែទម្រង់កម្ពុជាមានជំនឿថាសម្ព័ន្ធភាពឆ្ពោះទៅអនាគតនឹងមានភាពរឹងមាំ និងមានការចូលរួមពីអ្នកប្រជាធិបតេយ្យកាន់តែច្រើន ខណៈដែលសម្ព័ន្ធភាពអ្នកប្រជាធិបតេយ្យត្រូវបានធ្វើ២ដងរួចមកហើយចាប់តាំងពីឆ្នាំ១៩៩៧មក នៅទីក្រុងបាងកក ប្រទេសថៃ និងនៅទីក្រុងម៉ានីលប្រទេសហ្វីលីពីន។
ជាមួយគ្នានេះ គណបក្សទាំង៤ ក៏បានប្តេជ្ញាចិត្តរៀងខ្លួនដែរថាសម្ព័ន្ធភាពនេះ នឹងមិនអាចបែកបាក់គ្នាទេ ខណៈដែលការបែកបាក់សម្ព័ន្ធភាពកន្លងមក ត្រូវបានអ្នកនយោបាយបក្សក្រៅរដ្ឋាភិបាលទំលាក់កំហុសទៅលើកត្តាផ្សេងៗទៀត ក្រៅពីសម្ព័ន្ធភាព។
ទោះយ៉ាងណា លោក ឯម សុវណ្ណារ៉ា សាស្ត្រាចារ្យផ្នែកវិទ្យាសាស្ត្រនយោបាយយល់ឃើញថាការច្របាច់បញ្ចូលគ្នារបស់គណបក្សនយោបាយក្រៅរដ្ឋាភិបាលទាំងនេះ គឺជារឿងល្អបន្ថែមពីលើបញ្ហាសម្ព័ន្ធភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ