ខេត្តកែបប្រឈមនឹងការបាត់ទេសចរកាន់តែច្រើនក្រោយបើកការដ្ឋានផ្លូវជាង៣ឆ្នាំ?
ខេត្តកែប នឹងរៀបចំបុណ្យសមុទ្រលើកទី១០ នៅចុងខែធ្នូ ឆ្នាំ២០២៣នេះ បន្ទាប់ពីពិធីបុណ្យនេះ ត្រូវបានប្រារព្ធធ្វើនៅខេត្តព្រះសីហនុកាលពីឆ្នាំ២០២២។ ក៏ប៉ុន្តែអ្វីដែលគួរចាប់អារម្មណ៍គឺ ការធ្វើដំណើររបស់ទេសចរទៅកាន់ខេត្តកែប ដើម្បីកម្សាន្ត និងចូលរួមបុណ្យសមុទ្រ អាចត្រូវបានរំខានដោយផ្លូវថ្នល់ ដែលកំពុងស្ថិតនៅជាការដ្ឋានដីក្រហម គ្រលុក និងភាពស្រកេកស្រកាកនៅឡើយ។
ចុះផ្សាយនៅថ្ងៃ៖
ស្តាប់ - ០៣:១៣
ការធ្វើដំណើរតាមផ្លូវជាតិលេខ៣១ ពីភ្នំពេញទៅខេត្តកែប ក៏ដូចជាធ្វើដំណើរពីខេត្តកែបទៅខេត្តកំពត តាមផ្លូវជាតិលេខ៣៣ មានសភាពពិបាកនៅអំឡុងពេលនេះ ដោយសារតែផ្លូវថ្នល់មានគ្រលុកតូចធំជាច្រើន និងហុយដីក្រហមខ្លាំង។ ស្ថានភាពបែបនេះ ជំរុញឲ្យអ្នកធ្វើដំណើរតាមរថយន្ត ត្រូវចំណាយពេលវេលាច្រើនម៉ោងជាងសព្វមួយដងទំរាំដល់គោលដៅ។
តាមពិតផ្លូវជាតិលេខ៣៣ និងលេខ ៣១នេះ កំពុងស្ថិតក្នុងដំណាក់កាលសាងសង់ និងជួសជុលឡើងវិញរយៈពេល៤០ខែ រហូតដល់ឆ្នាំ២០២៦ ដោយក្រុមហ៊ុនសាជីវកម្មស្ពាន ថ្នល់ចិន(CRBC)។ អំឡុងពេលនៃការដ្ឋាននេះ ទេសចរណ៍នៅតំបន់មាត់សមុទ្រនៃខេត្តកែប បានរងនូវផលប៉ះពាល់បន្ថែមទៀត បន្ទាប់ពីខេត្តនេះ បានរងគ្រោះរួចមកហើយតាមរយៈវិបត្តិសេដ្ឋកិច្ចសកល និងឥទ្ធិពលនៃជំងឺកូវីដ-១៩។
អាជីវកម្ម និងសេវាកម្មវិស័យទេសចរណ៍ខេត្តកែប កំពុងរងនូវការធ្លាក់ចុះចំនួនភ្ញៀវទេសចរបន្ថែមទៀត បន្ទាប់ពីខេត្តនេះ ក៏ដូចជាតំបន់ដទៃដែរ បានរងនូវឥទ្ធិពលនៃវិបត្តិសេដ្ឋកិច្ចពិភពលោក និងវិបត្តិជំងឺកូវីដ-១៩។ ដោយសារបញ្ហាហិរញ្ញវត្ថុ ប្រជាជនខ្មែរមួយភាគ ដែលជាជន្ទល់ទេសចរណ៍ក្នុងស្រុកបានកាត់បន្ថយការដើរកំសាន្តរបស់ពួកគេ ខណៈខេត្តកែប ដែលជាខេត្តទេសចរណ៍មាត់សមុទ្រ ក៏ត្រូវបានបាត់បង់ភ្ញៀវជាច្រើនដែរ លើកលែងតែថ្ងៃសៅរ៍ និងថ្ងៃអាទិត្យ។
លោក ជា នឿន ម្ចាស់ទូកទេសចរណ៍មួយរូបនៅខេត្តកែប បានកត់សម្គាល់ថាមួយរយៈចុងក្រោយនេះ លោក និងភ្នាក់ងារសេវាកម្មទេសចរណ៍ផ្សេងទៀតបានប្រឈមនឹងការខ្សត់ភ្ញៀវទៅកម្សាន្ត ដែលបញ្ហានេះ ផ្លូវថ្នល់គឺជាផ្នែកមួយសំខាន់ដែរ បន្ទាប់ពីហេតុផលវិបត្តិសេដ្ឋកិច្ច និងរដូវភ្លៀងធ្លាក់។ អ្នកពាក់ព័ន្ធនានានៃវិស័យទេសចរណ៍បានបង្ហាញពីការព្រួយបារម្ភពីការបាត់បង់ទេសចរ ប្រសិនបើផ្លូវថ្នល់នៅបន្តមានការលំបាកក្នុងការធ្វើដំណើរ។
លោក តុប សុភ័ក រដ្ឋលេខាធិការ និងជាអ្នកនាំពាក្យក្រសួងទេសចរណ៍ ក៏បង្ហាញពីកង្វល់ដែរពីប្រព័ន្ធគមនាគមន៍ឆ្ពោះទៅកាន់ខេត្តទេសចរណ៍មាត់សមុទ្រមួយនេះ ខណៈដែលរបាយការណ៍បង្ហាញថាទេសចរនៅខេត្តកែបនៅឆ្នាំនេះ មានការធ្លាក់ចុះប្រមាណ១០% ធៀបទៅនឹងឆ្នាំ២០២២។
នៅអំឡុងខែធ្នូ ចុងឆ្នាំ២០២៣នេះ ខេត្តកែបត្រូវធ្វើជាម្ចាស់ផ្ទះរៀបចំបុណ្យសមុទ្រលើកទី១០ ជុំទី៣ ដែលព្រឹត្តិការណ៍ដ៏ធំនេះ បានជួយលើកស្ទួយ និងផ្សព្វផ្សាយពីវិស័យទេសចរណ៍កម្ពុជា ព្រមទាំងជួយបង្កើនប្រាក់ចំណូលដោយផ្ទាល់ទៅដល់ប្រជាជនមូលដ្ឋានផងដែរ។
ភាគីពាក់ព័ន្ធនានាបានលើកឡើងថា ទីតាំងកម្សាន្តដែលល្អស្អាត និងមានភាពទាក់ទាញយ៉ាងណាក៏ដោយ ប្រសិនបើផ្លូវថ្នល់មានការលំបាក នោះនឹងមិនអាចស្រូបទាញទេសចរបានទេ។ ជាងនេះទៅទៀត នៅក្នុងឱកាសបុណ្យសមុទ្រនាសប្តាហ៍ទី៤ នៃខែធ្នូខាងមុខ នឹងមិនអាចមានសភាពអធិកអធមទេ ប្រសិនបើផ្លូវថ្នល់នៅតែលំបាក ហើយសេដ្ឋកិច្ចពលរដ្ឋមិនប្រសើរឡើងនោះ។
ទោះយ៉ាងណា ការដាក់ឲ្យអនុវត្តផែនការមេអភិវឌ្ឍវិស័យទេសចរខេត្តកែបឆ្នាំ ២០២៣-២០៣៥ កាលពីខែសីហាកន្លងទៅត្រូវគេសង្ឃឹមថា នឹងអាចជួយស្រោចស្រង់ទេសចរណ៍ខេត្តកែបបានឡើងវិញ ខណៈរយៈពេល៥ឆ្នាំចុងក្រោយ ខេត្តកែបទទួលបានទេសចរជាតិ និងអន្តរជាតិប្រមាណ ៦លាននាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ