បក្សថ្មីរបស់អតីតសមាជិកភ្លើងទៀនត្រូវបានចុះបញ្ជី
គណបក្ស«កម្លាំងជាតិ»របស់អតីតសមាជិកជាន់ខ្ពស់គណបក្សភ្លើងទៀន ទើបត្រូវបានក្រសួងមហាផ្ទៃចុះបញ្ជីឲ្យជាផ្លូវការកាលពីថ្ងៃទី១២តុលា បន្ទាប់ពីបានដាក់សំណើទៅអស់រយៈពេលប្រមាណ៤ខែ។ គណបក្សថ្មីនេះ គឺមាន លោក ស៊ុន ចន្ធី ដែលជាអតីតប្រធានគណៈកម្មាធិការប្រតិបត្តិគណបក្សភ្លើងទៀនខេត្តកំពង់ធំគឺជា ស្ថាបនិក។
ចុះផ្សាយនៅថ្ងៃ៖
ស្តាប់ - ០២:២២
ការទៅបង្កើតគណបក្សថ្មីដែលមានរូបសញ្ញាអំពូលភ្លើងរាងពងមាន់នេះ គឺគ្រាដែលគណបក្សភ្លើងនៅតែមិនទាន់មានសញ្ញាថា នឹងមានការបញ្ជាក់សំបុត្រជាផ្លូវឡើងវិញនៅឡើយ។ ការនេះដែលធ្វើឲ្យបក្សប្រឆាំងធំមួយនេះ ខកខានឱកាសចូលរួមការបោះឆ្នោតថ្នាក់កាលពីថ្ងៃ២៣កក្កដា។
គួរឲ្យដឹងថា លោក ស៊ុន ចន្ធី ដែលស្ថាបនិកគណបក្ស«កម្លាំងជាតិ»នេះ ត្រូវបានគេស្គាល់ថា គឺជាអតីតយុវជនរបស់គណបក្ស សម រង្ស៊ី យូរឆ្នាំមកហើយ។ លោក បានលាឈប់ពីគណបក្សភ្លើងទៀន នៅគ្រាដែលសមាជិកមួយចំនួនត្រូវបានចោទប្រកាន់ និងចាប់ខ្លួន។ បន្ទាប់មកអ្នកទាំងនោះមួយចំនួនបានសម្រេចចិត្តទៅចុះចូលជាមួយគណបក្សកាន់អំណាច។ ប៉ុន្តែ លោក ស៊ុន ចន្ធី មិនបានទៅចុះចូលជាមួយគណបក្សណាមួយឡើយ ដោយលោកអះអាង ក្នុងលិខិតលាឈប់នោះថា ដោយសារតែគ្មានពេលគ្រប់គ្រាន់បម្រើគណបក្សភ្លើងទៀន។
បើតាមអតីតអ្នកនយោបាយមកពីបក្សប្រឆាំងរូបនេះ ការបង្កើតគណបក្ស«កម្លាំងជាតិ»នៅពេលនេះដើម្បីស្រោចស្រង់ដំណើរការលទ្ធិប្រជាធិបតេយ្យនៅកម្ពុជាឱ្យមានដំណើរការរស់រវើកឡើងវិញ បន្ទាប់ពីលោកមើលឃើញថាដំណើរការប្រជាធិបតេយ្យនៅកម្ពុជាបានរងគ្រោះស្ទើតែស្លាប់បាត់បង់ទៅហើយនោះក្នុងពេលបច្ចុប្បន្ននេះ។
ទោះជាយ៉ាងណា អ្នកវិភាគនយោបាយខ្លះយល់ថា ការបង្កើតគណបក្ស«កម្លាំងជាតិ»របស់អតីតយុវជន ដែលធ្លាប់ដើរតាម លោក សម រង្ស៊ី នោះ គឺជាប្រៀបបានជាការត្រៀម«កង់ឡានទុកបម្រុង» ក្រែងលោគណបក្សប្រឆាំងត្រូវរំលាយ ឬគណបក្សភ្លើងទៀនមិនអាចដំណើរការបានដោយសារតែខ្វះសំបុត្រកំណើត។
ប៉ុន្តែគណបក្សភ្លើងទៀនដែលមានកៅអីក្រុមប្រឹក្សាឃុំ សង្តាត់ ច្រើនជាងគេលំដាប់ទី២ គឺបានសម្រេចចងសម្ព័ន្ធភាពជាមួយគណបក្សចំនួន៣ទៀត កាលពីសប្តាហ៍មុន គឺគណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជាដែលមិនបានចូលរួមប្រកួត។
បើតាម លោក គីមសួរ ភីរិទ្ធ អ្នកនាំពាក្យគណបក្សភ្លើងទៀន សម្ព័ន្ធភាពនយោបាយថ្មីនេះ អាចឈានដល់ការច្របាច់បញ្ចូលគ្នាជាគណបក្សតែមួយ ឬអាចប្រេះឆាទៅវិញ អាស្រ័យទៅលើបរិយាកាសនយោបាយជាក់ស្តែង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ