គណបក្សសម្ព័ន្ធចាប់ផ្តើមរៀបចំទីតាំងការងាររួមចេញដំណើរឆ្ពោះទៅឆ្នាំ ២០២៨
ក្រុមគណបក្សនយោបាយក្រៅរដ្ឋាភិបាលចំនួន៤ ដែលមាននិន្នាការផ្ទុយពីគណបក្សកាន់អំណាច នៅព្រឹកថ្ងៃសុក្រនេះ បានចាប់ផ្តើមបើកកិច្ចប្រជុំដំបូងរបស់ខ្លួនដើម្បីជជែកគ្នាពីយន្តការការងារសម្ព័ន្ធភាពអនាគត នៅទីស្នាក់ការកណ្តាលគណបក្សភ្លើងទៀននារាជធានីភ្នំពេញ។ ការបើកកិច្ចពិភាក្សាគ្នារបស់គណបក្សទាំង៤នេះ ធ្វើឡើងបន្ទាប់ពីគណបក្សជំទាស់ទាំងនេះ បានចុះហត្ថលេខាចងសម្ព័ន្ធនឹងគ្នាកាលពីថ្ងៃទី១១ ខែតុលា ឆ្នាំ២០២៣ កន្លងទៅ។
ចុះផ្សាយនៅថ្ងៃ៖
ស្តាប់ - ០២:៣០
តំណាងគណបក្សទាំង៤ មានគណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជាបានជួបគ្នាជាលើកដំបូងបន្ទាប់ពីពួកគេបានចុះហត្ថលេខាធ្វើសម្ព័ន្ធភាព ជាមួយគ្នាកាលពីដើមសប្តាហ៍មុន ដែលមានឈ្មោះថា«សម្ព័ន្ធភាពឆ្ពោះទៅអនាគត»។
លោក គីមសួរ ភីរិទ្ធ អ្នកនាំពាក្យគណបក្សភ្លើងទៀន បានថ្លែងថាជំនួបរវាងតំណាងគណបក្សសម្ព័ន្ធទាំង៤ គឺជាការរៀបចំការិយាល័យធ្វើការងាររួមមួយ ប្រៀបបាននឹងលេខាធិការដ្ឋាន ដើម្បីឲ្យតំណាងគណបក្សនីមួយៗដាក់មន្ត្រីរបស់ខ្លួនធ្វើការជាមួយគ្នាជាបន្តបន្ទាប់ ដូចជាការធ្វើសកម្មភាពនយោបាយស្របទៅតាមច្បាប់ ការកសាងបែបបទនីតិវិធីផ្សេងៗស្តីពីការរៀបចំ និងការប្រព្រឹត្តទៅនៃការងារសកម្មភាពរបស់សម្ព័ន្ធភាព។
លោក អ៊ូ ចន្ទរ័ត្ន ស្ថាបនិកគណបក្សកែទម្រង់កម្ពុជាបានប្រាប់វិទ្យុ RFI ដែរថា ជំនួបរវាងគណបក្ស៤នៅថ្ងៃនេះ គឺជាការលើកឡើងពីយន្តការនានា ដែលគណបក្សសម្ព័ន្ធត្រូវចូលរួមការបោះឆ្នោតជាបន្តបន្ទាប់នៅពេលខាងមុខ។ សម្រាប់គណបក្សកែទម្រង់កម្ពុជា លោក អ៊ូ ចន្ទរ័ត្ន ចង់ឃើញសម្ព័ន្ធភាពនេះធ្វើដំណើរទៅមុខដោយរួមគ្នាជាគណបក្សតែមួយ ឬក៏ធ្វើយ៉ាងណាចៀសវាងកុំឲ្យសម្លេងមួយចំនួនត្រូវបានបោះបង់ចោល ដើម្បីប្រជែងនឹងគណបក្សកាន់អំណាចនៅក្នុងការបោះឆ្នោតឆ្នាំ២០២៧-២០២៨ ខាងមុខ។
សូមរំលឹកថា កាលពីថ្ងៃទី១១ ខែតុលាកន្លងទៅតំណាងគណបក្សនយោបាយក្រៅរដ្ឋាភិបាលទាំង៤ បានធ្វើពិធីចុះហត្ថលេខារួមមួយដើម្បីបង្កើត«សម្ព័ន្ធភាពឆ្ពោះទៅអនាគត» ក្នុងគោលដៅបង្រួបបង្រួមអ្នកប្រជាធិបតេយ្យពិតប្រាកដ ដើម្បីយុត្តិធម៌សង្គម និងការអភិវឌ្ឍន៍ប្រកបដោយសមធម៌ និងចីរភាព។
ដោយមិនមានការបារម្ភនឹងសម្ព័ន្ធភាពនេះ គណបក្សប្រជាជននៅថ្ងៃជាមួយគ្នាដែរ ក៏បានទទួលយកគណបក្សក្រៅរដ្ឋាភិបាលចំនួន១៣ផ្សេងទៀតធ្វើជាសម្ព័ន្ធភាពដែរ បន្ទាប់ពីគណបក្សទាំងនោះធ្វើលិខិតសុំចងសម្ព័ន្ធជាមួយ។
សូមបញ្ជាក់ដែរថាគណបក្សភ្លើងទៀនដែលជាគណបក្សប្រឆាំងលេចធ្លោ ក្រោយអវត្តមានគណបក្សសង្គ្រោះជាតិ ត្រូវបានផាត់ចោលពីការបោះឆ្នោតជ្រើសតាំងតំណាងរាស្ត្រនីតិកាលទី៧ កាលពីខែកក្កដា កន្លងទៅ ក្រោមហេតុផលខ្វះឯកសារចុះបញ្ជីគណបក្សច្បាប់ដើម។
ក៏ប៉ុន្តែពេលនេះ សម្ព័ន្ធភាពគណបក្សទាំង៤ ត្រូវគេមើលឃើញថាជាយុទ្ធសាស្ត្រថ្មីមួយទៀត ដែលអាចជួយទប់ទល់ហានិភ័យនយោបាយ ដែលធ្វើឲ្យគណបក្សប្រឆាំងមិនអាចចូលរួមបោះឆ្នោតបាននៅក្នុងការបោះឆ្នោតនានានាពេលអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ