បក្សភ្លើងទៀនថានឹងចូលរួមបោះឆ្នោតព្រឹទ្ធសភា
គណបក្សភ្លើងទៀនដែលជាគណបក្សជំទាស់ធំជាងគេមួយនៅកម្ពុជាប្រកាសថាខ្លួននឹងចូលរួមបោះឆ្នោតជ្រើសតាំងសមាជិកព្រឹទ្ធសភានៅថ្ងៃទី២៥កុម្ភៈឆ្នាំ២០២៤និងបោះឆ្នោតជ្រើសរើសក្រុមប្រឹក្សា រាជធានី ខេត្ត ក្រុង ស្រុក ខណ្ឌ នៅឆ្នាំ២០២៤។ នេះជាការបោះឆ្នោតបែបអសកល បន្ទាប់ពីគណបក្សភ្លើងទៀនមិនត្រូវបានអនុញ្ញាតឲ្យចូលរួមប្រកួតកាលពីការបោះឆ្នោតជ្រើសតាំងតំណាងរាស្ត្រ ថ្ងៃទី២៣កក្កដាកន្លងទៅនេះ។
ចុះផ្សាយនៅថ្ងៃ៖
ស្តាប់ - ០២:០៧
នៅក្នុងសេចក្តីប្រកាសព័ត៌មាននៅថ្ងៃទី២០តុលា លោក ទាវ វណ្ណុល ប្រធានគណបក្សភ្លើងទៀន បានគូសបញ្ជាក់ថា គណបក្សនេះសម្រេចជ្រើសរើសយកគណបក្សណាមួយ«ក្នុងសម្ព័ន្ធភាពឆ្ពោះទៅអនាគត» ដើម្បីរៀបចំបញ្ជីបេក្ខជនឈរឈ្មោះសម្រាប់ការបោះឆ្នោតជ្រើសតាំងសមាជិកព្រឹទ្ធសភាអាណត្តិទី៥ និងការបោះឆ្នោតជ្រើសរើសក្រុមប្រឹក្សា រាជធានី ខេត្តក្រុង ស្រុក ខណ្ឌ អាណត្តិទី៤ ឆ្នាំ២០២៤។
សូមបញ្ជាក់ថា ក្រសួងមហាផ្ទៃនៅតែមិនចេញលិខិតបញ្ជាក់សំបុត្រកំណើតឲ្យគណបក្សភ្លើងទៀនឡើងវិញនៅឡើយ បន្ទាប់ពីគណបក្សនេះអះអាងថា បានបាត់សំបុត្រកំណើតដោយសារតែមានការរឹបអូសយកទីស្នាក់ការអតីតគណបក្សសង្គ្រោះជាតិនៅឆ្នាំ២០១៧។
ការបាត់សំបុត្រកំណើតនេះបានធ្វើឲ្យគណបក្សប្រឆាំងនេះ មិនអាចចូលរួមការបោះឆ្នោតជ្រើសតាំងតំណាងរាស្ត្រកាលពីថ្ងៃទី២៣កក្កដាកន្លងមកនេះឡើយ។ ដូច្នេះជម្រើសចុងក្រោយរបស់គណបក្សនេះ គឺទៅចងសម្ព័ន្ធភាពជាមួយគណបក្សចំនួន៣ទៀត គឺគណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជា។ ការចង់សម្ព័ន្ធភាពកាលពីថ្ងៃទី១០ខែតុលានេះ ដើម្បីត្រៀមចូលរួមបោះឆ្នោតព្រឹទ្ធសភាអាណត្តិទី៥ និងបោះឆ្នោតក្រុមប្រឹក្សា រាជធានី ខេត្ត ក្រុងស្រុក ខណ្ឌ អាណត្តិទី៤។
សូមបញ្ជាក់ថា តួរអង្គដែលត្រូវចេញទៅបោះឆ្នោតបែប អសកលនេះ គឺជាសមាជិករដ្ឋសភា សមាជិកក្រុមប្រឹក្សាឃុំ សង្កាត់ ដែលបានជាប់ឆ្នោតនៅឆ្នាំ២០២២ ខណៈគណបក្សភ្លើងទៀនមានកៅអីក្រុមប្រឹក្សាឃុំ សង្កាត់ ជាង២ពាន់កៅអី ជាប់លំដាប់ទី២ បន្ទាប់ពីគណបក្សកាន់អំណាច។
បើតាមគណៈកម្មាធិការជាតិរៀបចំការបោះឆ្នោត ការបោះឆ្នោតជ្រើសតាំងសមាជិកព្រឹទ្ធសភា គឺជ្រើសរើសសមាជិកចំនួន៥៨រូប ដោយចែកចេញជា៨មណ្ឌលទូទាំងប្រទេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ