បក្សប្រឆាំងស្វាគមន៍សម្ព័ន្ធភាពរវាងបក្សកាន់អំណាចនិង២៧បក្សផ្សេងទៀត ថាជាការបង្ហាញពលរដ្ឋកាន់តែច្បាស់
គណបក្សប្រជាជនកម្ពុជា និងគណបក្សក្រៅរដ្ឋាភិបាលចំនួន២៧ នឹងធ្វើពិធីចុះកិច្ចព្រមព្រៀងជាសម្ព័ន្ធភាពនឹងគ្នានៅថ្ងៃទី២៥ ខែតុលា នៅទីស្នាក់ការធំគណបក្សប្រជាជននារាជធានីភ្នំពេញ។ អ្នកនយោបាយជាន់ខ្ពស់គណបក្សប្រឆាំងមើលឃើញថាសម្ព័ន្ធភាពរវាងគណបក្សកាន់អំណាច និងគណបក្សក្រៅរដ្ឋាភិបាលផ្សេងទៀត គឺជាចំណុចវិជ្ជមាននៃលទ្ធិប្រជាធិបតេយ្យ និងជាការញែកឲ្យឃើញកាន់តែច្បាស់សម្រាប់ប្រជាពលរដ្ឋអ្នកបោះឆ្នោតក្នុងការជ្រើសរើស។
ចុះផ្សាយនៅថ្ងៃ៖
ស្តាប់ - ០២:៥៦
គណបក្សនយោបាយចំនួន២៧ ដែលមិនមានអាសនៈនៅក្នុងរដ្ឋសភា នឹងចុះកិច្ចព្រមព្រៀង សហប្រតិបត្តិការ និងចងសម្ព័ន្ធភាពជាមួយគណបក្សប្រជាជនកម្ពុជានៅថ្ងៃពុធ ដែលពិធីនេះ នឹងត្រូវធ្វើឡើងនៅទីស្នាក់ការធំគណបក្សប្រជាជនកម្ពុជា(វិមាន៧មករា) ហើយប្រធានគណបក្សប្រជាជនលោក ហ៊ុន សែន ក៏នឹងមានវត្តមានដោយផ្ទាល់។ កិច្ចព្រមព្រៀងដែលនាំទៅរកការចុះហត្ថលេខារួមគ្នានេះ គឺធ្វើឡើងបន្ទាប់ពីគណបក្សក្រៅរដ្ឋាភិបាលទាំងនោះ បានសរសេរលិខិតទៅប្រធានគណបក្សប្រជាជនរៀងៗខ្លួន ដើម្បីសុំចូលជាសម្ព័ន្ធភាពដែលដឹកនាំដោយគណបក្សកាន់អំណាច។
លោកស្រី ពោធិ៍តី សាវត្ថី ប្រធានគណបក្សធម្មាធិបតេយ្យបានប្រាប់វិទ្យុបារាំង RFI ថា ការចងសម្ព័ន្ធភាពជាមួយគណបក្សប្រជាជនគឺមិនមែនជាការរំលាយបក្សខ្លួនចូលជាមួយគណបក្សប្រជាជនទេ គឺជាការចូលរួមដោយមានសិទ្ធិស្មើភាពគ្នា ជជែកគ្នាជាមួយបក្សកាន់អំណាច នៅពេលដែលប្រទេសត្រូវការគំនិតយោបល់ពីគណបក្សលោកស្រី និងគណបក្សសម្ព័ន្ធផ្សេងទៀត។ មេបក្សស្ត្រីរូបនេះបញ្ជាក់ថាពួកគេមានគំនិត២៧ បូកនឹងគណបក្សកាន់អំណាចសរុប ២៨គោលគំនិត ដើម្បីរិះរកវិធីសាស្ត្រទប់ស្កាត់មហន្តរាយដល់ប្រទេសកម្ពុជា។
ការចងសម្ព័ន្ធភាពរវាងគណបក្សប្រជាជន និងគណបក្សក្រៅរដ្ឋាភិបាលដទៃទៀត ត្រូវគេកត់សម្គាល់ថាបានធ្វើឡើងក្រោយគណបក្សប្រឆាំងចំនួន៤ បានប្រកាសធ្វើសម្ព័ន្ធភាពនឹងគ្នាឆ្ពោះទៅអនាគតកាលពីពេលថ្មីៗនេះ ដែលរួមមានគណបក្សភ្លើងទៀន គណបក្សឆន្ទៈខ្មែរ គណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជា។
លោក អ៊ូ ចន្ទរ័ត្ន ស្ថាបនិកគណបក្សកែទម្រង់កម្ពុជា ក៏ដូចជាលោក គីមសួរ ភីរិទ្ធ អ្នកនាំពាក្យគណបក្សភ្លើងទៀន ដែលទើបតែធ្វើសម្ព័ន្ធភាព៤គណបក្សកាលពីពេលថ្មីៗនេះ សម្តែងការស្វាគមន៍ចំពោះការចងសម្ព័ន្ធភាពរវាងគណបក្សមួយចំនួន ដែលមាននិន្នាការគណបក្សកាន់អំណាច ចងសម្ព័ន្ធជាមួយគណបក្សកាន់អំណាច។ លោកថាវាជាភាពវិជ្ជមានសម្រាប់ដំណើរការប្រជាធិបតេយ្យនៅកម្ពុជា ដែលធ្វើឲ្យប្រជាពលរដ្ឋបានមើលឃើញកាន់តែច្បាស់ និងងាយជ្រើសរើសរវាងគណបក្សកាន់អំណាច គណបក្សមាននិន្នាការគណបក្សកាន់អំណាច និងជ្រុងម្ខាងទៀតជាសម្ព័ន្ធភាពគណបក្សក្រៅរដ្ឋាភិបាល ដែលមិនមាននិន្នាការរដ្ឋាភិបាល។
ជាការកត់សម្គាល់ គណបក្សក្រៅរដ្ឋាភិបាល ដែលគ្រោងនឹងចងសម្ព័ន្ធភាពជាមួយគណបក្សកាន់អំណាច គឺគណបក្សខ្លះទទួលបានសម្លេងគាំទ្រជាង១ម៉ឺនសម្លេង ហើយគណបក្សខ្លះទៀតទទួលបានជិត១០ម៉ឺនសម្លេង រួមនឹងគណបក្សដែលមិនមានសម្លេងគាំទ្រសោះ ខណៈពួកគេមិនបានចូលរួមបោះឆ្នោត។ នេះបើតាមលទ្ធផលឆ្នោតក្រុមប្រឹក្សាឃុំ សង្កាត់ ឆ្នាំ២០២២ និងការបោះឆ្នោតសកល ឆ្នាំ២០២៣។ ដោយឡែកគណបក្សសម្ព័ន្ធចំនួន៤ ដែលជាគណបក្សប្រឆាំងវិញ បង្ហាញថាគណបក្សភ្លើងទៀនទទួលបានសម្លេងជាង ១,៦លានសម្លេង ហើយគណបក្ស៣ផ្សេងទៀតក៏ទទួលបានសម្លេងតិចតួចដែរ។ នេះបើតាមលទ្ធផលបោះឆ្នោតក្រុមប្រឹក្សាឃុំ សង្កាត់ ឆ្នាំ២០២២៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ