លោក ហ៊ុន សែន៖ គណបក្សប្រជាជនមិនស្វះស្វែងធ្វើអនុត្តរភាពលេបគណបក្សដទៃទេ
លោក ហ៊ុន សែន ប្រធានគណបក្សប្រជាជនកម្ពុជា និងជាអតីតនាយករដ្ឋមន្ត្រី ថ្លែងឲ្យដឹងថាគណបក្សប្រជាជនមិនស្វះស្វែងប្រើប្រាស់សម្ព័ន្ធភាព ដើម្បីបង្កើនប្រជាប្រិយភាពរបស់ខ្លួនទេ។ ការបញ្ជាក់របស់លោក ហ៊ុន សែន ដូច្នេះ គឺធ្វើឡើងខណៈដែលគណបក្សកាន់អំណាចមួយនេះ បានធ្វើពិធីចុះហត្ថលេខាចងសម្ព័ន្ធភាពជាមួយគណបក្សនយោបាយក្រៅរដ្ឋាភិបាលចំនួន២៧ផ្សេងទៀត នៅថ្ងៃពុធនេះ នាទីស្នាក់ការធំរបស់គណបក្សប្រជាជនក្នុងរាជធានីភ្នំពេញ។
ចុះផ្សាយនៅថ្ងៃ៖
ស្តាប់ - ០២:២៦
ឆ្លើយតបនឹងសំណួររបស់អ្នកសារព័ត៌មាននៅក្នុងពិធីចុះហត្ថលេខារវាងគណបក្សប្រជាជន និងគណបក្សនយោបាយដែលមិនមានអាសនៈនៅក្នុងរដ្ឋសភាចំនួន២៧ផ្សេងទៀត លោក ហ៊ុន សែន ប្រធានគណបក្សប្រជាជន បានបញ្ជាក់ដល់ទៅ២ដងថា លោកមិនស្វះស្វែងប្រើប្រាស់សម្ព័ន្ធភាព ដើម្បីបង្កើនប្រជាប្រិយភាពរបស់ខ្លួន ហើយគណបក្សប្រជាជនមិនស្វះស្វែងធ្វើអនុត្តរភាពលេបគណបក្សដទៃឡើយ។
ក៏ប៉ុន្តែគណបក្សប្រជាជននឹងស្វះស្វែង ដើម្បីបំរើឲ្យគោលដៅទាំងឡាយដែលមានចែងនៅក្នុងកិច្ចព្រមព្រៀងជាមួយគណបក្សសម្ព័ន្ធពេលនេះ។ នេះបើតាមលោក ហ៊ុន សែន។ សូមបញ្ជាក់ថាកិច្ចព្រមព្រៀងរវាងគណបក្សប្រជាជនកម្ពុជា និងគណបក្សក្រៅរដ្ឋាភិបាល២៧ផ្សេងទៀត បានរំលេចនូវចំណុចសំខាន់ៗចំនួន៨ចំណុច ដែលចំណុចទី១ និងចំណុចទី២ សម្ព័ន្ធភាពបានបង្ហាញពីការពង្រឹងកិច្ចសហប្រតិបត្តិការល្អជាមួយគ្នាដោយស្មើភាព ស្មើសិទ្ធិ គោរពនូវឯករាជ្យ និងស្វ័យភាពរបស់គណបក្សនីមួយៗ ដើម្បីផលប្រយោជន៍ជាតិ និងប្រជាជនកម្ពុជា។
ការប្តេជ្ញាគោរពប្រតិបត្តិ ការពាររដ្ឋធម្មនុញ្ញកម្ពុជា ការពាររបបរាជានិយមអាស្រ័យរដ្ឋធម្មនុញ្ញ លើកកម្ពស់លទ្ធិប្រជាធិបតេយ្យសេរីពហុបក្ស ធានាសិទ្ធិមនុស្ស ការគោរពច្បាប់ និងយុត្តិធម៌សង្គម ក៏ត្រូវបានលើកឡើងមុនគេនៅក្នុងកិច្ចព្រមព្រៀងនេះដែរ។
ក្រៅពីនេះ គណបក្សសម្ព័ន្ធក៏បានរួមគ្នាទប់ស្កាត់ និងកំចាត់ចោលនូវនយោបាយជ្រុលនិយមពីប្រទេសកម្ពុជា និងមានភាពស្មោះត្រង់ ជួយគ្នា មិនប្រឆាំងគ្នា និងមិនធ្វើការឃោសនាប្រឆាំងគ្នាក្នុងពេលធ្វើយុទ្ធនាការឃោសនាបោះឆ្នោត មិនធ្វើសម្ព័ន្ធភាពជាមួយគណបក្សនយោបាយ ឬក្រុមនយោបាយណា ដែលប្រឆាំងចំពោះដៃគូក្នុងសម្ព័ន្ធភាពរបស់ខ្លួន និងចំណុចសំខាន់ៗជាច្រើនទៀត។
ជាមួយនឹងការឆ្លៀតឌឺដងឲ្យសម្ព័ន្ធភាពបក្សប្រឆាំងចំនួន៤ ថាជាសម្ព័ន្ធភាពឆក់កណ្តៀតអតីតនាយករដ្ឋមន្ត្រីលោក ហ៊ុន សែន ឲ្យដឹងថាសម្ព័ន្ធភាពរបស់គណបក្សប្រជាជន និងគណបក្សផ្សេងទៀតនៅពេលនេះ គឺតំណាងឲ្យជាងពាក់កណ្តាលនៃគណបក្សនយោបាយនៅកម្ពុជា។
ក៏ប៉ុន្តែអ្នកនយោបាយសម្ព័ន្ធភាពគណបក្សប្រឆាំងបានសម្តែងការសាទរទៅវិញទេ ដែលគណបក្សកាន់អំណាច បានធ្វើសម្ព័ន្ធភាពជាមួយគណបក្សនយោបាយដទៃទៀត ដែលនេះបង្ហាញឲ្យអ្នកបោះឆ្នោតបានឃើញកាន់តែច្បាស់ពីរូបភាព និងប៉ូលនយោបាយនៅក្នុងប្រទេសកម្ពុជា និងជាការបង្ហាញពីលទ្ធិប្រជាធិបតេយ្យផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ