គណបក្សភ្លើងទៀនលើកឡើងពីការប្រឈមនយោបាយពេលធ្វើជាប្រធានCALD នៅឥណ្ឌូណេស៊ី
មន្ត្រីជាន់ខ្ពស់គណបក្សភ្លើងទៀនបានអះអាងថាគណបក្សប្រឆាំងមួយនេះ បានលើកយកបញ្ហាប្រឈមនានាផ្នែកនយោបាយនៅក្នុងប្រទេសកម្ពុជា ទៅចែករំលែកដល់សមាជិកគណបក្សប្រជាធិបតេយ្យសេរីនិយមផ្សេងៗទៀត។ ការបញ្ជាក់ដូច្នេះ គឺធ្វើឡើងខណៈដែលតំណាងគណបក្សភ្លើងទៀនដឹកនាំដោយលោក សេង ម៉ារឌី អគ្គហិរញ្ញិកបានចូលរួម និងដឹកនាំសិក្ខាសាលា ដែលធ្វើឡើងនៅប្រទេសឥណ្ឌូណេស៊ីពីថ្ងៃទី២៧ ដល់ថ្ងៃទី៣០ ខែតុលា ឆ្នាំ២០២៣នេះ រៀបចំដោយក្រុមប្រឹក្សាសេរីនិយម និងប្រជាធិបតេយ្យអាស៊ី(CALD)។
ចុះផ្សាយនៅថ្ងៃ៖
ស្តាប់ - ០២:០៨
គណបក្សភ្លើងទៀន ក្នុងនាមជាប្រធានក្រុមប្រឹក្សាសេរីនិយម និងប្រជាធិបតេយ្យអាស៊ី(CALD) បានបញ្ជូនមន្ត្រីជាន់ខ្ពស់របស់ខ្លួនចំនួន៥រូប ទៅចូលរួមសិក្ខាសាលាស្តីពី«ការគ្រប់គ្រងគណបក្សនយោបាយ»ដែលកម្មវិធីនេះត្រូវបានរៀបចំឡើងដោយក្រុមប្រឹក្សាសេរីនិយម និងប្រជាធិបតេយ្យអាស៊ី និងគណបក្សប្រជាធិបតេយ្យតស៊ូ ឥណ្ឌូនេស៊ី(PDI-P) ដែលជាគណបក្សរបស់លោកប្រធានាធិបតីឥណ្ឌូណេស៊ី Joko Widodo កំពុងកាន់អំណាចបច្ចុប្បន្ន។
កិច្ចប្រជុំដែលមានរយៈពេល៣ថ្ងៃនេះ នៅមិនទាន់មានប្រកាសលទ្ធផលយ៉ាងណានៅឡើយទេ ក៏ប៉ុន្តែលោក គីមសួរ ភីរិទ្ធ អ្នកនាំពាក្យគណបក្សភ្លើងទៀន បានលើកឡើងថា គណបក្សប្រឆាំងនៅកម្ពុជាមួយនេះ បានលើកយកស្ថានភាពនយោបាយនៅប្រទេសកម្ពុជាទៅជជែក ដែលក្នុងនោះមានការខកខានមិនបានចូលរួមបោះឆ្នោត និងការរងសម្ពាធនយោបាយរបស់គណបក្សភ្លើងទៀន ដែលធ្វើឲ្យគណបក្សនេះមានការលំបាកក្នុងការធ្វើសកម្មភាពនយោបាយ។
លោកថាបញ្ហាទាំងអស់នេះ ត្រូវបានចែករំលែកទៅកាន់គណបក្សផ្សេងៗ ដែលជាសមាជិករបស់ក្រុមប្រឹក្សាសេរីនិយម និងប្រជាធិបតេយ្យអាស៊ី ដើម្បីរកដំណោះស្រាយ ព្រមទាំងរឹតចំណងសាមគ្គី និងផ្តល់ការលើកទឹកចិត្តរវាងគ្នា។ ទោះយ៉ាងណា អ្នកនាំពាក្យគណបក្សប្រឆាំងរូបនេះ ឲ្យដឹងថាការចូលរួមកិច្ចប្រជុំក្រុមប្រឹក្សាសេរីនិយម និងប្រជាធិបតេយ្យអាស៊ី របស់គណបក្សភ្លើងទៀនពេលនេះ ពិតជាមានសារៈសំខាន់។
សូមរំលឹកថាក្រុមប្រឹក្សាសេរីនិយម និងប្រជាធិបតេយ្យអាស៊ី(CALD)ត្រូវបានបង្កើតឡើងនៅឆ្នាំ១៩៩៣ នៅទីក្រុងបាងកកប្រទេសថៃ។ ក្រុមប្រឹក្សានេះ គឺជាវេទិកាសម្រាប់សន្ទនា និងសហប្រតិបត្តិការជាសម្ព័ន្ធភាពរបស់គណបក្សនយោបាយសេរី និងប្រជាធិបតេយ្យក្នុងតំបន់អាស៊ី។ CALD មានសមាជិកមកពីគណបក្សប្រជាធិបតេយ្យ និងសេរីនិយមមួយចំនួននៅក្នុងប្រទេសឥណ្ឌូណេស៊ី សឹង្ហបុរី ហ្វីលីពីន ស្រីលង្ការ ប៉ាគីស្ថាន ភូមា កម្ពុជា កោះតៃវ៉ាន់ជាដើម និងផ្តល់ជាឯកទត្តបុគ្គលឲ្យលោកស្រី អ៊ុងសាន ស៊ូជី ជ័យលាភីណូបែលសន្តិភាពនៃប្រទេសភូមា ជាសមាជិកកិត្តិយសផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ