បក្សភ្លើងទៀនរកការគាំទ្រឲ្យបក្សឆន្ទះខ្មែរឈរឈ្មោះបោះឆ្នោតព្រឹទ្ធសភា
គណបក្សភ្លើងទៀនត្រូវបានគេមើលឃើញថា កំពុងបង្កើនសកម្មភាពចុះមូលដ្ឋានស្វែងរកការគាំទ្រផ្ទៃក្នុង ខណៈគណបក្សជំទាស់ដែលមិនត្រូវបានអនុញ្ញាតឲ្យចូលរួមបោះឆ្នោតអាណត្តិទី៧នេះ សម្រេចជ្រើសរើសគណបក្សឆន្ទះខ្មែរឲ្យឈរឈ្មោះតំណាងខ្លួនក្នុងការបោះឆ្នោតព្រឹទ្ធសភាខាងមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១២
មូលហេតុដែលគណបក្សភ្លើងទៀនសម្រេចជ្រើសរើសគណបក្សឆន្ទះខ្មែរឲ្យឈរឈ្មោះក្នុងការបោះឆ្នោតព្រឹទ្ធសភាខាងមុខ ដោយសារតែគណបក្សនេះបានមកចងសម្ព័ន្ធភាពជាមួយគណបក្សភ្លើងទៀនមុនគេតាំងពីមុនបោះឆ្នោតថ្ងៃទី២៧កក្កដាទៅទៀត។ ម្យ៉ាងទៀតដោយសារតែស្ថាបនិកគណបក្សនេះ និងសមាជិកមួយចំនួនបានក្លាយទៅជាសមាជិកជាន់ខ្ពស់គណបក្សភ្លើងទៀនរួចទៅហើយ។ នេះបើតាមអ្នកនាំពាក្យគណបក្ស លោក គីមសួរ ភីរិទ្ធិ។
ប៉ុន្តែហេតុផលមួយទៀតដែលគណបក្សភ្លើងទៀនសម្រេចឲ្យគណបក្សឆន្ទះខ្មែរឈរឈ្មោះបោះឆ្នោតព្រឹទ្ធសភាតំណាងខ្លួន គឺដោយសារតែការលះបង់របស់លោក គង់ គាំ ធ្លាប់ជាព្រឹទ្ធសមាជិកគណបក្សភ្លើងទៀន យូរឆ្នាំមកហើយ និងចុងក្រោយគាត់បានលះបង់ដីផ្ទះរបស់ខ្លួនដោយសារតែប្រកាន់ជំហរនយោបាយជាមួយបក្សប្រឆាំង។
សូមបញ្ជាក់ថា គណបក្សឆន្ទះខ្មែរគឺបង្កើតឡើងដោយ លោក គង់ មុនីកា កូនប្រុសពៅរបស់លោក គង់ គាំ។ គណបក្សនេះបានចងសម្ព័ន្ធភាពជាមួយគណបក្សភ្លើងទៀន និងគណបក្សប្រជាធិបតេយ្យមូលដ្ឋាន ព្រមទាំងគណបក្សកែទម្រង់កម្ពុជា នៅពេលថ្មីៗនេះ ដែលគេមើលឃើញថា ជាបក្សប្រឆាំងមាននិន្នការប្រហាក់ប្រហែលគ្នា។ សម្ព័ន្ធភាពនេះបានកើតមុនពេលដែលការបោះឆ្នោតព្រឹទ្ធសភា នឹងត្រូវធ្វើនៅថ្ងៃទី២៥កុម្ភៈ២០២៤។
គណបក្សភ្លើងទៀនឈ្នះបានអាសនៈក្រុមប្រឹក្សាឃុំសង្កាត់ចំនួន ២,១៩៨ រូប ពោលជាគណបក្សលំដាប់ទី២ បន្ទាប់ពីគណបក្សកាន់អំណាច ទទួលបាន ៩,៣៧៦អាសនៈ កាលពីការបោះឆ្នោតជ្រើសតាំងក្រុមប្រឹក្សាឃុំសង្កាត់ឆ្នាំ២០២២។
សមាជិកក្រុមប្រឹក្សាជាប់ឆ្នោតទាំងអស់នឹងត្រូវចេញទៅបោះឆ្នោតអសកលនៅថ្ងៃទី២៥កុម្ភៈ២០២៤ ដើម្បីជ្រើសតាំងសមាជិកព្រឹទ្ធសភាចំនួន៥៨រូប ដែលមានអាណត្តិ៦ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ