រដ្ឋាភិបាលរៀបចំវេទិកា១សម្រាប់ជនបរទេសមើលអុំទូក បន្ថែមសេវាបកប្រែ ៣ភាសា
រដ្ឋាភិបាលកម្ពុជានឹងរៀបចំវេទិកាមួយដោយឡែកជាប់នឹងវេទិកាកិត្តិយស ដើម្បីផ្តល់ឲ្យជនបរទេសចូលរួមទស្សនាការប្រណាំងទូក នៅក្នុងឱកាសនៃព្រះរាជពិធីបុណ្យអុំទូក បណ្តែតប្រទីប សំពះព្រះខែ និងអកអំបុក ដែលប្រព្រឹត្តិទៅចាប់ពីថ្ងៃទី ២៦ដល់២៨ ខែវិច្ឆិកា ឆ្នាំ២០២៣នេះ។ ជាផ្នែកមួយទាក់ទាញទេសចរបរទេស និងចង់បង្ហាញពួកគេពីវប្បធម៌ខ្មែរផង វេទិកាសម្រាប់ជនបរទេសនេះ មានការផ្តល់សេវាបដិសណ្ឋារកិច្ច និងការបកប្រែប្រដេញពីភាសាខ្មែរ ទៅ៣ភាសាផ្សេងទៀតផងដែរ។ នេះបើតាមសេចក្តីជូនដំណឹងរបស់ក្រសួងទេសចរណ៍កាលពីថ្ងៃទី០៦ ខែវិច្ឆិកា ឆ្នាំ២០២៣។
ចុះផ្សាយនៅថ្ងៃ៖
ស្តាប់ - ០២:១៥
ក្រសួងទេសចរណ៍កម្ពុជាបានជូនដំណឹងថា ក្រសួងនេះនឹងរៀបចំវេទិកាដោយឡែកមួយស្ថិតនៅខាងជើងវេទិកាកិត្តិយសខាងមុខព្រះបរមរាជវាំង សម្រាប់ផ្តល់ជូនភ្ញៀវទេសចរអន្តរជាតិបានចូលរួមទស្សនាការប្រណាំងទូកនៅក្នុងព្រះរាជពិធីបុណ្យអំទូករយៈពេល៣ថ្ងៃនៅចុងខែវិច្ឆិកានេះ ដោយមានការផ្តល់បដិសណ្ឋារកិច្ចដល់ភ្ញៀវទេសចរអន្តរជាតិដូចជាភេសជ្ជៈឥតគិតថ្លៃ និងសេវាបកប្រែប្រដេញតាមកាសពីភាសាខ្មែរទៅ៣ភាសាផ្សេងទៀត មានភាសាអង់គ្លេស បារាំង និងចិន។
បន្ថែមពីនេះ វេទិកាសម្រាប់ជនបរទេសនឹងមានបំពាក់ទូរទស្សន៍ខ្នាតធំសម្រាប់ទស្សនាការផ្សាយផ្ទាល់ចេញពីទូរទស្សន៍ជាតិកម្ពុជានូវសកម្មភាពប្រណាំងទូក បណ្តែតប្រទីប និងការផ្សព្វផ្សាយអំពីតំបន់គោលដៅសក្តានុពលទេសចរណ៍ផ្សេងៗផងដែរ។
តាមរយៈព្រឹត្តិការណ៍ប្រចាំឆ្នាំនេះ ក្រសួងទេសចរណ៍ក៏បានបញ្ជាក់ដែរថាការរៀបចំបដិសណ្ឋារកិច្ចដល់ជនបរទេសដូច្នេះ គឺដើម្បីភ្ញៀវទេសចរបរទេសស្វែងយល់កាន់តែច្បាស់អំពីវប្បធម៌ ប្រពៃណី ទំនៀមទំលាប់របស់ខ្មែរ ដែលមានតាំងពីបុរាណកាលមក ដែលជាព្រះរាជពិធីបុណ្យដ៏មានប្រជាប្រិយបំផុតសម្រាប់ប្រជាពលរដ្ឋខ្មែរ។
ក្រសួងទេសចរណ៍ក៏បានប្រាប់ទៅទីភ្នាក់ងារទេសចរណ៍ និងផ្នែកឯកជនពាក់ព័ន្ធដែរឲ្យចូលរួមផ្សព្វផ្សាយពិធីបុណ្យអុំទូក និងរៀបចំបញ្ចូលព្រឹត្តិការណ៍នេះទៅក្នុងកញ្ចប់ទស្សនកិច្ចរបស់ខ្លួន ដោយក្រសួងទេសចរណ៍បានប្រកាសជាចំហដល់ភ្ញៀវទេសចរបរទេសឲ្យចូលទស្សនាដោយសេរី។
សូមរំលឹកថា ក្រោយវិបត្តិកូវីដ-១៩ ដែលទាញទំលាក់វិស័យទេសចរណ៍កម្ពុជាឲ្យធ្លាក់ដល់បាត វិបត្តិសង្គ្រាមអ៊ុយក្រែន វិបត្តិសេដ្ឋកិច្ចសកល សង្គ្រាមអ៊ីស្រាអែល-ហាម៉ាស និងការផ្សព្វផ្សាយតាមរយៈភាពយន្តចិនរឿង«No More Bet» ដែលបង្ហាញពីការបារម្ភ ការភ័យខ្លាចនូវឧក្រិដ្ឋកម្មនានាតាមប្រព័ន្ធអនឡាញ ទាំងអស់នេះត្រូវគេមើលឃើញថាជារនាំងថ្មីមួយដែលរារាំងទេសចរបទេសចូលមកក្នុងប្រទេសកម្ពុជា។
ក៏ប៉ុន្តែប្រមុខរដ្ឋាភិបាល លោក ហ៊ុន ម៉ាណែត បានដកស្រង់សំដីអ្នកវិនិយោគចិនមកអះអាងនៅព្រឹកថ្ងៃអង្គារនេះ អំឡុងពេលជួបជាមួយកម្មករនិយោជិតនៅខេត្តព្រះសីហនុថា អ្នកវិនិយោគចិននៅខេត្តព្រះសីហនុមិនមានការព្រួយបារម្ភ ឬភ័យខ្លាចអ្វីទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ