លោក រ៉ុង ឈុន រងការព្រមានពីអាជ្ញាធរ បន្ទាប់ពីប្រកាសទៅចូលគណបក្សថ្មី
លោក រ៉ុង ឈុន បានរងការព្រមានផ្ទួនៗនៅពេលនេះ ខណៈដែលតុលាការឲ្យលោកនៅក្រៅឃុំដោយព្យូទោស តែលោកបានចូលរួមធ្វើសកម្មភាពនយោបាយ។ ការព្រមានជាថ្មីទៀតនេះ គឺកើតឡើងភ្លាមៗ បន្ទាប់ពីអតីតអនុប្រធានគណបក្សភ្លើងទៀនរូបនេះ បានប្រកាសចាកចេញពីគណបក្សជំទាស់ទៅចូលរួមជាមួយគណបក្សកម្លាំងជាតិដែលទើបបង្កើតថ្មី ហើយគ្រោងធ្វើសមាជលើកដំបូងនៅថ្ងៃស្អែកនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៧
អង្គភាពព័ត៌មានដែលស្និទនឹងរដ្ឋាភិបាលបានចុះផ្សាយបន្តគ្នានូវអត្ថបទដែលមន្ត្រីក្រសួងយុត្តិធម៌ និងក្រសួងមហាផ្ទៃ ព្រមាន លោក រ៉ុង ឈុន ដែលទៅប្រកាសចូលរួមជាមួយគណបក្សប្រឆាំងថ្មីនេះ។
បើតាមមន្ត្រី ក្រសួងទាំងពីរនេះ គឺលោក រ៉ុង ឈុន នៅមិនទាន់មាននីតិសម្បទាគ្រប់គ្រាន់តាមផ្លូវច្បាប់ ដើម្បីធ្វើជាប្រធាន ឬអនុប្រធាន នៃគណបក្សនយោបាយណាមួយនោះទេ។ ហើយព្រមានថា បើមិនអនុវត្តតាមអំណាចនៃដីការបស់តុលាការនោះទេ គណបក្សនោះអាចប្រឈមនឹងការប្តឹងរំលាយ។
អ្នកនាំពាក្យក្រសួងមហាផ្ទៃ បានបញ្ជាក់ថា លោក រ៉ុង ឈុន កំពុងស្ថិតនៅក្នុងពេលវេលាអនុវត្តទោស និងស្ថិតក្រោមការត្រួតពិនិត្យតាមផ្លូវច្បាប់របស់តុលាការ។
សូមបញ្ជាក់ថា អ្នករិះគន់បញ្ហាព្រំដែនរូបនេះ ត្រូវបានតុលាការក្រុងភ្នំពេញកាត់ទោសកាលពីខែឧសភា ឆ្នាំ២០២១ ដាក់ពន្ធនាគាររយៈពេល២ឆ្នាំ តែសាលាឧទ្ធរណ៍នៅថ្ងៃទី១២វិច្ឆិកា ២០២១ បានកែប្រែមកអនុវត្តក្នុងពន្ធនាគារកំណត់តែ១ឆ្នាំ ៣ខែ ១១ថ្ងៃ។ ទោសដែលនៅសល់ត្រូវព្យូរទោសសាកល្បងដោយកំណត់រយៈពេល៣ឆ្នាំ។
លោក រ៉ុង ឈុន មេដឹកនាំសហជីព និងជាអតីតប្រធានសមាគមគ្រូបង្រៀនកម្ពុជាឯករាជ្យផងនោះត្រូវបានចាប់ខ្លួន កាលពីយប់ថ្ងៃ៣១ ខែកក្កដា ឆ្នាំ២០២០ ក្រោយពីលោកបានចុះទៅខេត្តត្បូងឃ្មុំហើយបានជួបប្រជាពលរដ្ឋនៅទីនោះដែលអះអាងថាដីរបស់ពួកគេត្រូវបានអាជ្ញាធរវៀតណាមហាមមិនឲ្យធ្វើស្រែចម្ការ ហើយការបោះបង្គោលព្រំដែនបានចូលមកទឹកដីកម្ពុជា។ អាជ្ញាធរព្រំដែនបានទាត់ចោលការចោទប្រកាន់នេះហើយប្តឹងបកទៅលើលោក រ៉ុង ឈុន។
លោក រ៉ុង ឈុន ទើបតែបានចូលរួមជាមួយគណបក្សភ្លើងទៀននៅដើមខែកុម្ភៈឆ្នាំ២០២៣ ហើយក្រោយមកបានក្លាយជាអនុប្រធានគណបក្សជំទាស់នេះ។ ប៉ុន្តែគណបក្សនេះមិនត្រូវបានអនុញ្ញាតឲ្យចូលរួមប្រកួតឡើយកាលពីការបោះឆ្នោតថ្ងៃទី២៣កក្កដាក្រោមហេតុថា គណបក្សនេះបាត់សំបុត្រកំណើត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ