លោក រ៉ុង ឈុន ត្រូវបានតែងតាំងជាទីប្រឹក្សាគណបក្សប្រឆាំងថ្មី
បន្ទាប់ពីចាកចេញពីគណបក្សភ្លើងទៀន លោក រ៉ុង ឈុន ត្រូវបានតែងតាំងនៅថ្ងៃអាទិត្យនេះ ជាទីប្រឹក្សាគណបក្សកម្លាំងជាតិ។ គឺជាគណបក្សប្រឆាំងថ្មីដែលទើបបង្កើតឡើង បន្ទាប់ពីគណបក្សភ្លើងទៀនមិនត្រូវបានអនុញ្ញាតឲ្យចូលរួមបោះឆ្នោតតំណាងរាស្ត្រអាណត្តិទី៧។ នៅប៉ុន្មានថ្ងៃមកនេះ លោក រ៉ុង ឈុន បានរងការព្រមានផ្ទួនៗពីក្រសួងយុត្តិធម៌ និងក្រសួងមហាផ្ទៃ តាមរយៈអង្គភាពព័ត៌មានដែលស្និទនឹងរដ្ឋាភិបាលថា អ្នករិះគន់បញ្ហាព្រំដែនរូបនេះ កំពុងស្ថិតនៅក្នុងពេលវេលាអនុវត្តទោស និងស្ថិតក្រោមការត្រួតពិនិត្យតាមផ្លូវច្បាប់របស់តុលាការនៅឡើយ។
ចុះផ្សាយនៅថ្ងៃ៖
ស្តាប់ - ០២:០៨
យោងតាមលទ្ធផលនៃការធ្វើសមាជលើកដំបូងនៅថ្ងៃទី១២វិច្ឆិកានេះ គណបក្សប្រឆាំងថ្មី ឈ្មោះថា កម្លាំងជាតិ ក៏បានបោះឆ្នោតផ្តល់សេចក្តីទុកចិត្តឲ្យលោក ជា មុនី អតីត ប្រធានសហជីពសេរីកម្ពុជា ធ្វើជាអនុប្រធានគណបក្សនេះ ដែលមានលោក ស៊ុន ចន្ធី ជាប្រធាន។
គណបក្សប្រឆាំងថ្មីនេះគឺមានសមាសភាពគណៈកម្មាធិការនាយកចំនួន២៨រូប និងសមាជិកគណៈកម្មាធិការអចិន្ត្រៃយ៍ចំនួន៩រូប។ គណបក្សនេះបានដាក់ចេញទិសដៅសម្រាប់ចូលរួមការបោះឆ្នោតសកលឆ្នាំ២០២៧ និង២០២៨ ហើយក៏ប្រកាសថាខ្លួនដាក់បេក្ខជនឈរបោះឆ្នោតអសកលគឺបោះឆ្នោតជ្រើសតាំងសមាជិកព្រឹទ្ធសភានៅថ្ងៃទី២៥កុម្ភៈ២០២៤ និងបោះឆ្នោតជ្រើសរើសសមាជិកក្រុមប្រឹក្សារាជធានី ខេត្ត ក្រុង ស្រុក ខណ្ឌ ផងដែរ។
អ្នកតាមដាននយោបាយខ្លះយល់ថា នេះជាការត្រៀមកង់ឡានបម្រុងរបស់អ្នកនយោបាយប្រឆាំង ខណៈដែលគណបក្សភ្លើងទៀនមិនមានសង្ឈឹមថានឹងអាចមានសិទ្ធិចូលរួមបោះឆ្នោតពេលខាងមុខ។ តែនៅចំពោះមុខនេះ គណបក្សភ្លើងទៀនបានសម្រេចជ្រើសរើសយកគណបក្សឆន្ទះខ្មែររបស់កូនប្រុសលោក គង់ គាំ ឲ្យឈរឈ្មោះតំណាងខ្លួនក្នុងការបោះឆ្នោតព្រឹទ្ធសភាខាងមុខ។ គណបក្សឆន្ទះខ្មែរគឺជាគណបក្សដែលបានទៅចងសម្ព័ន្ធភាពមុនគេជាមួយគណបក្សភ្លើងទៀន ខណៈគណបក្ស២ទៀត គឺគណបក្សប្រជាធិបតេយ្យមូលដ្ឋាន និងគណបក្សកែទម្រង់កម្ពុជាទើបតែសម្រេចចិត្តទៅចងសម្ព័ន្ធជាមួយគណបក្សប្រឆាំងនេះកាលពីថ្ងៃទី១០តុលា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ