បក្សកម្លាំងជាតិត្រៀមរបាយការណ៍ទៅមហាផ្ទៃ បន្ទាប់ពីមានការស្នើឲ្យដក លោក រ៉ុង ឈុន
ប្រមុខគណបក្សកម្លាំងជាតិ បានអះអាងថាលោកកំពុងរៀបចំរបាយការណ៍ដាក់ជូនក្រសួងមហាផ្ទៃអំពីលទ្ធផលនៃការធ្វើសមាជវិសមញ្ញជាលើកដំបូងរបស់គណបក្សដែលទើបបង្កើតថ្មីនេះ។ បើតាម លោក ស៊ុន ចន្ធី គ្មានអ្វីត្រូវឆ្លើយតបនឹងការលើកឡើងរបស់អ្នកនាំពាក្យក្រសួងមហាផ្ទៃដែលស្នើឲ្យគណបក្សនេះដកលោក រ៉ុង ឈុន ចេញពីទីប្រឹក្សា នៅក្រោមហេតុផលជាប់បំរាមតុលាការនោះឡើយ។
ចុះផ្សាយនៅថ្ងៃ៖
ស្តាប់ - ០២:១៩
ក៏ប៉ុន្តែលោកមានចម្ងល់ថាហេតុអ្វីបានជាអាជ្ញាធរតាមជំទាស់នឹង លោក រ៉ុង ឈុន ដែលមកចូលរួមជាមួយគណបក្សថ្មីនេះ ខណៈលោក រ៉ុង ឈុន ត្រូវបានក្រសួងមហាផ្ទៃក្នុងអាណត្តិលោក ស ខេង បានទទួលស្គាល់លោកគឺជាអនុប្រធានគណបក្សភ្លើងទៀននោះ។
សូមបញ្ជាក់ថា សមត្ថកិច្ចក្រសួងមហាផ្ទៃ និងក្រសួងយុត្តិធម៌ តាមរយៈអង្គភាពព័ត៌មានស្និទនឹងរដ្ឋាភិបាលបានចុះផ្សាយអត្ថបទ៣លេខបន្តបន្ទាប់គ្នា ដោយព្រមានលោក រ៉ុង ឈុន ថាកំពុងធ្វើសកម្មភាពនយោបាយផ្ទុយពីច្បាប់ ខណៈតុលាការព្យូទោស៣ឆ្នាំដាក់ឲ្យស្ថិតក្រោមការត្រួតពិនិត្យ។
ការព្រមាននេះហើយ បានធ្វើឲ្យអ្នករិះគន់ព្រំដែនដែលធ្លាប់ជាប់ពន្ធនាគារច្រើនដងមកនេះ បដិសេធតួនាទីជាប្រធានគណបក្សកម្លាំងជាតិដែលត្រូវបានអង្គសមាជបោះឆ្នោតគាំទ្រកាលពីថ្ងៃអាទិត្យ។ ប៉ុន្តែបន្ទាប់មកអង្គសមាជនៃគណបក្សប្រឆាំងថ្មីនេះ បានសម្រេចបោះឆ្នោតគាំទ្រ ឲ្យលោក រ៉ុង ឈុន ធ្វើត្រឹមជាទីប្រឹក្សាគណបក្សកម្លាំងជាតិដែលស្ថាបនិកភាគច្រើនគឺចេញពីគណបក្សភ្លើងទៀន។
បើតាមប្រមុខគណបក្សកម្លាំងជាតិ សមាជិកភាគច្រើនបំផុតរបស់គណបក្សនេះគឺចេញពីគណបក្សភ្លើងទៀនទាំងថ្នាក់ក្រោមជាតិ និងថ្នាក់ជាតិ។ តែលោក ស៊ុន ចន្ធី អះអាងថា នេះមិនមែនជាការបំបែកគណបក្សភ្លើងទៀនឡើយ តែថានេះជាគណបក្សទី២ បន្ទាប់ពីគណបក្សភ្លើងទៀន មិនត្រូវបានអាជ្ញាធរចេញសំបុត្រកំណើតឲ្យឡើងវិញ ដើម្បីចូលរួមការបោះឆ្នោតពេលខាងមុខ។
គណបក្សភ្លើងទៀនបានប្រកាសរួចហើយថា ខ្លួនជ្រើសយកគណបក្សឆន្ទះខ្មែរឲ្យតំណាងខ្លួនក្នុងការឈរឈ្មោះបោះឆ្នោត ព្រឹទ្ធសភា នៅថ្ងៃទី២៥កុម្ភៈ២០២៤ តែជាមួយគ្នានេះ គណបក្សកម្លាំងជាតិក៏ប្រកាសថា ខ្លួននឹងឈរឈ្មោះបោះឆ្នោតអសកលនេះដែរ ទោះជាគណបក្សទើបបង្កើតថ្មី មិនមានអង្គបោះឆ្នោតក៏ដោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ