ករណីបាញ់កាំភ្លើងលេងជាង២០០គ្រាប់ នៅគីរីរម្យជាការធ្វើតេស្តសមត្ថភាពរដ្ឋាភិបាលថ្មី?
សង្គមស៊ីវិលមួយចំនួន រួមនឹងប្រជាពលរដ្ឋខ្មែរនៅទូទាំងប្រទេស កំពុងរង់ចាំមើលចំណាត់ការរបស់អាជ្ញាធរនៃរាជរដ្ឋាភិបាលថ្មី ចំពោះការផ្ទុះអាវុធដល់ទៅជាង២០០គ្រាប់នៅចំការតែលើភ្នំគីរីរម្យ កាលពីចុងសប្តាហ៍មុន។ ករណីនេះ ត្រូវគេដាក់ការសង្ស័យបឋមថាមានជាប់ពាក់ព័ន្ធនឹងកូនប្រុសរបស់នាយឧត្តមសេនីយ៍ផ្កាយ៤ក្រសួងការពារជាតិគឺលោក គៀង សាវុធ ក៏ប៉ុន្តែលោក គៀង សាវុធ បានចេញសារបញ្ជាក់ប្រកបដោយការទទួលខុសត្រូវចំពោះមុខច្បាប់ថា លោក និងកូនប្រុសមិនជាប់ពាក់ព័ន្ធនឹងករណីបាញ់បោះដ៏កក្រើកនេះទេ។
ចុះផ្សាយនៅថ្ងៃ៖
ស្តាប់ - ០៣:០៤
ការបាញ់កាំភ្លើងលេងពេលស្រុកសន្តិភាពដល់ទៅជាង២០០គ្រាប់ នៅចំការតែលើភ្នំគីរីរម្យ ទោះកន្លងផុតទៅប៉ុន្មានថ្ងៃហើយក៏ដោយ ក៏ឥទ្ធិពលរបស់វានៅមិនទាន់រសាយនៅឡើយ ដោយសារពលរដ្ឋខ្មែរ និងអង្គការសង្គមស៊ីវិលនានា កំពុងរង់ចាំមើលចំណាត់ការរបស់រដ្ឋាភិបាលថ្មី ថាតើធ្វើឲ្យពួកគេមានការជឿជាក់ និងមានភាពកក់ក្តៅកំរិតណាពាក់ព័ន្ធទៅនឹងបញ្ហាសន្តិសុខ សុវត្ថិភាពសង្គមទាំងមូល។
ជាការកត់សម្គាល់ច្បាប់របស់ប្រទេសកម្ពុជាមិនអនុញ្ញាតឲ្យមានការប្រើប្រាស់អាវុធខុសច្បាប់ និងរឹតតែមិនអនុញ្ញាតទៅទៀតឲ្យមានការបាញ់បោះបែបអាណាធិបតេយ្យ ដែលធ្វើឲ្យពលរដ្ឋមានការភ្ញាក់ផ្អើល និងភ័យខ្លាច។ ទោះយ៉ាងណា ការផ្ទុះអាវុធ តែងកើតមានជាហូរហែរនៅក្នុងសង្គមដោយប្រការផ្សេងៗ ក៏ប៉ុន្តែមិនមានរូបភាពធំដុំដូចករណីនេះទេ។
ការហ៊ានយកកាំភ្លើងវែងខ្លីជាច្រើនដើម ទៅបាញ់លេងនៅតំបន់រមនីយដ្ឋានទេសចរណ៍រហូតដល់ជាង២០០គ្រាប់ ជាការអបអរជប់លៀងខួបកំណើតដូច្នេះ ត្រូវមហាជនយល់ឃើញថា ពលរដ្ឋសាមញ្ញ ឬមន្ត្រីសមត្ថកិច្ចតូចតាចអាចធ្វើទៅបាននោះទេ។ ហេតុដូច្នេះហើយ ប្រព័ន្ធផ្សព្វផ្សាយក្នុងស្រុកនានា រួមទាំងបណ្តាញសង្គម ប៉ុន្មានថ្ងៃកន្លងទៅនេះ បានចុះផ្សាយដោយដាក់ការសង្ស័យទៅលើកូនប្រុសលោកនាយឧត្តមសេនីយ៍ផ្កាយ៤ គៀង សាវុធ អគ្គមេបញ្ជាការរងកងទ័ពជាតិ។
ក៏ប៉ុន្តែតាមរយៈសារសម្លេង ដែលត្រូវបានចែកចាយតាមប្រព័ន្ធតេឡេក្រាមកាលពីម្សិលមិញ លោក គៀង សាវុធ បានបញ្ជាក់ថាលោក និងកូនប្រុស ឈ្មោះ គៀង ចាន់តួ មានតួនាទីជាឧត្តមសេនីយ៍ផ្កាយ២ ក្រសួងមហាផ្ទៃ មិនជាប់ពាក់ព័ន្ធនឹងករណីបាញ់បោះសេរីនេះទេ។ លោកអះអាងថានឹងទទួលខុសត្រូវចំពោះមុខច្បាប់ ដោយសុខចិត្តបកស័ក្តិចេញ និងដើរចូលគុកទាំងឪពុក ទាំងកូន ប្រសិនបើលោក និងកូនប្រុសរបស់លោកជាប់ពាក់ព័ន្ធនឹងការបាញ់បោះនោះមែន។ លើសពីនេះ លោក គៀង សាវុធ ក៏បានទុកពេលឲ្យសារព័ត៌មាននានា ដែលបានចុះផ្សាយពីលោក និងកូនលោក ដែលលោកយល់ថាជាការផ្សាយបំភ្លើសការពិត ឲ្យកែតម្រូវឡើងវិញក្នុងរយៈពេល១សប្តាហ៍។ បើពុំដូច្នោះទេ លោកនឹងប្តឹងសារព័ត៌មានទាំងអស់នោះតាមផ្លូវច្បាប់។
ពាក់ព័ន្ធនឹងករណីបាញ់បោះនេះដែរ លោក សន ជ័យ មេដឹកនាំអង្គការសង្គមស៊ីវិលមួយរូប និងជាអ្នកតាមដានសង្គមបានយល់ឃើញថាប្រជាពលរដ្ឋនឹងមានការសោកស្តាយ និងបាត់បង់ជំនឿប្រសិនបើសមត្ថកិច្ចមិនអាចមានវិធានការបង្ក្រាប និងលុបបំបាត់ករណីបែបនេះឲ្យមានប្រសិទ្ធភាព។ លោកថា ការផ្ទុះអាវុធដែលល្មើសច្បាប់ដូច្នេះ អាចស្ថិតក្រោមឥទ្ធិពលនៃគ្រឿងស្រវឹង ហើយអាចនឹងមានខ្នងបង្អែក។
សមត្ថកិច្ចខេត្តកំពង់ស្ពឺមិនមានការបញ្ជាក់យ៉ាងណានៅឡើយ ជុំវិញការវិវត្តន៍នៃបញ្ហាដែលមហាជនចាប់អារម្មណ៍នេះ ក៏ប៉ុន្តែមន្ត្រីជាន់ខ្ពស់នៃអង្គស្នងការប៉ូលីសជាតិ បានថ្លែងប្រាប់សារព័ត៌មានក្នុងស្រុកថា មនុស្ស៤នាក់ បានចូលសារភាព ហើយអាជ្ញាធរខេត្តកំពង់ស្ពឺកំពុងមានវិធានការទៅតាមផ្លូវច្បាប់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ